ဂျန်ဇက် (NSS) - စက်တင်ဘာ ၂၉ 

အိန္ဒိယဝန်ကြီးချုပ်မိုဒီက အိန္ဒိယနိုင်ငံကို ကမ္ဘာ့စီးပွားရေးအကောင်းဆုံး ထိပ်ဆုံး သုံးနိုင်ငံစာရင်းထဲ ရောက်ရှိအောင် လုပ်ဆောင်ပြသွားမယ်လို့ ကတိပြုပြောဆိုလိုက်ပါတယ်။

အိန္ဒိယနိုင်ငံဟာ နိုင်ငံရေးတည်ငြိမ်မှု၊ မူဝါဒပိုင်းရှင်းလင်းပြတ်သားမှု နဲ့ ဒီမိုကရက်တစ် စံနှုန်းတန်ဖိုးများ ကောင်းမွန် နေခြင်းကြောင့် ကမ္ဘာ့စီးပွားရေး အဖွံ့ဖြိုးဆုံးနိုင်ငံအဖြစ် အလျင်မြန်ဆုံးရောက်ရှိလာမှာဖြစ်ကြောင်း၊ နိုင်ငံရဲ့ စီးပွားရေးဖွံ့ဖြိုးတိုးတက်မှုများ လျင်မြန်စွာတိုးတက်ဖြစ်ထွန်းလာမှာဖြစ်ကြောင်း ဝန်ကြီးချုပ်မိုဒီ က ပြောပါတယ်။

ဝန်ကြီးချုပ်မိုဒီက "ကျွန်တော်အနေနဲ့ အိန္ဒိယနိုင်ငံကို ကမ္ဘာ့စီးပွားရေးအင်အားအကောင်းဆုံး ထိပ်ဆုံးသုံးနိုင်ငံထဲကို ပါဝင်လာအောင် လုပ်ဆောင်သွားမယ်လို့ အာမခံပါတယ်။ ကျွန်တော်ဟာ ပြည်သူတွေရဲ့ထောက်ခံမှု ရဖို့ လိုအပ်တယ်" လို့ ပြောပါတယ်။

ဒါ့အပြင် မိုဒီက "ကျွန်တော် ဘာလုပ်လုပ် ဆုံးရှုံးမှာ မဟုတ်ဘူး။ အိန္ဒိယနိုင်ငံဟာ ၂ဝ၄၇ ခုနှစ်မှာ ဖွံ့ဖြိုးပြီး နိုင်ငံဖြစ်လာမှာပါ" လို့ ပြောပါတယ်။

မိုဒီက ၎င်းတို့ဦးဆောင်တဲ့ အစိုးရအဖွဲ့အနေနဲ့ အကျင့်ပျက်လာဘ်စားမှုတွေကို ထိန်းချုပ်နိုင်ဖို့ ၉ နှစ်ကျော်အတွင်း ရိုးသားစွာလုပ်ကိုင်ခဲ့ကြောင်း ပြောပါတယ်။ ၎င်းက "အိန္ဒိယနိုင်ငံဟာ ဖွံ့ဖြိုးတိုးတက်မှုတွေ၊ သန့်ရှင်းမှု နဲ့ ကောင်းမွန်တဲ့အုပ်ချုပ်မှုတွေ ဆက်လက်ဖြစ်နေမယ်ဆိုရင် ၂ဝ၄၇ ခုနှစ်မှာ ဖွံ့ဖြိုးပြီးနိုင်ငံဖြစ်လာမှာပါ။ အိန္ဒိယရဲ့ ဖွံ့ဖြိုးတိုးတက်မှုတွေကို ဘယ်သူမှ မတားဆီးနိုင်ဘူး" လို့ ပြောပါတယ်။

အိန္ဒိယနိုင်ငံဟာ တဖြည်းဖြည်း နဲ့ ဖွံ့ဖြိုးတိုးတက်မှုများ ပိုမိုကောင်းမွန်လာပြီဖြစ်ရာ ပြီးခဲ့တဲ့လမှာ လကမ္ဘာအပေါ် ကို Chandrayaan3 အမည်ရှိ အာကာသယာဉ်ကို အောင်မြင်စွာလွတ်တင်နိုင်ခဲ့သလို  နှစ်ပေါင်း ၄ဝ ကျော်အတွင်း မှာ ပထမဆုံးအကြိမ်အဖြစ် BRICS ထိပ်သီးအစည်းအဝေးမှာ သမိုင်းဝင်အောင်မြင်မှုတွေ ရအောင် လုပ်ဆောင်နိုင်ခဲ့ ကြောင်း၊ ကမ္ဘာ့ထိပ်သီးနိုင်ငံများ ပါဝင်တဲ့ G20 ထိပ်သီးအစည်းအဝေးကိုလည်း ပြီးခဲ့တဲ့ရက်ပိုင်းမှာ အိမ်ရှင်အဖြစ် အောင်မြင်စွာကျင်းပနိုင်ခဲ့ကြောင်း ဝန်ကြီးချုပ်မိုဒီက ပြောပါတယ်။