Htay Oung (NSS) - စက်တင်ဘာ ၂၈ 

မြေထဲပင်လယ်မှာ လုပ်ကိုင်ဆောင်ရွက်နေတဲ့ ရွှေ့ပြောင်းအခြေချသူများဆိုင်ရာ ပရဟိတအဖွဲ့များကို ငွေကြေး ထောက်ပံ့ရာမှာ ဂျာမန်အစိုးရရဲ့သဘောထားကို အံ့ဩခြင်းကြီးစွာဖြင့် သိရှိခဲ့ရကြောင်း အီတလီဝန်ကြီးချုပ် ဂျော်ဂျီယာ_မယ်လိုနီက ဂျာမန်အဓိပတိ အော့လ်ဖ်_ရှု့လ်ထံ  စာရေးသားခဲ့တယ်လို့ Reuters က စက်တင်ဘာလ ၂၅ ရက်မှာ ဖော်ပြခဲ့ပါတယ်။

(အာဖရိကိုက် မြောက်ပိုင်းမှ ဥရောပတိုက်ကိုသွားရောက်လိုတဲ့ ရွှေ့ပြောင်းအခြေချသူများအတွက် အီတလီဟာ မြေထဲပင်လယ်ခရီးနဲ့အနီးဆုံးဖြစ်ပြီး တစ်နေ့တစ်ခြား တိုးတက်ဖွံ့ဖြိုးနေတဲ့ တိုင်းပြည်ဖြစ်ပါတယ်။ ကလေးမွေးဖွား နှုန်း နည်းပါးခြင်းကြောင့် နိုင်ငံလူဦးရေ တိုးတက်နှုန်း ကျဆင်းပြီး ပျမ်းမျှသက်တမ်းတိုးမြင့်နေတဲ့ တိုင်းပြည်မှာ အလုံးအရင်းနဲ့ဝင်ရောက်လာတဲ့ရွေ့ပြောင်းအခြေချသူများကြောင့် ပြည်တွင်းနိုင်ငံသားဦးရေအချိုးအစား ပြောင်းလဲ သွားပြီး အလုပ်သမားစျေးကွက်လည်း ပြိုလဲသွားရပါတယ်။ အီတလီဟာ လူဦးရေ ၅၉ သန်းခန့်ရှိပြီး မြန်မာထက် လူဦးရေ အနည်းငယ်သာ ပိုမိုပါတယ်။

(ဥရောပအစိုးရတို့ဟာ ရွှေ့ပြောင်းအခြေချသူ သန်းချီ လက်ခံဖို့ ဘီလျံနာသူဋ္ဌေးကြီး ဂျော့ဆိုရော့စ်ရဲ့ လူသားချင်း စာနာမှု၊ ခွဲခြားဆက်ဆံမှုပပျောက်ရေး၊ ပွင့်လင်းလူ့အဖွဲ့အစည်းတည်ဆောက်လိုသူများရဲ့ လူ့အခွင့်အရေးဆိုင်ရာ ဖိအားပေးခြင်းအမျိုးမျိုးနဲ့ ရင်ဆိုင်နေရပါတယ်။ အီတလီရဲ့အမျိုးသားရေးဝါဒီအစိုးရကတော့ အတောမသတ် ဝင်ရောက်နေကြခြင်းများကို ကာကွယ်ဖို့အတွက် တရားမဝင် ရောက်ရှိလာသူများကို ၁၈-လ ကြာချုပ်နှောင်ထား နိုင်တဲ့ လူဝင်မှုကြီးကြပ်ရေးဆိုင်ရာဥပေဒများကို ပြင်ဆင်ပြောင်းလဲခဲ့ပါတယ်။ မြောက်အာဖရိကမှ ဒုက္ခသည်လှေ များကို တားဆီးရန် ဥရောပရေကြောင်းမစ်ရှင်ထူထောင်ရေး တောင်းဆိုခြင်း၊ #ရောက်ရှိလာသူများကို နေရပ် ပြန်ပို့ခြင်းနဲ့ ဒုက္ခသည်စခန်းများကို တိုးချဲ့ဆောက်လုပ်ခြင်းရခြင်းတို့နဲ့ ဗျာများနေခဲ့ရပါတယ်။ အခြားတစ်ဖက်မှာ လည်း အာဖရိကတိုက်သားများ အလုံးအရင်းနဲ့၀င်ရောက်လာခြင်းကို တားဆီးလိုတဲ့ ဥရောပနိုင်ငံအချို့က လူသိရှင်ကြား မဟုတ်ဘဲ အီတလီကို ရှေ့တန်းခြံစည်းရိုး သဘောထားပြီး ဗိုက်အငှားနဲ့ ဒါးထိုးခံစေလိုကြပါတယ်။ အလုပ်သမားလိုအပ်နေတဲ့ နိုင်ငံအချို့ကတော့ သူတို့နိုင်ငံက မခေါ်ယူနိုင်မီ ရွှေ့ပြောင်းနေထိုင်သူတွေကို အီတလီ က လက်ခံထားစေလိုပါတယ်။ သတင်းဘာသာပြန်သူ)

လက်ယာယိမ်းနိုင်ငံသားဗဟိုပြုအမျိုးသားရေးဝါဒီ မယ်လိုနီလက်ထက် အီတလီအစိုးရဟာ တရားမဝင် ရောက်ရှိ လာသူများအပေါ် တင်းမာတဲ့သဘောထားအတိုင်း ဆက်လက်ကျင့်သုံးနေပါတယ်။ သို့တိုင်အောင် ၂ဝ၂၂ ခုနှစ် အီတလီကမ်းခြေကိုရောက်ရှိလာတဲ့ ရွှေ့ပြောင်းအခြေချသူ ဦးရေဟာ ၆၉,၈ဝဝ ရှိနေရာမှ ယခုနှစ်မှာ  ၁၃၃,ဝဝဝ အထိ ဖြစ်လာပါတယ်။ 

ပရဟိတလုပ်ငန်းများကို ကူညီထောက်ပံ့ရန် ရည်ရွယ်တယ်ဆိုတဲ့ ဂျာမန်အစိုးရသဘောထားနဲ့ပတ်သက်ပြီး  အီတလီဝန်ကြီးချုပ်ရဲ့  စက်တင်ဘာ ၂၃ ရက်စွဲပါ ပေးစာကို မယ်လိုနီရဲ့ အာဏာရ BoI ပါတီအကြီးတန်း ပုဂ္ဂိုလ် တစ်ဦးဖြစ်သူ ကာကွယ်ရေး၀န်ကြီး ဂိုင်ဒို_ခရော့စ်ဆက်တိုက တနင်္ဂနွေနေ့ အင်တာဗျူးတစ်ခုမှာ လူသိရှင်ကြား ဖွင့်ချလိုက်ခြင်းပဲဖြစ်ပါတယ်။

အီတလီအစိုးရနဲ့ ညှိနှိုင်းတိုင်ပင်ခြင်း မရှိဘဲ အီတလီရဲ့ရေပြင်ပိုင်နက်မှာ ပုံမှန်မဟုတ်တဲ့ ရွှေ့ပြောင်းနေထိုင်သူများ ကို လက်ခံခြင်း၊ မြေထဲပင်လယ်အတွင်း ကယ်ဆယ်ရေးများမှာ ပါဝင်ဆောင်ရွက်နေတဲ့ အစိုးရမဟုတ်သော NGO အဖွဲ့အစည်းများကို ရန်ပုံငွေအမြောက်အများ ထောက်ပံ့ရန် လူကြီးမင်းရဲ့ဂျာမန်အစိုးရက ဆုံးဖြတ်ခဲ့ကြောင်း သိရှိရတဲ့အတွက် အလွန်အမင်း အံ့သြမိတယ်လို့ မယ်လိုနီရဲ့စာမှာ ဖော်ပြထားပါတယ်။ 

သောကြာနေ့ ဘာလင်နိုင်ငံခြားရေးဝန်ကြီးဌာနပြောခွင့် ရရှိသူကတော့ ဂျာမန်အစိုးရဟာ အရပ်ဘက်ပင်လယ်ပြင် ရော ကုန်းပေါ်မှာပါ ကယ်ဆယ်ရေးပရောဂျက်များအတွက် ပါလီမန်ဘဏ္ဍာရေးထောက်ပံမှုအစီအစဉ်ကို အကောင် အထည်ဖော်နေပြီး အဆိုပြုလွှာနှစ်ခုကို ပြန်လည်သုံးသပ်ပြီးစီးခဲ့တယ်လို့ ဆိုပါတယ်။ ပင်လယ်ပြင်ရှိ လူသားများကို ကယ်ဆယ်ခြင်းဟာ တရားဥပဒေ၊ လူသားချင်းစာနာမှုနဲ့ ကိုယ်ကျင့်တရားဆိုင်ရာ တာဝန်ဖြစ်တယ်လို့လည်း ဝန်ကြီးဌာနက ပြောပါတယ်။

မြောက်အာဖရိကမှ မြေထဲပင်လယ်ပြင်ကို ဖြတ်ကျော်ပြီး ဝင်ရောက်နေသူများကို ဟန့်တားရေး ကြိုးပမ်းတဲ့အနေနဲ့ ခိုးဝင်များကို အချိန်ပိုကြာကြာ ချုပ်နှောင်ထားရန်နဲ့ ရွှေ့ပြောင်းအခြေချသူ ထိန်းသိမ်းရေးစခန်းများ တိုးချဲ့ တည်ဆောက်မယ့် စီမံချက်အသစ်များကို အီတလီ၀န်ကြီးချုပ်က လက်မှတ်ရေးထိုးခဲ့ပါတယ်။

တစ်ဖက်မှာလည်း ခိုလှုံခွင့် ရှာဖွေသူများအပေါ် အကာအကွယ်ပေးရေး လုပ်ဆောင်နေခိုက် ဖမ်းဆီးမခံရလိုလျှင် အမေရိကန်ဒေါ်လာ ၅၂၅၉ နဲ့ ညီမျှတဲ့ ယူရိုငွေကို ပေးဆောင်ဖို့ ဥပဒေကိုလည်း မယ်လိုနီ အစိုးရက ပြဌာန်း လိုက်ပါတယ်။

ရွှေ့ပြောင်းအခြေချမှုဖြစ်စဉ်အတွက် အီတလီအပေါ် ခိုင်မာတဲ့ အထောက်အပံ့တွေ ပေးဖို့ စိတ်ဝင်စားတဲ့ ဥရောပ နိုင်ငံတွေအနေနဲ့ ဘဏ္ဍာရေးကိစ္စ အပါအဝင် ကြိုးပမ်းမှုတွေမှာ စည်းကမ်းနည်းလမ်းတကျ ဖြေရှင်းရေးကို ပိုပြီး အာရုံစိုက်သင့်တယ်လို့ ယုံကြည်ပါကြောင်း ဂျာမန်အဓိပတိထံ မယ်လိုနီရဲ့ပေးစာမှာ ဖော်ပြထားပါတယ်။ 

လက်ဝဲယိမ်းညွန့်ပေါင်းအစိုးရ အုပ်ချုပ်နေတဲ့ ဂျာမနီနိုင်ငံဟာ ကိုယ့်နိုင်ငံမြေပေါ်ရှိ ရွှေ့ပြောင်းဒုက္ခသည်များ ကူညီရေးအပေါ်မှာသာ အာရုံစိုက်သင့်ပါကြောင်း၊ မြေထဲပင်လယ်ပြင်မှာ ကူညီကယ်ဆယ်ရေး NGO များ ရှိနေခြင်း ဟာ သင်္ဘောပျက်ခြင်းနဲ့ အသေအပျောက်များ မကြာခဏဖြစ်ပေါ်လေ့ရှိတဲ့ ရွှေ့ပြောင်းသွားလာမှုများကို လှုံ့ဆော် ပေးရာ ရောက်ရှိနိုင်တယ်လို့ အီတလီ၀န်ကြီးချုပ်က ဆိုပါတယ်။

မြေထဲပင်လယ် ကူညီကယ်ဆယ်ရေး NGO အဖွဲ့တွေကတော့ သူတို့အနေနဲ့ ဥရောပကို ဦးတည်လာတဲ့ တရား မဝင်ရွှေ့ပြောင်းအခြေချသူများတိုးပွားလာအောင် အားပေးအားမြှောက်လုပ်ရာရောက်တဲ့ကိစ္စမျိုးကို ဆောင်ရွက်နေခြင်းမရှိဘူးလို့ ငြင်းဆိုနေပါတယ်။ 

#အီတလီ၀န်ကြီးချုပ်_ဂျော်ဂျီယာမယ်လိုနီ #လက်ယာယိမ်း_နိုင်ငံသားဗဟိုပြု_အမျိုးသားရေးဝါဒီ #ဂျာမန်အဓိပတိအော့လ်ဖ်ရှု့လ်ဇ် #တရားမ၀င်ရွှေ့ပြောင်းအခြေချသူများ

(Reuters., 25 September 2023,” Italian PM Meloni reproaches Germany's Scholz over migration” နှင့် အခြားဆက်စပ်သတင်းများကို #HtayOung, #OungMarine ကောက်နှုတ်စုစည်းဘာသာ ပြန်ဆိုသည်။)