မျိုးကြီး (NSS) - စက်တင်ဘာ ၂၇

NCA ကို ကိုယ်တိုင်ရေးထိုးခဲ့သည့် ခေါင်းဆောင်များနှင့် နိုင်ငံတကာအသိသက်သေများကို ဖိတ်ကြားကာ NCA လက်မှတ်ရေးထိုးခြင်း(၈)နှစ်ပြည့်အခမ်းအနားကို ကျင်းပနိုင်ရေး ညှိနှိုင်းနေကြောင်း သတင်းရရှိသည်။

တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA) လက်မှတ်ရေးထိုးခြင်း (၈)နှစ်မြောက်နှစ်ပတ်လည်အခမ်းအနားကို လာမည့်အောက်တိုဘာလ ၁၅ ရက်တွင် နေပြည်တော်၌ ကျင်းပသွားမည်ဖြစ်သည်။

မကြာခင်ကျင်းပမည့် NCA နှစ်ပတ်လည်အခမ်းအနားကို နိုင်ငံရေးအနှစ်သာရရှိရှိ ကျင်းပနိုင်ရေးအတွက် ဆွေးနွေးညှိနှိုင်းမှုများပြုလုပ်နေကြောင်း KNU/KNLA-PC မှ ဗိုလ်မှူးကြီးစောကျော်ညွန့်က NSS ကို ပြောသည်။

NCA ကို ကိုယ်တိုင်ပါဝင်လက်မှတ်ရေးထိုးခဲ့ကြသော အစိုးရ၊ လွှတ်တော်၊ တပ်မတော်နှင့် တိုင်းရင်းသားလက်နက်ကိုင်အဖွဲ့အစည်းများ၏ ခေါင်းဆောင်များနှင့် နိုင်ငံတကာအသိသက်သေများကို (၈)နှစ်ပြည့်အခမ်းအနားသို့ တက်ရောက်ရန်အတွက် ဖိတ်ကြားသွားရန်ရှိကြောင်း ၎င်းက ဆက်လက်ပြောသည်။

“ဘယ်လိုပဲဖြစ်ဖြစ် ကျွန်တော်တို့အနေနဲ့ကတော့ အစဉ်အလာမပြတ် နှစ်စဉ်နှစ်တိုင်းကျင်းပခဲ့တဲ့ NCA လက်မှတ်ရေးထိုးခြင်း အခမ်းအနားကိုတော့ ဆက်လက်ကျင်းပမယ်။ ဆက်လက်ကျင်းပတာတောင်မကပဲ အခါတိုင်းနှစ်တွေထက် လေးလေးနက်နက်ဖြစ်အောင် ကျွန်တော်တို့က NCA လက်မှတ်ရေးထိုးခဲ့တဲ့ ခေါင်းဆောင်တွေ၊ သက်ရှိထင်ရှားရှိနေတဲ့ခေါင်းဆောင်တွေအားလုံးကို ဖိတ်ဖို့ စဉ်းစားချက်တွေလည်း ရှိတယ်။ NCA လက်မှတ်ရေးထိုးတဲ့အချိန်တုန်းက အသိသက်သေအနေနဲ့ ပါဝင်ခဲ့တဲ့ နိုင်ငံတကာခေါင်း ဆောင်တွေကိုလည်း ကျွန်တော်တို့က ဖိတ်ချင်တဲ့ စဉ်းစားချက်တွေလည်း ရှိပါတယ်”ဟု ဗိုလ်မှူးကြီးစောကျော်ညွန့်က ပြောသည်။

၎င်းကဲ့သို့ ဖိတ်ကြားကာ NCA (၈)နှစ်ပြည့်အခမ်းအနားကို ကျင်းပရန် ညှိနှိုင်းနေသော်လည်း မည်မျှအကျိုးသက်ရောက်မှုရှိမည်ကို မသိရှိနိုင်သေးကြောင်းလည်း ဗိုလ်မှူးကြီးစောကျော်ညွန့်က ထပ်မံပြောသည်။

“သို့သော်လည်းပဲ ဒါတွေက ဘယ်လောက်ပြုလုပ်နိုင်မလဲဆိုတာတော့ နှစ်ဖက်ညှိနှိုင်းဆွေးနွေးမှုအပေါ်မှာပဲ မူတည်မှာဖြစ်ပါတယ်။ အဓိကတော့ အစဉ်အလာမပြတ်ကျင်းပနေတဲ့ ဒီ NCA လက်မှတ်ရေးထိုးခြင်းအခမ်းအနားကို လာမယ့် အောက်တိုဘာလ ၁၅ ရက်မှာ နိုင်ငံရေးအနှစ်သာရရှိရှိ ကျင်းပနိုင်ဖို့ လောလောဆယ်ကတော့ နှစ်ဖက်ညှိနှိုင်းဆွေးနွေးမှုတွေ လုပ်နေပါတယ်” ဟု ၎င်းက ပြောသည်။

၂၀၂၁ ခုနှစ် ဖေဖော်ဝါရီလမှစ၍ တပ်မတော်က နိုင်ငံတော်အာဏာရယူခဲ့ပြီးနောက်ပိုင်းတွင် NCA အရ နိုင်ငံရေးဆွေးနွေးပွဲများကို ထိထိရောက်ရောက်ကျင်းပနိုင်ခြင်းမရှိကြောင်း ဝေဖန်သုံးသပ်မှုများလည်း ရှိနေသည်။

မကြာခင်ကျင်းပမည့် NCA (၈)နှစ်ပြည့်အခမ်းအနားကို အဓိပ္ပာယ်ရှိရှိ အနှစ်သာရပြည့်ဝစွာဖြင့် စည်ကားသိုက်မြိုက်စွာကျင်းပပြုလုပ်ရန် စီစဉ်ဆောင်ရွက်နေကြောင်း နစကဘက်က ထုတ်ဖော်အသိပေးထား သည်။

သမ္မတဦးသိန်းစိန်အစိုးရလက်ထက် ၂၀၁၅ ခုနှစ်တွင် NCA စာချုပ်ကို တိုင်းရင်းသားလက်နက်ကိုင်အဖွဲ့များဖြစ်သည့် KNU၊ CNF၊ ABSDF၊ DKBA၊ PNLO၊ ALP၊ KNU/KNLA-PC နှင့် RCSS တို့ (၈)ဖွဲ့က လက် မှတ်ရေးထိုးခဲ့ကြသည်။

ထို့ပြင် ၂၀၁၈ ခုနှစ် NLD အစိုးရလက်ထက်တွင် တိုင်းရင်းသားလက်နက်ကိုင်အဖွဲ့အစည်း(၂)ခုဖြစ်သော LDU နှင့် NMSP တို့က ထပ်မံလက်မှတ်ရေးထိုးခဲ့ပြီး NCA လက်မှတ်ရေးထိုးထားသောအဖွဲ့မှာ စုစုပေါင်း (၁၀)ဖွဲ့ရှိခဲ့သည်။

ထိုသို့ NCA ရေးထိုးထားသော (၁၀)ဖွဲ့အနက် KNU၊ CNF နှင့် ABSDF တို့သည် လက်ရှိ နစက၏ တပ်မ တော်လုံခြုံရေးအဖွဲ့များနှင့် တိုက်ပွဲများ ဖြစ်ပွားလျက်ရှိနေသည်ကို တွေ့ရှိရသည်။