ယွန်း (NSS) - စက်တင်ဘာ ၂၅

မြန်မာ- တရုတ်နှစ်နိုင်ငံရှိ နိုင်ငံသားများကို နိုင်ငံကူးလက်မှတ်ဖြင့် နယ်စပ်ဂိတ်ဖြတ်သန်းခွင့် မကြာမီခွင့်ပြုပေးသွားမည်ဖြစ်ကြောင်း ပြည်‌ထောင်စုဝန်ကြီးက အသိပေးပြောကြားထား သည်။

လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးမြင့်ကြိုင်က စက်တင်ဘာလ(၂၄)ရက်တွင် မူဆယ်မြိုရှိ ရွှေနန်းတော်ဂိတ်အစည်းအဝေးခန်းမ၌ ကျင်းပခဲ့သည့် ဆွေးနွေးပွဲတွင် အထက်ပါကဲ့သို့ ပြောကြားခဲ့ခြင်းဖြစ်သည်။

မြန်မာ- တရုတ်နှစ်နိုင်ငံရှိ နယ်စပ်နေပြည်သူများကို နယ်စပ်ဖြတ်သန်းခွင့်လက်မှတ်(BP) ဖြင့် ဖြတ်သန်းခွင့်ပြုခဲ့ရာမှ စက်တင်ဘာလ(၄)ရက်တွင် နိုင်ငံတွင်း ဒေသအသီးသီးမှ ပြည်သူများအတွက် ယာယီနယ်စပ်ဖြတ်သန်းခွင့်လက်မှတ်(TBP) ဖြင့်ပါ ထပ်မံခွင့်ပြုပေးထားကြောင်း သိရသည်။ 

အဆိုပါ TBP ဖြင့် ဖြတ်သန်းသွားလာခွင့်ပြုခဲ့ပြီးနောက်တွင် နယ်စပ်ဂိတ်များမှ ပြည်သူများဝင်ထွက်မှု ပိုမိုများပြားလာခဲ့ကြောင်း ပြည်ထောင်စုဝန်ကြီးက ပြောသည်။

ထို့ပြင် မကြာမီကာလ၌ မြန်မာ- တရုတ် နှစ်နိုင်ငံနိုင်ငံသားများကို နိုင်ငံကူးလက်မှတ် (Passport) ဖြင့်ပါ ဝင်ထွက်သွားလာနိုင်ရေးကို ဆောင်ရွက်နေပြီး လုပ်ငန်းများ အဆင်ပြေရေးအတွက် ကြိုတင်ပြင်ဆင်ထားရန် ၎င်းက ဆက်လက်ပြောကြားထားသည်။

လုပ်ငန်များ အောင်မြင်ရေးအတွက် ဌာနဆိုင်ရာအချင်းချင်း ညှိနှိုင်းပေါင်းစပ်ဆောင်ရွက်ကြရန် နှင့် အခက်အခဲများရှိပါက အချိန်နှင့်တစ်ပြေးညီတင်ပြရန် ပြည်ထောင်စုဝန်ကြီးက အသိပေးပြောကြားခဲ့သည်။

"နိုင်ငံကူးလက်မှတ်နဲ့ခွင့်ပြုမယ်ဆိုတာ နောက်လထဲမှာစမယ်ဆိုတာ သေချာတယ်။ ဒါပေမယ့်အလည်အပတ်လား အလုပ်အကိုင်အတွက်ရော ခွင့်ပြုမလား ပြီးရင် တယ်ဟုန်းပြည်နယ်ခွဲကိုပဲခွင့်ပြုမလား၊ ယူနန်တစ်ပြည်လုံးကို ခွင့်ပြုမလား ရှန်ဟိုင်းအထိကို သွားခွင့်ပြုမလားဆိုတာတော့ မသိသေးဘူး။  အဲဒီလိုမျိုးခွင့်ပြုခဲ့မယ်ဆိုရင် ကျွန်တော်တို့ဒေသခံတွေအတွက် အဆင်မပြေဘူး။ ဘာလို့လဲဆိုရင် အခုကျွန်တော့်ဆီမှာ(BP)ရှိတယ်။ BP နဲ့သွားမယ်ဆိုရင် လုပ်ထုံးလုပ်နည်းတွေနားလည်တယ်လေ Passport နဲ့ဆိုရင် ဗီဇာဆိုတာလိုဦးမယ် မူဆယ်မှာလုပ်လို့လည်းမရဘူး။ အဆင့်ဆင့်တွေရှိလာမယ်ဆိုတော့ ကျွန်တော်တို့လိုဒေသခံတွေအတွက်တော့ အဆင်မပြေဘူးပေါ့။ ကောင်းကျိုးဆိုးကျိုးလေးတွေဆိုတာတော့ ရှိတာပေါ့"ဟု မူဆယ်မြို့ရှိ ဒေသခံလူမှုကူညီရေးအသင်းမှ တာဝန်ရှိသူတစ်ဦးက NSS ကို ပြောသည်။

ရှမ်းပြည်နယ်၊ မူဆယ်မြို့မှတစ်ဆင့် တရုတ်နိုင်ငံဘက်သို့ (၇)ရက်တာ သွားရောက်လည် ပတ်နေထိုင်ခွင့်ရရှိမည့် တစ်ခါသုံးကတ်(TBP)များကို ပြီးခဲ့သည့် စက်တင်ဘာလ(၄)ရက်မှစ၍ ပြန်လည်ထုတ်ပေးနေပြီး လူဦးရေပေါင်း(၁၀၀၀၀)ကျော်ကို ခွင့်ပြုထုတ်ပေးထားကြောင်း သိရသည်။