ဂျန်ဇက် (NSS) - စက်တင်ဘာ ၂၄ 

တောင်တရုတ်ပင်လယ်မှာ ပိုင်နက်နယ်မြေအငြင်းပွားမှုတွေနဲ့ပတ်သက်ပြီး တရုတ်နဲ့ ဗီယက်နမ်နိုင်ငံကြား အငြင်းပွားမှုတွေ၊ တင်းမာမှုတွေရှိနေချိန်မှာပဲ အမေရိကန်အစိုးရဟာ ဗီယက်နမ်နိုင်ငံကို စစ်လက်နက်ပစ္စည်းများ ရောင်းချပေးဖို့ ဆွေးနွေးခဲ့ကြောင်း သိရပါတယ်။

အမေရိကန်အစိုးရ နဲ့ ဗီယက်နမ်အစိုးရတာဝန်ရှိသူတွေဟာ စစ်အေးခေတ်ကာလနောက်ပိုင်း နှစ်နိုင်ငံသမိုင်းမှာ အကြီးမားဆုံးစစ်လက်နက်ပစ္စည်းရောင်းချမှု သဘောတူညီချက် ရရှိအောင်ဆွေးနွေးခဲ့ကြောင်း သိရပါတယ်။

အဆိုပါ စစ်လက်နက်ပစ္စည်းရောင်းချမှုဟာ အမေရိကန် နဲ့ ဗီယက်နမ်နိုင်ငံကြား မိတ်ဖက်ဆောင်ရွက်မှု နောက်ထပ် အဆင့်တစ်ဆင့်ကို ထပ်မံရောက်ရှိသွားဖွယ်ရှိနေကြောင်း သိရပါတယ်။ အမေရိကန်ဟာ ဗီယက်နမ်နိုင်ငံကို အက်ဖ် ၁၆ တိုက်လေယာဉ်များ ရောင်းချပေးဖို့ အဆိုပြုကမ်းလှမ်းခြင်းမျိုးဖြစ်ဖွယ်ရှိနေကြောင်း သိရပါတယ်။ 

အမေရိကန် နဲ့ ဗီယက်နမ်တို့ဟာ စစ်လက်နက်ပစ္စည်းအရောင်းအဝယ်နဲ့ပတ်သက်ပြီး လက်ရှိအချိန်မှာ အသေးစိတ် ဖော်ပြခြင်းမျိုးမရှိသေးသလို တိကျတဲ့သဘောတူညီချက်မျိုးလည်း မရသေးကြောင်း သတင်းတွေက ဆိုပါတယ်။ အမေရိကန်ဟာ ဗီယက်နမ်နိုင်ငံကို ရုရှားနိုင်ငံထုတ် စစ်လက်နက်ပစ္စည်းများ မှီခိုနေရခြင်းက ဝေးကွာစေဖို့ နဲ့ စစ်လက်နက်ပစ္စည်း ဝယ်ယူခြင်းကြောင့် အကြွေးထောက်ချောက်ထဲရောက်ရှိနေခြင်းကို ကူညီပေးနိုင်ဖို့ စဉ်းစားနေကြောင်း သိရပါတယ်။ 

အမေရိကန်အစိုးရတာဝန်ရှိသူတစ်ဦးက "ဗီယက်နမ်နိုင်ငံ နဲ့ လုံခြုံရေးကဏ္ဍဆက်ဆံရေး ကတိတွေကိုအကောင် အထည်ဖော်ဖို့ နဲ့ ဗီယက်နမ်နိုင်ငံမှာ အမေရိကန်လက်နက်စနစ်အချို့ ကူညီပေးဖို့ စိတ်ဝင်စားနေတာပါ" လို့ ပြောပါတယ်။ ဗီယက်နမ်နိုင်ငံဟာ အမေရိကန်နိုင်ငံ နဲ့ ကြီးမားတဲ့ လက်နက်အရောင်းအဝယ်စာချုပ်ချုပ်ဆိုဖြစ်ခဲ့မယ်ဆိုရင် တရုတ်နိုင်ငံရဲ့ စိတ်ဆိုးဒေါသဖြစ်မှုတွေကို ရင်ဆိုင်ရဖွယ်ရှိနေကြောင်း သိရပါတယ်။

ဗီယက်နမ်နိုင်ငံဟာ ရေကြောင်းကာကွယ်ရေးကို လက်ရှိထက် ပိုမိုကောင်းမွန်အောင်လုပ်ဆောင်ဖို့ ပစ်မှတ်ထားနေကြောင်း သိရပါတယ်။ အမေရိကန်ဟာ ဗီယက်နမ်နိုင်ငံအပေါ်ချမှတ်ထားတဲ့ စစ်လက်နက်ပစ္စည်းတင်ပို့မှုကန့်သတ်ချက်တွေကို ၂ဝ၁၆ ခုနှစ်မှာ ဖြေလျော့ပေးခဲ့ပြီးနောက် စစ်လက်နက်ပစ္စည်းတွေ တင်ပို့ခဲ့ကြောင်း သိရပါတယ်။ 

ဗီယက်နမ်နိုင်ငံဟာ တစ်နှစ်ကို အမေရိကန်ဒေါ်လာ ၂ ဘီလျံတန်ဖိုးရှိ စစ်လက်နက်ပစ္စည်းများ ဝယ်ယူလျက်ရှိနေပြီး နိုင်ငံအတွင်းရှိ စစ်လက်နက်ပစ္စည်းများရဲ့ ၈ဝ ရာခိုင်နှုန်းက ရုရှားနိုင်ငံထုတ်လက်နက်များဖြစ်ကြောင်း သိရပါတယ်။