Pika (NSS) - စက်တင်ဘာ ၂၁ 

ယူကရိန်းသို့ cluster munitions များ ထောက်ပံ့ပေးမည့် ဆုံးဖြတ်ချက်ကို ပြန်လည်စဉ်းစားရန် အမေရိကန်နိုင်ငံကို  ကုလသမဂ္ဂအထူးကိုယ်စားလှယ်တစ်ဦးက တိုက်တွန်းခဲ့ကြောင်း သိရသည်။

အဆိုပါ cluster munitions များသည် ယူကရိန်းပဋိပက္ခပြီးဆုံးကာ နောက်ထပ်ဆယ်စုနှစ်ကြာသည့်အချိန်အထိ အရပ်သားများကို အန္တရာယ်ပေးနိုင်ကြောင်း ၎င်းက ပြောကြားခဲ့သည်။

ကုလသမဂ္ဂအထူးကိုယ်စားလှယ် Alice Jill Edwards က "cluster munitions တွေဟာ အသုံးပြုနေစဉ်အချိန်မှာကော ပဋိပက္ခပြီးဆုံးသွားတဲ့အချိန်တို့မှာကော အရပ်သားတွေကို ထိခိုက်စေနိုင်ပါသေး တယ်။ ဒါကြောင့် ယူကရိန်းပဋိပက္ခအတွင်းမှာ  cluster munitions တွေကို အသုံးမပြုသင့်ပါဘူး။ ယူကရိန်းကို  cluster munitions တွေ ထောက်ပံ့ပေးမယ့် ဆုံးဖြတ်ချက်ကို ပြန်လည်စဉ်းစားဖို့နဲ့ အဲဒီဆုံးဖြတ်ချက်ကို အကောင် အထည်ဖော်ဖို့အတွက် စီစဉ်နေတာတွေ အားလုံးကိုရပ်တန့်ဖို့ အမေရိကန်အစိုးရကို ကျွန်မတိုက်တွန်းလိုပါတယ်" ဟု ပြောခဲ့သည်။

အမေရိကန်အစိုးရသည် ယူကရိန်းသို့  cluster munitions များ နှင့် တာဝေးပစ်ဒုံးကျည်များ ထောက်ပံ့ပေးရန် အတွက် အတည်ပြုချက််ရရှိရန် နီးစပ်နေပြီဖြစ်ကြောင်း အမေရိကန်တာဝန်ရှိသူတစ်ဦး က ပြောကြားခဲ့ပြီးနောက် Alice Jill Edwards က ယခုကဲ့သို့ တိုက်တွန်းခဲ့ခြင်းဖြစ်သည်။

cluster munitions များ အသုံးပြုမှုကို နိုင်ငံပေါင်း(၁ဝဝ)ကျော်တွင် တားမြစ်ပိတ်ပင်ထားကြောင်းလည်း သိရသည်။ သို့သော်လည်း ရုရှား နှင့် အမေရိကန်တို့သည် cluster munitions များ ထုတ်လုပ်ခွင့်၊ သိုလှောင်ခွင့် နှင့် လွှဲပြောင်းပေးခြင်းတို့အား တားမြစ်သည့်စာချုပ်ကို လက်မှတ်ရေးထိုးခဲ့ခြင်းမျိုး မရှိကြောင်း သိရသည်။

Alice Jill Edwards က "အရပ်ဘက်နေရာတွေကို တိုက်ခိုက်မှုတွေမှာ အမျိုးသမီးတွေ၊ ကလေးငယ်တွေ နဲ့ သက်ကြီးရွယ်အိုတွေက သေနိုင်ချေအများဆုံးဖြစ်နေပါတယ်။ မပေါက်ကွဲဘဲ ကျန်ရှိနေခဲ့တဲ့ cluster munitions တွေဟာ နောက်ထပ်ဆယ်စုနှစ်တွေအထိ အရပ်သားတွေရဲ့အသက်အန္တရာယ်ကို ခြိမ်းခြောက်နိုင်ပါတယ်" ဟု ပြောဆိုခဲ့သည်။