ယွန်း (NSS) - စက်တင်ဘာ ၂၁

United Nations Women's Guild of Vienna ၏ မိခင်နှင့်ကလေးသူငယ်များအား ထောက်ပံ့ကူညီပေးရေး ရန်ပုံငွေအတွက် ဈေးရောင်းပွဲတော်တွင် မြန်မာအမြဲတမ်းကိုယ်စားလှယ်အဖွဲ့ရုံးပါဝင်ခဲ့ကြောင်း နိုင်ငံခြားရေးဝန်ကြီးဌာနမှ ထုတ်ပြန်ထားသည်။

"မိခင် နှင့် ကလေးသူငယ်များအား ထောက်ပံ့ကူညီပေးရေးရန်ပုံငွေအတွက် နေ့လယ်စာ ဈေးရောင်းပွဲတော်"ကို United Nations Women's Guild of Vienna (UNWG) က ကြီးမှူး၍ စက်တင်ဘာလ(၂၀)ရက်တွင် Vienna International Centre ၌ ကျင်းပခဲ့ခြင်းဖြစ်သည်။

အဆိုပါဈေးရောင်းပွဲတော်တွင် ဩစတြီးယားနိုင်ငံ၊ ဗီယင်နာမြို့အခြေစိုက် မြန်မာအမြဲတမ်းကိုယ်စားလှယ်အဖွဲ့ရုံးမှ မြန်မာအစားအစာများကို ပါဝင်ရောင်းချ လှူဒါန်းပေးခဲ့ကြောင်း သိရသည်။

ဈေးရောင်းပွဲတော်တွင် မြန်မာအမြဲတမ်းကိုယ်စားလှယ်အဖွဲ့ရုံးနှင့်အတူ သြစတြီးယား၊ အမေရိကန်၊ သြစတြေးလျ၊ အာမေးနီးယားအပါအဝင် နိုင်ငံပေါင်း(၃၅)နိုင်ငံမှ အဖွဲ့ရုံးများ ပါဝင်ခဲ့ကြောင်း သိရသည်။

United Nations Women's Guild of Vienna သည် ၁၉၆၇ ခုနှစ်တွင် တည်ထောင်ခဲ့သော ပရဟိတအဖွဲ့အစည်းတစ်ခုဖြစ်ပြီး ကမ္ဘာတစ်ဝှမ်းတွင် အကူအညီလိုအပ်နေသော မိခင်နှင့်ကလေးသူငယ်များအား ထောက်ပံ့ကူညီပေးရန်ဖြစ်ကြောင်း သိရသည်။

လက်ရှိတွင် အဖွဲ့အစည်း၌ နိုင်ငံပေါင်း (၁၀၀)ကျော်မှ အဖွဲ့ဝင်(၅၀၀)ခန့်ပါဝင်ကြောင်း နိုင်ငံခြားရေးဝန်ကြီးဌာနမှအသိပေးထားသည်။

UNWG အဖွဲ့ဝင်များသည် ကုလသမဂ္ဂနှင့် နိုင်ငံတကာအဖွဲ့အစည်းများနှင့် အမြဲတမ်းကိုယ်စားလှယ်အဖွဲ့ရုံးများမှ အမျိုးသမီးဝန်ထမ်းနှင့် ဇနီးများဖြစ်ကြပြီး အခကြေးငွေမယူဘဲ စေတနာ့ဝန်ထမ်းလုပ်ငန်းများကို ပူးပေါင်းဆောင်ရွက်လျက်ရှိကြောင်း သိရသည်။