NSS - စက်တင်ဘာ ၂၀

နိုင်ငံခြားသုံးငွေကြီးကြပ်မှုကော်မတီဥက္ကဋ္ဌ ဒုတိယဗိုလ်ချုပ်ကြီးမိုးမြင့်ထွန်း၏နေရာတွင် ဗိုလ်ချုပ်ကြီးမြထွန်းဦးအား အစားထိုးကာ နစကမှပြန်လည်ပြင်ဆင်ဖွဲ့စည်းခဲ့ကြောင်း သတင်းရရှိသည်။

၎င်းကဲ့သို့ နိုင်ငံခြားသုံးငွေကြီးကြပ်မှုကော်မတီအား ပြင်ဆင်ဖွဲ့စည်းခြင်းကို ပြီးခဲ့သည့် ရက်ပိုင်းအတွင်းက ပြုလုပ်ခဲ့ခြင်းဖြစ်ကြောင်း နစက၏သတင်းအချက်အလက်များအရ သိရသည်။

စီးပွားရေးဖွံ့ဖြိုးတိုးတက်မှုအတွက် နိုင်ငံခြားငွေလဲလှယ်နှုန်းတည်ငြိမ်စေရေးနှင့် နိုင်ငံခြားငွေအား ထိရောက်စွာအသုံးပြုနိုင်ရေးအတွက် လိုအပ်သောလုပ်ငန်းတာဝန်များကို အကောင်အထည်ဖော်နိုင်ရန် ယင်းကော်မတီကို နစကမှ ဖွဲ့စည်းထားခြင်းဖြစ်သည်။

နိုင်ငံခြားသုံးငွေကြီးကြပ်မှုကော်မတီကို ပြီးခဲ့သည့် ၂၀၂၂ ခုနှစ်၊ ဧပြီလတွင် နစကမှ စတင်ဖွဲ့စည်းခဲ့ပြီး ဒုတိယဗိုလ်ချုပ်ကြီး မိုးမြင့်ထွန်းက ဥက္ကဋ္ဌအဖြစ် တာဝန်ယူကာ ဝန်ကြီးဦးဝင်းရှိန်၊ ဝန်ကြီးဒေါက်တာပွင့်ဆန်း၊ ဒေါက်တာကံဇော်၊ ဦးသန်းညိန်း၊ ဦးအောင်နိုင်ဦးတို့ဖြင့် ဖွဲ့စည်းခဲ့ခြင်းဖြစ်သည်။

ထို့နောက် ယခု ၂၀၂၃ ခုနှစ် ဇူလိုင်လအတွင်း ၎င်းကော်မတီကို နစကမှ ပြန်လည်ပြင်ဆင်ဖွဲ့စည်းခဲ့ရာတွင် ကော်မတီဥက္ကဋ္ဌ အဖြစ် ဒုတိယဗိုလ်ချုပ်ကြီးမိုးမြင့်ထွန်းအား ဆက်လက်တာဝန်ပေးခဲ့ပြီး ဝန်ကြီးဦးဝင်းရှိန်၊ နစကဥက္ကဋ္ဌအကြံပေး ဒုတိယ ဗိုလ်ချုပ်ကြီးညိုစော၊ ဝန်ကြီးဦးအောင်နိုင်ဦး၊ ဗဟိုဘဏ်ဥက္ကဋ္ဌဒေါ်သန်းသန်းဆွေ၊ ဝန်ကြီးဒေါက်တာကံဇော်တို့ဖြင့် ဖွဲ့စည်းခဲ့သည်။

၎င်းကဲ့သို့ နိုင်ငံခြားသုံးငွေကြီးကြပ်မှုကော်မတီအား ပြင်ဆင်မှုအပြီး လပိုင်းအကြာ၌ပင် နိုင်ငံတော်စီမံအုပ်ချုပ်ရေးကောင်စီသည် ကော်မတီဥက္ကဋ္ဌနေရာအား အစားထိုးတာဝန်ပေးကာ ထပ်မံပြင်ဆင်လိုက်ခြင်းလည်းဖြစ်သည်။

လက်ရှိတွင် နိုင်ငံခြားသုံးငွေကြီးကြပ်မှုကော်မတီဥက္ကဋ္ဌအဖြစ် နိုင်ငံတော်ဒုဝန်ကြီးချုပ်၊ ပို့ဆောင်ရေးနှင့်ဆက်သွယ်ရေးဝန်ကြီး ဗိုလ်ချုပ်ကြီးမြထွန်းဦးက တာဝန်ယူဆောင်ရွက်သွားမည်ဖြစ်ပြီး ဦးဝင်းရှိန်၊ ဒုတိယဗိုလ်ချုပ်ကြီးညိုစော၊ ဦးအောင်နိုင်ဦး၊ ဒေါ်သန်းသန်းဆွေ၊ ဒေါက်တာကံဇော်တို့ဖြင့် ပူးပေါင်းဆောင်ရွက်မည်ဖြစ်ကြောင်း နစက၏ အချက်အလက်များအရ သိရသည်။

ဒုတိယဗိုလ်ချုပ်ကြီး မိုးမြင့်ထွန်းသည် နိုင်ငံသုံးငွေကြီးကြပ်မှုကော်မတီ ဥက္ကဋ္ဌအပြင် မြန်မာနိုင်ငံရင်းနှီးမြှုပ်နှံမှုကော်မရှင် (MIC) ဥက္ကဋ္ဌ၊ ကုန်သွယ်မှုနှင့် ကုန်စည်စီးဆင်းမှုများ မှန်ကန်မြန်ဆန်ရေးဗဟိုကော်မတီ ဥက္ကဋ္ဌအဖြစ် တာဝန်ယူဆောင်ရွက်ခဲ့သူတစ်ဦးဖြစ်သည်။

လက်ရှိတွင် နစကအနေဖြင့် အဆိုပါ ကော်မတီ၊ ကော်မရှင်များ၏ ဥက္ကဋ္ဌတာဝန်အား နိုင်ငံတော်ဒုဝန်ကြီးချုပ်၊ ပို့ ဆောင်ရေးနှင့်ဆက်သွယ်ရေးဝန်ကြီး ဗိုလ်ချုပ်ကြီးမြထွန်းဦးကို ယခုရက်ပိုင်းအတွင်း တာဝန်ပေးအပ်လိုက်ကြောင်း နစက၏ သတင်းအချက်အလက်များအရ သိရသည်။ 

နိုင်ငံခြားသုံးငွေကြီးကြပ်မှုကော်မတီဥက္ကဋ္ဌဟောင်း ဒုတိယဗိုလ်ချုပ်ကြီးမိုးမြင့်ထွန်းသည် ဗိုလ်ချုပ်မှူးကြီးမင်းအောင်လှိုင်၏ ယုံကြည်စိတ်ချရဆုံးသူတစ်ဦးအဖြစ် လူသိများပြီး လက်ရှိတွင် ၎င်းအား တာဝန်ရှိသူများက ခေါ်ယူစစ်ဆေးမေးမြန်းမှုများ ပြုလုပ်လျက်ရှိကြောင်း သိရသည်။

လတ်တလောကာလအတွင်း၌ နစကဘက်မှ တာဝန်ရှိသူများသည် ဒုတိယဗိုလ်ချုပ်ကြီးမိုးမြင့်ထွန်း၊ ဗိုလ်ချုပ်ရန်နောင်စိုးအပါအဝင် အခြားသောတာဝန်ရှိသူများနှင့် လုပ်ငန်းရှင်များကို ခေါ်ယူစစ်ဆေးမေးမြန်းမှုများ ပြုလုပ်လျက်ရှိကြောင်း ကြားသိရသည်။