မျိုးကြီး (NSS) - စက်တင်ဘာ ၂၀

လယ်ယာမြေပေါ်၌ ခွင့်ပြုချက်မရရှိဘဲ အသုံးပြုထားမှုများနှင့်ပတ်သက်၍ အချိန်ကာလ (၂)ပိုင်းသတ်မှတ်ကာ ခွဲခြားစိစစ်သွားမည်ဖြစ်ကြောင်း နစက၏သတင်းအချက်အလက်များအရ သိရသည်။

လက်ရှိတွင် လယ်ယာမြေကို အခြားနည်းသုံးစွဲထားမှုများ ဖြေရှင်းဆောင်ရွက်မည့်နည်းလမ်းနှင့် ထပ်မံမဖြစ်ပွားစေရေးအတွက် ဆောင်ရွက်မည့်နည်းလမ်းများ လုပ်ထုံးလုပ်နည်းစံနှုန်းရေးဆွဲပြုစုရေးဦးစီးကော်မတီကို နစကမှ ဖွဲ့စည်းထားသည်။

၎င်းဦးစီးကော်မတီတွင် ဥက္ကဋ္ဌအဖြစ် စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးအား နစကမှ တာဝန်ပေးအပ်ထားပြီး သက်ဆိုင်ရာဝန်ကြီးဌာနများမှ ဒုဝန်ကြီးများ၊ ဒုမြို့တော်ဝန်များဖြင့် ဦးစီးကော်မတီကို ဖွဲ့စည်းထားခြင်းဖြစ်သည်။

လယ်ယာမြေပေါ်၌ ခွင့်ပြုချက်မရရှိမီ အခြားနည်းစတင်ကျူးလွန်အသုံးပြုထားခဲ့သည့် ရက်သည် ၂၀၁၂ ခုနှစ်၊ သြဂုတ်လ ၃၁ ရက်ကာလမတိုင်မီနှင့် ၎င်းနောက်ပိုင်းကာလဟူ၍ ခွဲခြားစိစစ်အတည်ပြုကာ နစကထံသို့ တင်ပြရမည်ဟု ဦးစီးကော်မတီကို တာဝန်ပေးထားသည်။

ထို့ပြင် လယ်ယာမြေများကို ဥပဒေနှင့်ညီညွတ်မှုမရှိဘဲ အခြားနည်းဖြင့် ကျူးလွန်အသုံးပြုမှုများတွင် စီးပွားရေးလုပ် ငန်းများအတွက် အသုံးပြုမှုများနှင့်စပ်လျဉ်း၍ ဆောင်ရွက်သင့်သည့် နည်းလမ်းများကိုလည်း ဦးစီးကော်မတီအနေဖြင့် နစကထံ အဆိုပြုတင်ပြရမည်ဟု တာဝန်ပေးထားသည်။

အလားတူ လယ်ယာမြေဥပဒေပုဒ်မ ၁၉(က)အရ ဒဏ်ကြေးသတ်မှတ်မည်ဆိုပါက သတ်မှတ်သင့်သည့် တွက်ချက်မှုနည်းလမ်းများကိုလည်း အတည်ပြုပေးရမည်ဟု တာဝန်ပေးထားသည်။

လယ်ယာမြေပေါ်၌ ကျူးလွန်အသုံးပြုထားသော အဆောက်အဦးအား ဖျက်သိမ်းလိုက်ပါက စိုက်ပျိုးနိုင်သော လယ် ယာမြေအဖြစ် ပြန်လည်ရောက်ရှိနိုင်ခြင်း ရှိ၊ မရှိကိုလည်း သုံးသပ်တင်ပြပေးရမည်ဖြစ်ကြောင်း သိရသည်။

၎င်းလုပ်ငန်းများကို အကောင်အထည်ဖော်ရန်အတွက် လက်ရှိတွင် ပြည်ထောင်စုအဆင့်လုပ်ငန်းကော်မတီ၊ တိုင်းနှင့်ပြည်နယ်အဆင့် လုပ်ငန်းကော်မတီများကိုလည်း ဆက်လက်ဖွဲ့စည်းထားကြောင်း သိရသည်။

နိုင်ငံအတွင်း၌ လယ်ယာမြေများပေါ်တွင် ခွင့်ပြုချက်မရှိဘဲ အဆောက်အဦးဆောက်လုပ်သည်ဟုဆိုကာ ဖျက်သိမ်းခံခဲ့ရသည့် လူနေအိမ်အဆောက်အဦးများစွာ ရှိခဲ့ကြောင်း သိရသည်။

ထို့ပြင် လယ်ယာမြေများပေါ်၌ အဆောက်အဦးဆောက်လုပ်ထားသည့် လူနေအိမ်များကိုလည်း ဖျက်သိမ်းမည်ဖြစ် ကြောင်း အကြောင်းကြားစာပေးပို့ခဲ့ပြီး နေအိမ်အများအပြားရှိခဲ့ခြင်းကြောင့် လက်ရှိတွင် ဖျက်သိမ်းခြင်းမပြုလုပ်တော့ဘဲ သက်ဆိုင်ရာအဖွဲ့အစည်းများက စိစစ်နေသည့် ဆောင်ရွက်မှုလည်းရှိနေကြောင်း သိရသည်။