Pika (NSS) - စက်တင်ဘာ ၁၉ 

မြောက်ကိုရီးယားသည် ၎င်း၏ နိုင်ငံနယ်စပ်များကို လေးနှစ်ကြာ ပိတ်ထားခဲ့ပြီးနောက် နောက်ဆုံးတွင် မြောက်ကိုရီးယားအမျိုးသား ဘောလုံးအသင်းသည် နိုင်ငံတကာပွဲများကို ပထမဆုံးအကြိမ် ပြန်လည်ကစားမည်ဖြစ်ကြောင်း သိရသည်။ 

မြောက်ကိုရီးယားအမျိုးသားဘောလုံးအသင်းသည် ၂ဝ၂၂ ခုနှစ် ကမ္ဘာ့ဖလားပြိုင်ပွဲအတွက် ၂ဝ၁၉ ခုနှစ်ကုန်တွင် ကစားခဲ့သော လက်ဘနွန်အသင်းနှင့် သရေကျခဲ့သည့်အာရှခြေစစ်ပွဲပြီးတည်းက လက်ရှိအချိန်ထိ ယှဉ်ပြိုင်ကစားခဲ့ခြင်းမျိုးမရှိခဲ့ကြောင်း သိရသည်။ 

၂ဝ၁၈ ခုနှစ် Asian Games များပြီးကတည်းက မြောက်ကိုရီးယားသည် နိုင်ငံတကာ အားကစားပြိုင်ပွဲများတွင် ပါဝင်ယှဉ်ပြိုင်ခဲ့ခြင်းမျိုုးမရှိခဲ့သည့်အပြင် ၂ဝ၂ဝ ခုနှစ် တိုကျိုအိုလံပစ်၊ ၂ဝ၂၂ ခုနှစ် ပေကျင်းအိုလံပစ်နှင့် ၂ဝ၂၂ ခုနှစ် ကမ္ဘာ့ဖလားပြိုင်ပွဲများတွင် ပါဝင်ကစားခဲ့ခြင်းမျိုးမရှိခဲ့ကြောင်း သိရသည်။

သို့သော်လည်း လက်ရှိအချိန်တွင် မြောက်ကိုရီးယားမှ အားကစားသမားများသည် တရုတ်နိုင်ငံ Hangzhou မြို့တွင် ကျင်းပမည့် Asian Games ပြိုင်ပွဲများတွင်  ဂျူဒို၊ ဘောလုံးနှင့် ဘော်လီဘောကစားရန် စာရင်းသွင်းထားပြီးဖြစ်ကြောင်း သိရသည်။ 

Asian Games ပြိုင်ပွဲများတွင်  မြောက်ကိုရီးယားက အကောင်းဆုံးစွမ်းဆောင်ပြနိုင်သည့် အားကစားမှာ ဘောလုံးအားကစားဖြစ်ကြောင်းလည်း သိရသည်။ 

ကိုဗစ်(၁၉)ကပ်ရောဂါကြောင့် တစ်နှစ်ရွှေ့ဆိုင်းခဲ့ရပြီးနောက် Asian Games ပြိုင်ပွဲများကို တရုတ်နိုင်ငံ Hangzhou မြို့တွင် စက်တင်ဘာလ(၂၃)ရက်မှ အောက်တိုဘာလ(၈)ရက်အထိ ကျင်းပသွားမည်ဖြစ်ကြောင်းလည်း သိရသည်။