Pika (NSS) - စက်တင်ဘာ ၁၉ 

ချက်ပြည်သူ့သမ္မတနိုင်ငံတွင် non-parliamentary PRO ပါတီ ထောက်ခံသူထောင်ပေါင်းများစွာသည် အနောက်အုပ်စုလိုလားသော အစိုးရကို ရာထူးမှနှုတ်ထွက်ရေး တောင်းဆိုရန်အတွက် Prague မြို့တွင် စုဝေးခဲ့ကြကြောင်း သိရသည်။

Prague မြို့ရှိ Wenceslas ရင်ပြင်တွင် ကျင်းပသော ဆန္ဒပြပွဲသို့ လူပေါင်း(၁ဝဝဝဝ) ခန့် တက်ရောက်ခဲ့ကြကြောင်း ဒေသတွင်းမီဒီယာများက ဖော်ပြခဲ့သည်။

သို့သော်လည်း အဆိုပါအစိုးရဆန့်ကျင်ရေးဆန္ဒပြပွဲများတွင် လူပေါင်း(၁)သိန်းခန့် ပါဝင်ခဲ့ကြောင်း PRO ပါတီက အခိုင်အမာပြောကြားခဲ့သည်။ ချက်ပြည်သူ့သမ္မတနိုင်ငံဝန်ကြီးချုပ် Petr Fiala ဦးဆောင်သော  လက်ရှိအာဏာရ (၅)ပါတီညွန့်ပေါင်းအဖွဲ့သည် ဘယ်လ်ဂျီယံနိုင်ငံ၏ အမိန့်များကို လိုက်နာနေကြောင်း PRO ပါတီခေါင်းဆောင် Jindrich Rajchl က ဝေဖန်ပြောဆိုခဲ့သည်။

ထို့အပြင် ချက်ပြည်သူ့သမ္မတနိုင်ငံ အစိုးရသည်အမေရိကန်နိုင်ငံနှင့် နီးကပ်သော ဆက်ဆံရေးများ ရှိစေရန်အတွက် ယူကရိန်းသို့ စစ်လက်နက်ပစ္စည်းများ ဆက်လက်ထောက်ပံ့နေခြင်းကိုလည်း Jindrich Rajchl က ပြစ်တင်ပြောဆိုခဲ့ကြောင်းသိရသည်။

၎င်းက "လက်ရှိအစိုးရဟာ နိုင်ငံခြားအာဏာရှင်တွေရဲ့အမိန့်တွေကို လိုက်နာနေတဲ့ ရုပ်သေးရုပ်တွေပါ။ ပြီးတော့ ရုပ်သေးရုပ်အစိုးရကို ကျွန်တော်လည်း ထပ်မလိုချင်တော့ပါဘူး၊၊ ချက်ပြည်သူ့သမ္မတနိုင်ငံ အစိုးရဟာ နေတိုးအဖွဲ့ကို ဝင်ရောက်ဖို့ ကြိုးပမ်းနေတဲ့ ယူကရိန်းရဲ့လုပ်ရပ်တွေကို   ဗီတိုအာဏာသုံးပြီး ဆန့်ကျင်သင့်ပါတယ်" ဟု ပြောခဲ့သည်။

ထို့အပြင် ဆန္ဒပြသူအချို့သည် အမေရိကန်ဦးဆောင်သော စစ်ဘက်ဆိုင်ရာအဖွဲ့ကို နိုင်ငံတွင်းမှ ထွက်ခွာသွားရန်လည်း တောင်းဆိုဆန္ဒပြခဲ့ကြကြောင်းသိရသည်။

ဆန္ဒပြသူများသည် လက်ရှိအစိုးရ၏ ငွေကြေးဖောင်းပွမှုကို ကိုင်တွယ်ဖြေရှင်းပုံ၊အခွန်အပြောင်းအလဲများ၊ ပင်စင်ဆိုင်ရာ ပြောင်းလဲချိန်ညှိမှုများ၊ မော်တော်ယာဉ်များတွင် ရုပ်ကြွင်းလောင်စာဆီများ အသုံးပြုမှုကို လျှော့ချရန် အစီအစဉ်များ နှင့် ဝန်ကြီးချုပ် Petr Fiala လက်ထက်က ချမှတ်ခဲ့သော ကိုဗစ်(၁၉)ဆိုင်ရာ ကန့်သတ်ချက်များကိုလည်း ကန့်ကွက်ဆန္ဒပြခဲ့ကြကြောင်း သိရသည်။

ချက်ပြည်သူ့သမ္မတနိုင်ငံသည် ရုရှား-ယူကရိန်းပဋိပက္ခစတင်ဖြစ်ပွားပြီးနောက်ပိုင်းတည်းက ယူကရိန်း၏ အနီးကပ်ဆုံးမဟာမိတ်နိုင်ငံတစ်ခုလည်းဖြစ်သည်။

ထို့အပြင် ပဋိပက္ခစတင်ဖြစ်ပွားခဲ့သည့် ၂ဝ၂၂ ခုနှစ် ဖေဖော်ဝါရီလနောက်ပိုင်းတည်းက ချက်ပြည်သူ့သမ္မတနိုင်ငံ အစိုးရသည် ယူကရိန်းသို့ တင့်ကားများ၊ဒုံးကျည်လောင်ချာများ၊ ရဟတ်ယာဉ်များ၊ အမြောက်ကျည်များ နှင့် အခြားစစ်ဘက်ဆိုင်ရာအကူအညီများစွာကို ထောက်ပံ့ပေးခဲ့ကြောင်း သိရသည်။

ပဋိပက္ခဖြစ်ပွားပြီးနောက်ပိုင်းကတည်းက ချက်ပြည်သူ့သမ္မတနိုင်ငံသည် ယူကရိန်းဒုက္ခသည်(၄၆ဝဝဝဝ) ခန့်ကို နိုင်ငံတွင်းတွင် လက်ခံခဲ့ပြီး လက်ရှိအချိန်တွင် ယူကရိန်းဒုက္ခသည်(၃)သိန်းခန့် ဆက်လက်နေထိုင်နေဆဲဖြစ်ကြောင်း ယခုနှစ်အစောပိုင်းတွင် ထုတ်ပြန်ခဲ့သော အစီရင်ခံစာများအရ သိရသည်။