ယွန်း (NP News) - ဖေဖော်ဝါရီ ၁၄

မာရဝိဇယဗုဒ္ဓရုပ်ပွားတော်မြတ်ကြီး၏ ဆင်းတုတော်အပိုင်း(၄)အား ရတနာပလ္လင်ထက်သို့ အောင်မြင်စွာပင့်ဆောင်ပြီးစီးခဲ့ကြောင်း သတင်းရရှိသည်။

နစကမှ ဖေဖော်ဝါရီလ(၁၃)ရက်နေ့ ညပိုင်းတွင် အထက်ပါကဲ့သို့ အသိပေးထုတ်ပြန်ထားခြင်းဖြစ်သည်။

စုစုပေါင်းအလေးချိန် (၁၇ဝဝ)တန်ရှိသည့် မာရဝိဇယရုပ်ပွားတော်မြတ်ကြီး၏ ဆင်းတုတော် အပိုင်း(၁/၂/၃)တို့အား ပြီးခဲ့သည့် ဇန်နဝါရီလ(၂၆)ရက်နေ့တွင် ရတနာပလ္လင်ထက်သို့ စတင်ပင့်ဆောင်ခဲ့ပြီး ဇန်နဝါရီ(၃၁)ရက်နေ့တွင် အောင်မြင်စွာပင့်ဆောင် ပူဇော်နိုင်ခဲ့ကြောင်း သိရသည်။

အလားတူ ဆင်းတုတော်ကြီးအပိုင်း(၄)အား ရတနာပလ္လင်ထက်သို့ ပင့်ဆောင်ရေးလုပ်ငန်းများအား ဖေဖော်ဝါရီ(၁၁)ရက်နေ့တွင် ထပ်မံဆောင်ရွက်ခဲ့ရာ ဖေဖော်ဝါရီ(၁၃)ရက်နေ့ နံနက်(၃)နာရီအချိန်ခန့်တွင် ပလ္လင်ထက်သို့ အောင်မြင်စွာပင့်ဆောင် ပူဇော်နိုင်ခဲ့ကြောင်း သိရသည်။

ထို့ပြင် မာရဝိဇယရုပ်ပွားတော်မြတ်ကြီးတည်ထားသည့် ဥယျာဉ်တော်အတွင်း၌ သာသနာရေးဆိုင်ရာ အခမ်းအနားများ ကျင်းပပြုလုပ်နိုင်မည့် သံဃာအပါး (၁၂၀၀) နှင့် လူပရိသတ်များ ဝင်ဆံ့နိုင်သည့် အဆောက်အဦးကိုလည်း ထည့်သွင်း တည်ဆောက်လျက်ရှိကြောင်း သိရသည်။

လက်ရှိတွင် ဆင်းတုတော်ကြီး၏ အလယ်‌ဗဟိုဌာနများ၌ ရွှေထည် ၁၃၆ဝ ကျပ်သား ၅ ဒသမ ၄ ရွေး အပါအဝင် ကျောက်မျက်ရတနာများပါဝင်သည့် ရွှေထည်ပစ္စည်း ၁၆၈၄ ကျပ်သား ၁၅ ပဲ ၁ ဒသမ ၆ ရွေး၊ ကျောက်မျက်ရတနာများ ပါသည့် ငွေထည်ပစ္စည်း ၁၂၆ ပဲ ၅ ဒသမ ၁ ရွေး၊ ကျောက်မျိုးစုံ၊ ပုလဲမျိုးစုံ နှင့် နိုင်ငံတကာမှ ငွေဒင်္ဂါးပြားများ၊ အဖိုးတန် ရွှေငွေ ကျောက်သံ ပတ္တမြားများကို ထပ်မံ ဌာပနာသွင်း လှူနိုင်ခဲ့ပြီးဖြစ်သည်။

ထို့ပြင် ဘုရားကြီးဘက်စုံအလှူငွေအဖြစ် ငွေကျပ်သိန်းပေါင်း (၈၁ဝဝ)ကျော်ကိုလည်း အလှူငွေလက်ခံရရှိထား ကြောင်း သိရသည်။