INGO/ NGO များ အနေဖြင့် မဖြစ်မနေ မှတ်ပုံတင်ရန် လိုအပ်ဟု ဒုတိယဗိုလ်ချုပ်ကြီးရာပြည့် ပြော
Pearl (NSS) - စက်တင်ဘာ ၁၅
INGO/NGO များ မဖြစ်မနေ မှတ်ပုံတင်ရန်လိုအပ်ကြောင်း ပြည်ထောင်စုမှတ်ပုံတင်ရေးအဖွဲ့ဥက္ကဋ္ဌ၊ ပြည်ထဲရေးဝန်ကြီး ဒုတိယဗိုလ်ချုပ်ကြီးရာပြည့်ကပြောသည်။
၎င်းက ယမန်နေ့ (စက်တင်ဘာလ ၁၄ရက်)၊ နံနက်ပိုင်းတွင် နေပြည်တော်ရှိ Hotel Max ၌ ကျင်းပသော NGO/ INGO များမှတ်ပုံတင်ခြင်းလုပ်ငန်းစဉ် လွယ်ကူချောမွေ့စေရေး အလုပ်ရုံဆွေးနွေးပွဲ၌ အထက်ပါကဲ့သို့ ထည့်သွင်းပြောဆိုခဲ့ခြင်းဖြစ်သည်။
အဆိုပါဆွေးနွေးပွဲ၌ ၎င်းက မိမိတို့နိုင်ငံသည် ဖွံ့ဖြိုးဆဲနိုင်ငံဖြစ်သည့်အတွက် ကျေးလက်ဒေသများ၊ နယ်စပ် ဒေသများ၊ ဝေးလံခေါင်သီသောဒေသများ၏ ဖွံ့ဖြိုးတိုးတက်ရေးလုပ်ငန်းများဆောင်ရွက်ရာတွင် အသင်းအဖွဲ့များ၏ အားကိုရယူရကြောင်း ဆိုထားသည်။
အသင်းအဖွဲ့များအနေဖြင့်လည်း ဥပဒေနှင့်အညီ အကူအညီပေးနိုင်ရန်အတွက် မှတ်ပုံတင်ရေးလုပ်ငန်းစဉ်ကို မဖြစ်မနေ ဆောင်ရွက်ရမည်ဖြစ်ပြီး မှတ်ပုံတင်လျှောက်ထားရာတွင် အစိုးရဌာနအဖွဲ့အစည်းများ၏ ထောက်ခံချက် များ ရယူရမည်ဖြစ်ကြောင်း ၎င်းမှ ဆက်လက်ပြောထားသည်။
မြန်မာနိုင်ငံရှိအသင်းအဖွဲ့များ၏ အကူအညီပေးရေးလုပ်ငန်းများဆောင်ရွက်မှုအပေါ် အကဲဖြတ်သတ်မှတ်သည့် အာရှ-ပစိဖိတ်ဒေသ ငွေကြေးခဝါချမှုတိုက်ဖျက်ရေးအဖွဲ့၏ နိုင်ငံအချင်းချင်းအပြန်အလှန် အကဲဖြတ်မှုအစီရင်ခံစာ အရ ပရဟိတအဖွဲ့အစည်းများသည် အကြမ်းဖက်မှုကို ငွေကြေးထောက်ပံ့ရာ၌ အသုံးချခံရနိုင်ခြေများသည့်အတွက် ငွေကြေးခဝါချမှုတိုက်ဖျက်ရေးဆိုင်ရာစံနှုန်းများကို လိုက်နာဆောင်ရွက်မှုအားနည်းသည်ဟု သတ်မှတ်ခံထားရကြောင်း သိရသည်။
ထို့ကြောင့် အကူအညီပေးနေသည့် အဖွဲ့အစည်း၊ နိုင်ငံများက INGO/ NGO များကို အသုံးချပြီး တရားမဝင် ကိစ္စရပ် များအတွက် ထောက်ပံ့မှုများမဖြစ်စေရန်လိုအပ်ပြီး INGO နှင့် NGO များအနေဖြင့် အကူအညီပေးရေးလုပ်ငန်းများ ဆောင်ရွက်ရာတွင် ဥပဒေနှင့်အညီ ဆောင်ရွက်ရမည်ဖြစ်ကြောင်း သိရသည်။
အလားတူ ပြီးခဲ့သည့် သြဂုတ်လ(၃ဝ)ရက်၌ နေပြည်တော်ရှိ နစကဥက္ကဋ္ဌရုံးတွင်ပြုလုပ်သော ပြည်ထောင်စုအစိုးရ အဖွဲ့အစည်းအဝေး၌ NGO၊ INGO များမှတစ်ဆင့် ပြည်ပအဖွဲ့အစည်း၊ နိုင်ငံများက အသုံးချနေမှုများရှိနေသည့် အတွက် ကြပ်မတ်ထိန်းသိမ်းရန် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က သတိပေးပြောဆိုထားသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ဆေးတက္ကသိုလ်နှင့် သွားဘက်ဆိုင်ရာဆေးတက္ကသိုလ်များ၏ ပထမအကြိမ် ဝင်ခွင့်လူတွေ့ နှုတ်မေးစာမေးပွဲကို မကြာခင်ကျင်းပမည်
RELATED POSTS
23 Oct 2024 | နိုင်ငံရေး,နိုင်ငံတကာ
19 Oct 2024 | နိုင်ငံရေး,နိုင်ငံတကာ