Pika (NSS) - စက်တင်ဘာ ၁၂ 

ပိုလန်နိုင်ငံသည် အမေရိကန်ကာကွယ်ရေးကုမ္ပဏီ Lockheed Martin Corp နှင့်ပူးပေါင်းကာ  နိုင်ငံအတွင်းတွင် High Mobility Artillery Rocket System (HIMARS) ဒုံးကျည်စနစ်(၄၈၆) ခုကို ၂ဝ၂၅ ခုနှစ်ကုန်တွင် စတင်ထုတ်လုပ်မည့်အစီအစဉ်ကို အတည်ပြုခဲ့ကြောင်း သိရသည်။ 

ပိုလန်ကာကွယ်ရေးဝန်ကြီး Mariusz Blaszczak က "ကျွန်တော်တို့ရဲ့ရည်မှန်းချက်မှာ ရန်သူတွေကို ဟန့်တားနိုင် မယ့် ပိုလန်စစ်တပ်ကို ဖန်တီးနိုင်ဖို့ပဲဖြစ်ပါတယ်။ အဲဒီရည်မှန်းချက်ကို အောင်မြင်အောာင် ကျွန်တော်တို့ ဆက်လက်လုပ်ဆောင်သွားမှာပါ။ ကျွန်တော် အကြိမ်ကြိမ်ပြောခဲ့သလိုပါပဲ။ လာမယ့်(၂)နှစ်အတွင်းမှာ ပိုလန် စစ်တပ်ကို အားအကောင်းဆုံး စစ်တပ်တစ်ခုဖြစ်အောင် ဖန်တီးသွားမှာပါ။ အဲဒီစစ်တပ်အတွက် အရေးအကြီးဆုံး အရာတွေထဲက တစ်ခုကတော့ ဒုံးကျည်စနစ်တွေပါပဲ" ဟု ပြောခဲ့သည်။

ပိုလန်ထုတ် Jelcz 6X6 ထရပ်ကားများပေါ်တွင် HIMARS launcher-loader module kits များကို အံဝင်ခွင်ကျ တပ်ဆင်စေနိုင်ရန်အတွက် ပိုလန်စက်မှုလုပ်ငန်းများ နှင့် လက်တွဲလုပ်ဆောင်သွားမည်ဖြစ်ကြောင်း Lockheed Martin Corp ကုမ္ပဏီက ပြောကြားခဲ့သည်။

ပိုလန်ကာကွယ်ရေးကုမ္ပဏီများသည် HIMARS ခဲယမ်းမီးကျည်များ ထုတ်လုပ်ခွင့်လိုင်စင်ကိုလည်း ရရှိရန် မျှော်လင့် နေကြောင်း သိရသည်။ HIMARS ဒုံးကျည်စနစ်များ ထုတ်လုပ်မည့်အစီအစဉ်ထဲတွင် ပါဝင်မည့် ပိုလန်ကာကွယ်ရေး ကုမ္ပဏီများမှာ Polska Grupa Zbrojeniowa (PGZ)၊ Huta Stalowa Wola (HSW)၊WZU နှင့် MESKO ကုမ္ပဏီတို့ ဖြစ်ကြောင်း သိရသည်။

HIMARS ဒုံးကျည်စနစ်များနှင့် ဆက်စပ်သော ခဲယမ်းမီးကျည်များသည် အမေရိကန်ဒေါ်လာ (၅ ဒသမ ၁) သန်းခန့် ကုန်ကျသောကြောင့် ပိုလန်နိုင်ငံ၏ HIMARS ဒုံးကျည်စနစ်များ ထုတ်လုပ်မည့်အစီအစဉ်မှာ အမေရိကန်ဒေါ်လာ (၂ ဒသမ ၅) ဘီလျံခန့် ကုန်ကျနိုင်ဖွယ်ရှိနေသည်။