မြူနစ် (NSS) - စက်တင်ဘာ ၁၁

ရှမ်းပြည်နယ်၊ မူဆယ်မြို့မှတစ်ဆင့် တရုတ်နိုင်ငံဘက်သို့ သွားရောက်ရန် စောင့်ဆိုင်းနေသူသည် လူဦးရေသောင်းချီရှိနေကြောင်း မူဆယ်မြို့ခံများထံမှ သိရသည်။

မြန်မာ-တရုတ်နယ်စပ်ရှိ နန်းတော်၊ ဆင်ဖြူဂိတ်နှင့် မန်ဝိန်းဂိတ်တို့တွင် ပြီးခဲ့သည့် စက်တင်ဘာလ ၄ ရက်မှစတင်ကာ တစ်ခါသုံးကတ်(TBP)ဖြင့် စတင်ဖြတ်သန်းခွင့်ပေးခဲ့သည်။

ထိုသို့ခွင့်ပြုခဲ့ပြီးနောက်ပိုင်းတွင် မူဆယ်မြို့သို့ ဒေသအသီးသီးမှ လူအများအပြားလာရောက်ခဲ့ကြပြီး တရုတ်နိုင်ငံဘက်သို့ သွားရောက်ရန်အတွက် စောင့်ဆိုင်းနေသူများ လူဦးရေသောင်းနှင့်ချီကာရှိနေကြောင်း မူဆယ်မြို့ခံများက ပြောသည်။

“လက်ရှိ မူဆယ်မြို့ပေါ်မှာ တရုတ်ဘက်ကိုဝင်ဖို့ စောင့်ဆိုင်းသူက သောင်းချီရှိတယ်။ အဓိကတော့ စစ်ကိုင်း၊ မကွေးအပါအဝင် ဒေသအစုံက လူတွေများတယ်။ နိုင်ငံရေးအခြေအနေအရရော၊ အလုပ်အကိုင်မရှိကြတာရော စားဝတ်နေရေးအတွက် တရုတ်ဘက်မှာ အလုပ်လာလုပ်ဖို့ တက်လာကြတာများတယ်”ဟု မူဆယ်မြို့ခံတစ်ဦးက NSS ကို ပြောသည်။

လက်ရှိတွင် မူဆယ်မြို့ပေါ်ရှိ တည်းခိုခန်းများ၌ တည်းခိုသူ ပြည့်နှက်လျက်ရှိသည့်အပြင် မြို့ခံလူမှုကူညီရေးအသင်းများကလည်း ခေတ္တတည်းခိုနိုင်ရေးအတွက် ကူညီပေးနေရမှုများရှိကြောင်း သိရသည်။

“လူတိုင်းကို မကူညီနိုင်ပေမယ့် ကျွန်တော်တို့ကတော့ အယောက်(၅၀)လောက်ကို ကူညီပေးထားတယ်။ တစ်ချို့ဆိုရင်လည်း သနားပါတယ်။ အိမ်ပေါင်ပြီးတော့လာတယ်။ အတိုးတွေနဲ့ ပိုက်ဆံချေးလာတယ်။ ဒါတွေကို မြင်ရတော့လည်း ကျွန်တော်တို့အသင်းမှာရှိတဲ့ အခြေခံစားကုန်လေတွေကို ထုတ်ကျွေးထားပါတယ်။ အခမဲ့လည်း နေခွင့်ပြုထားပါတယ်”ဟု မူဆယ်မြို့ရှိ လူမှုကူညီရေးအသင်းတစ်ခုမှ တာဝန်ရှိသူက NSS ကိုပြောသည်။

မြန်မာ-တရုတ်နယ်စပ်ရှိ ဂိတ်များအနေဖြင့် (၁)ရက်လျှင် ဖြတ်သန်းခွင့်ကတ်အရေအတွက် (၂၀၀)စီသာ ပြုလုပ်ဖြတ် သန်းခွင့်ပေးလျက်ရှိကြောင်း သိရသည်။

၎င်းဂိတ်များ၌ လာရောက်တန်းစီစောင့်ဆိုင်းသူများပြားသည့်အတွက် တန်းစီခြင်းစနစ်အစား သက်ဆိုင်ရာတာဝန်ရှိသူက တိုကင်စနစ်သဘောမျိုးကို အသုံးပြုကာ တစ်ခါသုံးကတ်(TBP)ကို ထုတ်ပေးလျက်ရှိကြောင်း သိရသည်။

ထိုသို့ တစ်ခါသုံးကတ်(TBP) ရရှိရေးအတွက် တိုကင်စနစ်ဖြင့် ဆောင်ရွက်ခဲ့ရာတွင် ကြားပွဲစားများက တိုကင်တစ်ခုလျှင် ငွေကျပ် ငါးသောင်းကျပ်မှ နှစ်သိန်းခွဲဖြင့် ရောင်းချပေးနေသည့် လုပ်ရပ်များလည်း ပေါ်ပေါက်နေကြောင်း မြို့ခံများက ပြောသည်။

“အရေးတကြီးဝင်ဖို့ ရှိတဲ့သူတွေ၊ တန်းမစီနိုင်တဲ့ ဗိုက်ကြီးသည်တွေ၊ သက်ကြီးရွယ်အိုတွေဆိုရင် သုံးသိန်းလောက်ပေးပြီးတော့ ဝင်ခဲ့တာတွေရှိတယ်လို့ ပြောတယ်။ ပေါင်းစားနေကြတာလားတော့ မသိဘူး။ ဌာနဆိုင်ရာတွေက သေသေချာချာလေးတော့ စိစစ်ပေးစေချင်တယ်။ လူတွေ ပိုပြီးဒုက္ခမရောက်စေချင်ဘူး”ဟု မူဆယ်မြို့ခံတစ်ဦးက ပြောသည်။

မူဆယ်မြို့မှတစ်ဆင့် တရုတ်နိုင်ငံဘက်သို့ တစ်ခါသုံးကဒ်(TBP)ဖြင့် ဖြတ်သန်းသွားလာရာတွင် စာအုပ်တန်ဖိုးအနေဖြင့် ငွေကျပ်(၅၀၀)နှင့် ဖြတ်သန်းခ ငွေကျပ်(၅၀၀) စုစုပေါင်း (၁၀၀၀)ကျပ်သာ ကုန်ကျမှုရှိကြောင်း သိရသည်။

မြန်မာ-တရုတ်နယ်စပ်မှတစ်ဆင့် လူဝင်ထွက်ဖြတ်သန်းသွားလာခွင့်အား ပြီးခဲ့သည့် ၂၀၂၀ ပြည့်နှစ် ကိုဗစ်-၁၉ ကပ်ရောဂါ စတင်ဖြစ်ပွားချိန်မှစ၍ ပိတ်ဆို့ခဲ့ခြင်းဖြစ်ပြီး ယခုအချိန်ရောက်မှသာ ဝင်ထွက်ခွင့်အား ပြန်လည်ခွင့်ပြုပေးခဲ့ခြင်းလည်း ဖြစ်သည်။