NSS - စက်တင်ဘာ ၁၁

စားသုံးဆီတင်သွင်းဖြန့်ဖြူးမှုကြီးကြပ်ရေးကော်မတီ၏ အပတ်စဉ် ရည်ညွှန်းထုတ်ပြန်သည့် ဈေးနှုန်းအရ စားအုန်းဆီ တစ်ပိဿာလျှင် ၃၀၀ ကျပ်ခန့် ဈေးမြင့်တက်လာကြောင်းသိရသည်။ 

ယခင် သီတင်းပတ်က စားအုန်းဆီတစ်ပိဿာလျှင် ၄၁၆၀ကျပ် ပေါက်ဈေးဖွင့်လှစ်ခဲ့သော်လည်း ယနေ့ (စက်တင်ဘာလ ၁၁ ရက်)တွင် တစ်ပိဿာလျှင် ၄၅၂၄ ကျပ်ပေါက်ဈေးဖွင့်လျှစ်ထားသည်ကိုတွေ့ရသည်။ 

ပြည်သူများအနေဖြင့် လက်လီဈေးကားများ နှင့် ဆီအသင်းက ခွဲတမ်းချပေးသော ဆိုင်များတွင်သာ စားသုံးဆီကော်မတီကထုတ်ပြန်သည့် ရည်ညွှန်းဈေးဖြင့် ဝယ်ယူနိုင်ကြောင်းသိရသည်။ 

“အပြင်ဈေးကွက်ထဲမှာ စားအုန်းဆီကဝယ်လို့မရတော့ဘူး။ တန်းစီတဲ့ဆိုင်တွေမှာဘဲဝယ်လို့ရတယ်။ အလှူလုပ်ဖို့ ဝယ်ချင်ရင်တောင် တစ်ယောက်တစ်ပိသာဆိုတော့ ဘယ်လိုမှအဆင်မပြေဘူး”ဟု တောင်ဒဂုံမြို့နယ်မှ ဆီဝယ်ယူသူတစ်ဦးကပြောသည်။ 

ခွဲတမ်းအလိုက်ရောင်းပေးနေသည့် ဆိုင်များတွင် ယခင်တစ်ပတ်အတွင်းက တစ်ပိဿာလျှင် ၄၄၀၀ကျပ်ဖြင့်ရောင်းချပေးခဲ့ရာ လက်ရှိတွင် ၄၇၀၀ ဝန်းကျင်ဖြင့်ရောင်းချလျက်ရှိကြောင်းသိရသည်။ 

ဆီအသင်းကသတ်မှတ်ပေးသည့် စားအုန်းဆီဈေးနှုန်းသည် ကမ္ဘာ့ပေါက်ဈေးအရတွက်ချက်ပေးခြင်းဖြစ်ပြီး သယ်ယူပို့ဆောင်ခ၊ ကုန်ကျစရိတ်များ ထည့်သွင်းတွက်ချက်ထားခြင်းဖြစ်သည်။ 

ပြင်ပဈေးကွက်အတွင်း၌ စားအုန်းဆီတစ်ပိသာလျှင် ၉ဝဝဝ ကျော်ပေါက်ဈေးရှိနေသော်လည်း အလွယ်တကူဝယ်ယူ ၍မရခြင်းကြောင့် အခြေခံပြည်သူများအခက်အခဲဖြစ်ပေါ်နေကြောင်းသိရသည်။