ယွန်း (NSS) - စက်တင်ဘာ ၁၀

လျှပ်စစ်မီတာခမပေးဆောင်သည့် ကြွေးကျန်ငွေမှာ ငွေကျပ် (၂၅ဝ)ဘီလျံနီးပါး ကျန်ရှိကြောင်း လျှပ်စစ်စွမ်းအားဝန်ကြီးဌာနမှ သိရသည်။

မြန်မာနိုင်ငံတွင် ၂ဝ၂၁ ခုနှစ်၊ ဖေဖော်ဝါရီလမှစ၍ တပ်မတော်က အာဏာရယူခဲ့ပြီးနောက် နိုင်ငံအတွင်း၌ ပဋိပက္ခများဖြစ်ပွားမှုနှင့်အတူ လျှပ်စစ်မီတာခများ မပေးဆောင်ရန်အတွက် လှုံ့ဆော်တိုက်တွန်းမှုများရှိခဲ့သည်။

ထိုသို့ လှုံ့ဆော်တိုက်တွန်းမှုများကြောင့် လျှပ်စစ်မီတာခ မပေးဆောင်သူ အများအပြားရှိခဲ့ကြောင်း သိရသည်။ 

ပြီးခဲ့သည့် ၂ဝ၂၂ ခုနှစ်၊ မေလအထိ လျှပ်စစ်မီတာခမပေးဆောင်မှုများကြောင့် နိုင်ငံတော်မှရရန် ကျန်ရှိနေသည့် မီတာခကြွေးကျန်မှာ ငွေကျပ် (၅၁ဝ ဒသမ ၄၅၅) ဘီလျံရှိခဲ့ကြောင်း လျှပ်စစ်စွမ်းအားဝန်ကြီးဌာနထံမှ သိရသည်။ 

အဆိုပါကြွေးကျန်များကို ဝန်ကြီးဌာနအနေဖြင့် လိုက်လံကောက်ယူခဲ့ရာတွင် ငွေကျပ်(၂၆၅)ဘီလျံကျော် နိုင်ငံတော်အတွက် ပြန်လည်ရရှိခဲ့ကြောင်း ဝန်ကြီးဌာနက ဆိုသည်။

ထို့ကြောင့် ၂ဝ၂၃ ခုနှစ်၊ ဇူလိုင်လအထိ ဆက်လက်တောင်းခံရန်ကျန်ရှိနေသည့် လျှပ်စစ်မီတာခကြွေးကျန်မှာ ငွေကျပ်(၂၄၄ ဒသမ ၆၁၉)ဘီလျံ ရှိနေသေးကြောင်း လျှပ်စစ်စွမ်းအားဝန်ကြီးဌာနက ပြောသည်။

"လျှပ်စစ်စွမ်းအားဝန်ကြီးဌာနအနေနဲ့ ၂ဝ၂၂ ခုနှစ် (၅)လပိုင်းတွင် ဓာတ်အားခကြွေးကျန် ကျပ် ၅၁ဝ ဒသမ ၄၅၅ ဘီလျံကျန်ရှိနေမှုအပေါ်  လိုက်လံကောက်ခံခဲ့ပါတယ်။ ယခု ၂ဝ၂၃ ခုနှစ်၊ (၇)လပိုင်းအထိ ဓာတ်အားခတောင်းခံဖို့ ကျန်နေတဲ့ စုစုပေါင်းကြွေးကျန်မှာ ကျပ် ၂၄၄ ဒသမ ၉၁၆ ဘီလျံသာ ကျန်ရှိပါတယ်" ဟု လျှပ်စစ်စွမ်းအားဝန်ကြီးဌာနမှ NP News ကို ပြောသည်။

ထို့ပြင် ကျန်ရှိနေသည့် ဓာတ်အားခကြွေးကျန်များကို တိုးမြှင့်ကောက်ခံရရှိရေးကိုလည်း နည်းလမ်းမျိုးစုံဖြင့် စီမံဆောင်ရွက်လျက်ရှိကြောင်း သိရသည်။

လျှပ်စစ်စွမ်းအားဝန်ကြီးဌာနအနေဖြင့် ဓာတ်အားခများကောက်ခံရာတွင် ဓာတ်အားခနှုန်းထားကို အိမ်သုံးအမျိုးအစားနှင့် အိမ်သုံးမဟုတ်သည့်အမျိုးအစားဟူ၍ အမျိုးအစားနှစ်မျိုးဖြင့် ကောက်ခံလျက်ရှိကြောင်း သိရသည်။

ဝန်ကြီးဌာနအနေဖြင့် လူနေထိုင်ခြင်းမရှိသည့် နေအိမ်များတွင် လျှပ်စစ်ဓာတ်အား အသုံးမပြုဘဲ သုံးစွဲယူနစ် "0" ဖြစ်နေပြီး မီတာခကို (၆)လဆက်တိုက် ပေးဆောင်ခြင်းမရှိသော မီတာများကို စက်တင် ဘာ(၁)ရက်မှစ၍ ဖြုတ်သိမ်းခြင်းများ ဆောင်ရွက်ခဲ့ကြောင်း သိရသည်။

ထို့ပြင် လျှပ်စစ်ဓာတ်အားသုံးစွဲလျှက်ရှိပြီး (၄)လနှင့်အထက် ဓာတ်အားခပေးဆောင်ခြင်းမရှိသည့် ဓာတ်အားခကြွေးကျန်များရှိသည့် မီတာများကိုလည်း ဖြုတ်သိမ်းလျက်ရှိကြောင်း သိရသည်။