ဂျန်ဇက် (NSS) - စက်တင်ဘာ ၉

မြန်မာနိုင်ငံအနေဖြင့် လျှပ်စစ်ဓါတ်အား လုံလောက်စွာထောက်ပံ့ပေးနိုင်ရန်အတွက် ၂၀၃၀ ခုနှစ်အထိ တစ်နှစ်လျှင်လျှပ်စစ်ဓါတ်အား မဂ္ဂါဝပ် ၃၀၀ နှင့် ၅၀၀ ကြားတိုးမြှင့်ထုတ်လုပ်နိုင်ရန် လိုအပ်ကြောင်း ကမ္ဘာ့ဘဏ်က ထုတ်ဖော်ပြောဆိုလိုက်သည်။

မြန်မာနိုင်ငံတွင်လျှပ်စစ် ဓါတ်အားနှင့်ပတ်သက်သော ထုတ်လုပ်နိုင်စွမ်း နှင့် လိုအပ်မှုအခြေနေနှစ်ခုကြားကွာဟချက်ကြီးမားခဲ့ပြီး ၂၀၂၁ ခုနှစ်နောက်ပိုင်းတွင် လျှပ်စစ်ဓါတ်အားထုတ်လုပ်မှု  ၂၅၀၀ မဂ္ဂါဝပ်လျော့နည်းကျဆင်းသွားခဲ့ကြောင်း ကမ္ဘာ့ဘဏ်က သတင်းထုတ်ပြန်ထားသည်။ ရန်ကုန်မြို့ရှိ သဘာဝဓါတ်ငွေ့ရည် LNG မှ လျှပ်စစ်ဓာတ်အား ထုတ်လုပ်သော စက်ရုံနှစ်ခု၏လုပ်ငန်းများဆိုင်းငံ့ခြင်း၊ မိုးရွာသွန်းမှုနည်းပါးခြင်း ရေအားလျှပ်စစ်ထုတ်လုပ်သည့် သိုလှောင်ကန်များတွင် ရေများလျော့နည်းခြင်း၊ ပြည်တွင်းသဘာဝဓာတ်ငွေ့ထောက်ပံ့မှုလိုအပ်ချက်များရှိနေခြင်းအ ပါအဝင်အကြောင်းအမျိုးမျိုးကြောင့် မြန်မာနိုင်ငံ၏လျှပ်စစ်ဓါတ်အား ထုတ်လုပ်ဖြန့်ဖြူးပေးနိုင်မှုများလျော့နည်းခဲ့ရကြောင်း ကမ္ဘာဘဏ်က သုံးသပ်ထားသည်။ 

သဘာဝဓါတ်ငွေ့ကိုအသုံးပြုပြီး လျှပ်စစ်ဓါတ်အားထုတ်လုပ်မည့်စက်ရုံများကို ထုတ်လုပ်မှု ဆိုင်းငံ့ထားရခြင်း၊ ၂၀၂၁ ခုနှစ်နောက်ပိုင်း နိုင်ငံတဝှမ်း လျှပ်စစ်ဓါတ်အားပေးစက်ရုံများနှင့် ဓါတ်အားပေးလိုင်းများ တိုက်ခိုက်ခံရခြင်းများကြောင့်လည်း လျှပ်စစ်ဓါတ်အားထုတ်လုပ်မှုများကို လျော့နည်းကျဆင်းစေခဲ့ကြောင်း ကမ္ဘာ့ဘဏ်က ဖော်ပြထား သည်။ ရေအားလျှပ်စစ်ထုတ်လုပ်မှုအသစ် နှင့် ဆိုလာစွမ်းအင်သုံးလျှပ်စစ်ဓါတ်အားထုတ်လုပ်ရန် လက်ရှိအချိန်တွင် ကြိုးပမ်းနေသော်လည်း တိုးတက်မှုများနှေးကွေးနေဆဲဖြစ်ပြီး လာမည့်နှစ်များအတွင်း ပြည်တွင်း သဘာဝဓါတ်ငွေ့လုပ်ကွက်များတွင်လည်း ဓါတ်ငွေ့ကုန်ခမ်းခြင်း၊ ဓါတ်ငွေ့ထုတ်လုပ်နိုင်မှုလျော့နည်းဖွယ်ရှိနေကြောင်း ကမ္ဘာ့ဘဏ်ကဖော်ပြထားသည်။

နိုင်ငံရေးအငြင်းပွားမှုများ ဆက်လက်ဖြစ်ပေါ်နေခြင်းသည် မြန်မာနိုင်ငံ၏ လျှပ်စစ်လုပ်ငန်းကို သက်ရောက်မှုများစွာရှိကြောင်း ကမ္ဘာ့ဘဏ်ကဖော်ပြထားသည်။ လျှပ်စစ်ဓါတ်အား ထောက်ပံ့ပေးနိုင်မှု လုံလောက်မှုမရှိခြင်း နှင့် မြန်မာကျပ်ငွေတန်ဖိုးကျဆင်းခြင်းများကြောင့် ၂၀၂၁ ခုနှစ်နောက်ပိုင်းကတည်းက မြန်မာနိုင်ငံတွင် လောင်စာဆီ ဈေးနှုန်းများနှစ်ဆ၊ သုံးဆအထိ ဈေးမြင့်တက်ခဲ့ကြောင်း ကမ္ဘာ့ဘဏ်ကပြောသည်။ လောင်စာဆီဈေးနှုန်းများမြင့်တက်ခြင်းကြောင့် စီးပွားရေးလုပ်ငန်းများ နှင့် ကုန်ထုတ်လုပ်ငန်းများအပေါ်ဖိအားများဖြစ်စေခဲ့ပြီး ထုတ်လုပ်မှုများကို လျှော့ချခြင်းများရှိနေခဲ့ကြောင်း ကမ္ဘာ့ဘဏ်၏ ထုတ်ပြန်ချက်တွင်ဖော်ပြထားသည်။ လျှပ်စစ်ဓါတ်အားလုံလောက်မှုမရှိခြင်းကြောင့် မြန်မာနိုင်ငံ၏ကျန်းမာရေးလုပ်ငန်းအပါအဝင်ကဏ္ဍများစွာတွင် သက်ရောက်မှုများစွာဖြစ်ပေါ်ခဲ့ကြောင်း သိရသည်။