Pika (NSS) – စက်တင်ဘာ ၇

ဗြိတိန်အစိုးရသည် ရုရှားကြေးစားတပ်ဖွဲ့ Wagner ကို အကြမ်းဖက်အဖွဲ့အစည်းအဖြစ် သတ်မှတ်လိုက်ကြောင်း ဗြိတိန်ပြည်ထဲရေးအတွင်းဝန် Suella Braverman ၏ ပြောကြားချက်ကို ကိုးကားပြီး မီဒီယာများက ဖော်ပြခဲ့သည်။

ဗြိတိန်အစိုးရသည် Wagner အဖွဲ့ကို အကြမ်းဖက်အဖွဲ့အစည်းအဖြစ်  ISIS အဖွဲ့ နှင့် အယ်လ်ကိုင်းဒါးအဖွဲ့တို့ နှင့် တန်းတူထားရန်စီစဉ်နေကြောင်း Daily Mail က ဖော်ပြခဲ့သည်။

Suella Braverman က "Wagner အဖွဲ့ဟာ နိုင်ငံရပ်ခြားမှာ ရုရှားသမ္မတပူတင်ရဲ့  စစ်လက်နက်ကိရိယာတစ်ခုလို မျိုးလုပ်ဆောင်နေတဲ့ အကြမ်းဖက်အဖွဲ့အစည်းတစ်ခုဖြစ်ပါတယ်။ Wagner အဖွဲ့ဟာ ရုရှားအစိုးရရဲ့ နိုင်ငံရေး ပန်းတိုင်တွေကို ဆက်လက်ထမ်းဆောင်ပေးနေတဲ့အဖွဲ့အစည်းတစ်ခုပါ" ဟု ပြောခဲ့သည်။ ၂ဝဝဝ ပြည့်နှစ်တွင် စတင်ထုတ်ပြန်ခဲ့သောအကြမ်းဖက်အက်ဥပဒေအရ ပြည်ထဲရေးအတွင်းဝန်သည် အကြမ်းဖက်မှုများတွင် ပါဝင် သည်ဟု ယုံကြည်သောအဖွဲ့အစည်းတစ်ခုခုကို တားမြစ်ပိတ်ပင်နိုင်သည့် အာဏာရှိကြောင်း သိရသည်။

Suella Braverman က "Wagner အဖွဲ့ဟာ အကြမ်းဖက်သမားတွေဖြစ်တယ်ဆိုတာကို ဗြိတိန်ဥပဒေမှာ ရှင်းရှင်းလင်းလင်း ဖော်ပြထားပါတယ်။ Wagner အဖွဲ့ဟာ လုယက်မှု၊ညှင်းပန်းနှိပ်စက်မှုနဲ့ လူသတ်မှုတွေမှာ ပါဝင် ပတ်သက်ခဲ့ပါတယ်။ ယူကရိန်း၊ အရှေ့အလယ်ပိုင်းဒေသ နဲ့ အာဖရိကမှာ လုပ်ဆောင်နေတဲ့ Wagner အဖွဲ့ရဲ့ စစ်ဆင်ရေးဟာ ကမ္ဘာ့လုံခြုံရေးကို ခြိမ်းခြောက်နေပါတယ်။ ဒါကြောင့် ကျွန်မတို့ဟာ  ဒီအကြမ်းဖက်အဖွဲ့အစည်းကို တားမြစ်ပိတ်ပင်မှုတွေလုပ်ဆောင်ပြီး ရုရှားကိုတိုက်ခိုက်နေတဲ့ ယူကရိန်းကို စစ်ရေးအကူအညီတွေ ဆက်လက် ပံ့ပိုးနေတာပဲဖြစ်ပါတယ်" ဟု ပြောခဲ့သည်။

Wagner အဖွဲ့အား တားမြစ်ပိတ်ပင်မည့်အစီအစဉ်များကို စက်တင်ဘာလ(၆)ရက်တွင် လွှတ်တော်ကို အဆိုပြု တင်သွင်းမည်ဖြစ်ကြောင်း မီဒီယာများက ဖော်ပြခဲ့သည်။ ဗြိတိန်အစိုးရသည် သတ်ဖြတ်မှု၊ ညှင်းပန်းနှိပ်စက်မှု အပါအဝင် ရာဇဝတ်မှုများကျူးလွန်ခဲ့သည်ဟု စွပ်စွဲခံရသည့် အာဖရိကရှိ Wagner အဖွဲ့နှင့်ဆက်စပ်သော လူပုဂ္ဂိုလ်(၁၃)ဦး နှင့် စီးပွားရေးလုပ်ငန်းများအား ပိတ်ဆို့အရေးယူမှုကို ပြီးခဲ့သည့်ဇူလိုင်လတွင် ထုတ်ပြန်ကြေညာ ခဲ့သည်။ 

ပြီးခဲ့သည့်လက လေယာဉ်ပျက်ကျမှုတွင် သေဆုံးသွားခဲ့သော Wagner အဖွဲ့ခေါင်းဆောင် ပရီဂိုဇင်သည်လည်း ဗြိတိန်အစိုးရ၏ ပိတ်ဆို့အရေးယူမှုများကို ခံခဲ့ရပြီးဖြစ်ကြောင်း သိရသည်။ Wagner အဖွဲ့ခေါင်းဆောင် ပရီဂိုဇင် သည် ရုရှားစစ်တပ်အကြီးအကဲများကို ဖြုတ်ချရန်အတွက် ပုန်ကန်မှုလုပ်ဆောင်ရန် ၎င်း၏ တပ်ဖွဲ့များကို အမိန့်ပေး ခဲ့ပြီးနောက် နှစ်လအကြာတွင် လေယာဉ်ပျက်ကျမှုအတွင်း သေဆုံးခဲ့ခြင်းဖြစ်ကြောင်း သိရသည်။