မျိုးကြီး (NSS) - စက်တင်ဘာ ၅

နိုင်ငံတော်နှင့် ပြည်သူလူထုအတွက် အရေးကြုံလာပါက နိုင်ငံရေးပါတီများအနေဖြင့် ရှေ့တန်းမှအတူပူးပေါင်းဆောင်ရွက်သင့်ကြောင်း UEC ဥက္ကဋ္ဌ ဦးသိန်းစိုးက ပြောသည်။

၎င်းက ယနေ့(စက်တင်ဘာလ ၅ ရက်)နံနက်ပိုင်းတွင် ရန်ကုန်မြို့ရှိ အစိုးရအဖွဲ့ရုံး၌ပြုလုပ်သော နိုင်ငံရေးပါတီ (၃၆) ပါတီကို မြန်မာအီလက်ထရောနစ်မဲပေးစက်နှင့်ပတ်သက်၍ မိတ်ဆက်ရှင်းလင်းခြင်းအခမ်းအနားတွင် အထက်ပါကဲ့သို့ ထည့်သွင်းပြောကြားခဲ့ခြင်းဖြစ်သည်။

နိုင်ငံရေးပါတီများသည် ပါတီဝင်အင်အားတောင့်တင်းကာ ထိုက်သင့်သည့် ပါတီရန်ပုံငွေရှိရန်လိုအပ်ပြီး သို့မှသာ ခိုင်မာသော ပါတီများအဖြစ် ရပ်တည်နိုင်ဟု ရွေးကောက်ပွဲကော်မရှင်ဥက္ကဋ္ဌ ဦးသိန်းစိုးက အကြံပြုထားသည်။

“အလားတူ နိုင်ငံတော်နဲ့ပြည်သူလူထုအတွက် အရေးကြုံလာပါက ရှေ့တန်းမှအတူပူးပေါင်းဆောင်ရွက်သင့်ပါတယ်။ ဥပမာအားဖြင့် ရခိုင်ပြည်နယ်မှာကြုံတွေ့ခဲ့ရတဲ့ မိုခါဆိုင်ကလုန်းမုန်တိုင်းအန္တရာယ်ကာကွယ်ရေးနဲ့ ကယ်ဆယ်ရေး၊ ပြန်လည်ထူထောင်ရေးကိစ္စများ ဖြစ်ပါတယ်” ဟု ကော်မရှင်ဥက္ကဋ္ဌက ပြောသည်။

မိုခါမုန်တိုင်းဒဏ်သင့်ဒေသများ၌ အစိုးရဌာနဆိုင်ရာအဖွဲ့အစည်းများနှင့် အရပ်ဖက်လူမှုအဖွဲ့အစည်းများစွာ သွား ရောက်ကူညီခဲ့ကြသော်လည်း နိုင်ငံရေးပါတီအနည်းငယ်မျှသာ ပါဝင်ကူညီဆောင်ရွက်ခဲ့သည်ဟု ဦးသိန်းစိုးက မှတ်ချက်ပြုထားသည်။

“မိုခါမုန်တိုင်းသင့်ဒေသများကို အစိုးရဌာနများအဖွဲ့အစည်းများ၊ အရပ်ဖက်လူမှုအဖွဲ့အစည်းများစွာ သွားရောက်ကူညီကြတာတွေ့ရမှာဖြစ်ပေမယ့် နိုင်ငံရေးပါတီအနည်းငယ်မျှသာ ပါဝင်ကူညီဆောင်ရွက်ခဲ့ပါတယ်။ အလားတူ စီးပွားရေးကဏ္ဍမှာ ဈေးကစားခြင်းကြောင့် ကုန်ဈေးနှုန်းကြီးမြင့်မှုဒဏ် ပြည်သူတွေခံစားနေရပေမယ့် ပါတီများက ပြည်သူများနဲ့အတူ အကျိုးတူပူးပေါင်းဆောင်ရွက်ခြင်းဖြင့် နှစ်ဦးနှစ်ဖက်အကျိုးရှိမှာဖြစ်ပါတယ်”ဟု ၎င်းက ဆက်လက်ပြော သည်။

ထို့ပြင် နိုင်ငံတော်၏ ပညာရေး၊ ကျန်းမာရေးကဏ္ဍများတွင်လည်း တက်စွမ်းသမျှပါဝင်ကာ ပြည်သူလူထုနှင့်အတူ ပူးပေါင်း ပါဝင်ဆောင်ရွက်ရန်လည်း ကော်မရှင်ဥက္ကဋ္ဌဦးသိန်းစိုးက ထပ်မံတိုက်တွန်းထားသည်။

လက်ရှိနစကလက်ထက်၌ ပြဋ္ဌာန်းခဲ့သော နိုင်ငံရေးပါတီများမှတ်ပုံတင်ခြင်းဥပဒေအရ ကော်မရှင်၌ မှတ်ပုံတင်လျှောက်ထားသည့် နိုင်ငံရေးပါတီ (၆၄)ပါတီရှိခဲ့ပြီး ယင်းတို့အနက်မှ (၃၆)ပါတီကို နိုင်ငံရေးပါတီအဖြစ် မှတ်ပုံတင်ခွင့်ပြုပေးထားသည်။

၎င်းဥပဒေအရ မှတ်ပုံတင်ပြန်လည်မလျှောက်ထားသော နိုင်ငံရေးပါတီ(၅၀)ခန့်ရှိခဲ့ပြီး ၎င်းတို့အထဲတွင် အမျိုးသားဒီမိုကရေစီအဖွဲ့ချုပ်ပါတီ(NLD)၊ ရှမ်းတိုင်းရင်းသားများဒီမိုကရေစီအဖွဲ့ချုပ်ပါတီ(SNLD)တို့ ပါဝင်ခဲ့သည်။

လက်ရှိတွင် နိုင်ငံရေးပါတီများမှတ်ပုံတင်ခြင်းဥပဒေအရ မှတ်ပုံတင်မလျှောက်ထားသော နိုင်ငံရေးပါတီများသည် ဥပဒေအရ ပျယ်ပြယ်သွားပြီဖြစ်ကြောင်း UEC ဘက်က ကြေညာထားသည်။