Pika (NSS) - စက်တင်ဘာ ၄

နိုင်ဂျီးရီးယားအစိုးရသည် ကမ္ဘာတစ်ဝန်းရှိ ၎င်း၏ သံတမန်ရေးရာမစ်ရှင်များ အားလုံးနီးပါးကို ရပ်ဆိုင်းခဲ့ပြီးနောက် နိုင်ဂျီးရီးယား၏ သံတမန်အားလုံးနီးပါးသည် နိုင်ငံအတွင်းသို့ ပြန်လာနေပြီဖြစ်ကြောင်း သမ္မတ Bola Tinubu က ထုတ်ပြန်ကြေညာခဲ့သည်။

သို့သော်လည်း ကုလသမဂ္ဂဆိုင်ရာ နိုင်ဂျီးရီးယားသံတမန်နှစ်ဦးကို ဆက်လက်ထားရှိမည်ဖြစ်ကြောင်း Bola Tinubu က ပြောကြားခဲ့သည်။ နိုင်ဂျီးရီးယားသမ္မတအကြံပေး Ajuri Ngelale က "သမ္မတ Bola Tinubuဟာ ကမ္ဘာတစ်ဝန်း မှာရှိတဲ့ သံတမန်ရေးရာမစ်ရှင်တွေ လုပ်ဆောင်နေတဲ့သံတမန်အားလုံးကို ပြန်လည်ခေါ်ယူဖို့ ညွှန်ကြားခဲ့ပါတယ်" ဟု ပြောခဲ့သည်။

သမ္မတ Bola Tinubu သည် ကမ္ဘာတစ်ဝန်းတွင်ရှိသော နိုင်ဂျီးရီးယား၏ ကောင်စစ်ဝန်ရုံးများနှင့် သံရုံးများ၏ လက်ရှိအခြေအနေများကို လေ့လာခဲ့ပြီးနောက် ယခုကဲ့သို့ဆုံးဖြတ်ချက်ချခဲ့ခြင်းဖြစ်ကြောင်း Ajuri Ngelale က ပြောကြားခဲ့သည်။

အဆိုပါဆုံးဖြတ်ချက်၏ အဓိကရည်ရွယ်ချက်မှာ နိုင်ဂျီးရီးယား၏ သံတမန်ရေးရာမစ်ရှင်များသည် ကမ္ဘာ့အဆင့်မှီ ကာ ထိထိရောက်ရောက် စွမ်းဆောင်ပေးနိုင်သည်ဆိုသည့်အချက်ကို သေချာစေရန်အတွက် ဖြစ်ကြောင်း ၎င်းက ပြောကြားခဲ့သည်။ သို့သော်လည်း အမေရိကန်နိုင်ငံ နယူးယောက်မြို့နှင့် ဆွစ်ဇာလန်နိုင်ငံ Geneva တွင်ရှိသော ကုလသမဂ္ဂဆိုင်ရာ နိုင်ဂျီးရီးယားအမြဲတမ်းကိုယ်စားလှယ်နှစ်ဦးကို ဆက်လက်ထားရှိဦးမည်ဖြစ်ကြောင်း Ajuri Ngelale က ပြောခဲ့သည်။

ကမ္ဘာတစ်ဝန်းတွင် နိုင်ဂျီးရီးယားနိုင်ငံ၏ သံတမန်ရေးရာ မစ်ရှင်(၁ဝ၉)ခုရှိကြောင်း ရိုက်တာသတင်းဌာန ၏ ဖော်ပြချက်အရ သိရသည်။ ယခုနှစ် မေလ(၂၉)ရက်တွင် နိုင်ဂျီးရီးယားသမ္မတအဖြစ် စတင်တာဝန်ထမ်းဆောင်ခဲ့ သော Bola Tinubu သည် ကြည်းတပ်၊ ရေတပ် နှင့် လေတပ်အကြီးအကဲများအပြင် ကာကွယ်ရေးဦးစီးချုပ်ကိုလည်း အစားထိုးခဲ့ကြောင်း သိရသည်။ ထို့အပြင် နိုင်ဂျီးရီးယားသမ္မတ Bola Tinubu သည် ပြီးခဲ့သည့်ဇွန်လတွင် အစိုးရအဖွဲ့အစည်းများ၊ အေဂျင်စီများ နှင့် နိုင်ငံပိုင်စီးပွားရေးလုပ်ငန်းများ၏ ဘုတ်အဖွဲ့များကို ဖျက်သိမ်းခဲ့ကြောင်း လည်း သိရသည်။