မျိုးကြီး (NSS) - စက်တင်ဘာ ၁

နိုင်ငံတော်၏ ငြိမ်းချမ်းရေးဆွေးနွေးရေးအဖွဲ့၌ နစကအဖွဲ့ဝင်များ တိုးမြင့်ပါဝင်လာခြင်းမှာ ဆွေးနွေးညှိနှိုင်းရေးမူအပေါ် အလေးနက်ထားခြင်းဟု ရှုမြင်ကြောင်း EAO (၅)ဖွဲ့က ဆိုသည်။

NCA ရေးထိုးထားသော တိုင်းရင်းသားလက်နက်ကိုင် (၅)ဖွဲ့ဖြစ်သည့် ALP၊ PNLO၊ LDU၊ KNU/KNLA-PC နှင့် DKBA တို့သည် ယမန်နေ့က အထက်ပါကဲ့သို့ ထုတ်ပြန်ကြေညာခဲ့ခြင်းဖြစ်သည်။

အဆိုပါ EAO (၅)နှင့် ဒုတိယဗိုလ်ချုပ်ကြီးရာပြည့် ဦးဆောင်သော နိုင်ငံတော်၏ ငြိမ်းချမ်းရေးဆွေးနွေးရေးအဖွဲတို့သည် ယခုရက်ပိုင်းအတွင်း နေပြည်တော်၌ (၃)ရက်ကြာ တွေ့ဆုံခဲ့ပြီးနောက် အထက်ပါကဲ့သို့ထုတ်ပြန်ခဲ့ခြင်း လည်းဖြစ်သည်။

“ကျွန်မတို့ကတော့ အပြုဘက်က ကြည့်ပြီးတော့ ကြိုဆိုတယ်။ အခုဆိုလို့ရှိရင် နိုင်ငံတော်ကောင်စီဝင် (၃)ဦးကတော့ NSPNC မှာ ပါပြီးဖြစ်တဲ့အတွက်ကြောင့် မူလထက် ဆွေးနွေးမှုအရှိန်အဟုန်မြင့်နိုင်တယ်လို့ စဉ်းစားတာ ရှိပါတယ်။ အရင်က ဆိုလို့ရှိရင်တော့ နိုင်ငံတော်ကောင်စီဝင် (၂)ဦး ပါတာပေါ့။ NSPNC မှာ ဒုတိယဗိုလ်ချုပ်ကြီး ရာပြည့် ပါတယ်။ ပြီးရင် ဒုတိယဗိုလ်ချုပ်ကြီးမိုးမြင့်ထွန်း ပါတယ်။ အခုဆိုရင် ဒုတိယဗိုလ်ချုပ်ကြီးစိုးထွဋ် ကောင်စီဝင်တွေထဲမှာဆိုရင် အရေးပါတဲ့ပုဂ္ဂိုလ်ဖြစ်တယ်။ အဲဒီပုဂ္ဂိုလ်ကလည်း ဒီဘက်မှာ ပါဝင်လာတယ်ဆိုတော့ ကောင်းစွာ ကြိုဆိုပါတယ်။ အရင်ထက်လည်း နှီးနှောတိုင်ပင်မှု ပိုပြီးတော့ များသွားနိုင်လိမ့်မယ်လို့ ထင်ပါတယ်” ဟု ၎င်း EAO (၅)ဖွဲ့ ၏ ပြောခွင့်ရ၊ ALP ဥက္ကဋ္ဌ ဒေါ်စောမြရာဇာလင်းက NP News ကို ပြောသည်။

မကြာမီအချိန်က ပြင်ဆင်တိုးချဲ့ဖွဲ့စည်းခဲ့သော နိုင်ငံတော်၏ ငြိမ်းချမ်းရေးဆွေးနွေးရေးအဖွဲ့တွင် ဥက္ကဋ္ဌ (၂)ဦး အပါအဝင် နိုင်ငံတော်ကောင်စီဝင်များ တိုးမြင့်ပါဝင်လာခြင်းသည် နိုင်ငံတော်စီမံအုပ်ချုပ်ရေးကောင်စီဘက်က ဆွေးနွေးညှိနှိုင်းအဖြေရှာရေးမူအပေါ် ပိုမိုအလေးနက်ထားလာသည်ဟု ရှုမြင်ကြောင်း EAO (၅)ဖွဲ့က ထုတ်ပြန် အသိပေးထားသည်။

ပြည်ထဲရေးဝန်ကြီး တာဝန်မှ ပြည်ထောင်စုအစိုးရအဖွဲ့ရုံးဝန်ကြီးအဖြစ် ပြောင်းရွေ့တာဝန်ထမ်းဆောင်ခဲ့သော ဒုတိယဗိုလ်ချုပ်ကြီး စိုးထွဋ်သည် ငြိမ်းချမ်းရေးဆွေးနွေးရေးအဖွဲ့တွင် ပါဝင်လာခဲ့ခြင်းဖြစ်သည်။

တိုင်းပြည်၏ ငြိမ်းချမ်းရေးကိုကြည့်ပါက EAO များ၏ အခန်းကဏ္ဍသည် အရေးကြီးပြီး နောက်ထပ် EAO အဖွဲ့များ ငြိမ်းရေးဆွေးနွေးပွဲများ၌ ထပ်မံပါဝင်လာရေး ကြိုးပမ်းသွားရမည်ဟု ဒေါ်စောမြရာဇာလင်းက ထပ်မံပြောသည်။

“အများကြီး ကြိုးစားဖို့လိုပါသေးတယ်။ EAO (၅)ဖွဲ့ ဆိုတာထက် EAO များရဲ့ အခန်းကဏ္ဍက အရှေ့ကိုရောက်လာဖို့ အရေးကြီးတယ်။ EAO တွေနဲ့ အရင်ဆုံးငြိမ်းချမ်းမှပဲ ငြိမ်းချမ်းလာမှာဖြစ်တယ်။ တိုင်းပြည်ငြိမ်းချမ်းရေးကို ကြည့် မယ်ဆိုရင် EAO တွေရဲ့အခန်းအကဏ္ဍကအရေးကြီးတဲ့အတွက်ကြောင့် (၅)ဖွဲ့မှသည် EAO များ ပါဝင်လာရေးကို ကြိုးပမ်းသွားရမှာဖြစ်ပါတယ်” ဟု ၎င်းက ဆက်လက်ပြောသည်။

လက်ရှိတွင် မြန်မာနိုင်ငံအတွင်း နစကအစိုးရနှင့် တိုင်းရင်းသားလက်နက်ကိုင် (၁ဝ)တို့အကြား ငြိမ်းချမ်းရေးတွေ့ဆုံဆွေးနွေးမှုများရှိသကဲ့သို့ အခြားတစ်ဖက်တွင်လည်း ငြိမ်းချမ်းရေးမဆွေးနွေးသည့် တိုင်းရင်းသားလက်နက်ကိုင်အဖွဲ့အချို့နှင့် တပ်မတော်တို့ကြားတွင်လည်း တိုက်ပွဲများ ဖြစ်ပွားလျက်ရှိနေသည်။