ဂျန်ဇက် (NSS) - စက်တင်ဘာ ၁

နေတိုးအုပ်စုဝင်နိုင်ငံများအနေနဲ့ ရုရှားကြေးစားတပ်ဖွဲ့  Wagner Group ရဲ့တပ်ဖွဲ့ဝင်များကို ဘီလာရုစ့်နိုင်ငံအတွင်းကနေ အမြန်ဆုံးထွက်ခွာသွားဖို့ တောင်းဆိုပိုင်ခွင့် အခွင့်အရေးမရှိကြောင်း ဘီလာရုစ့်သမ္မတ လူကာရှန်ကိုက တုံ့ပြန်ပြောဆိုလိုက်ပါတယ်။ ဘီလာရုစ့်သမ္မတဟာ နိုင်ငံတော်လုံခြုံရေးကောင်စီမှာ မိန့်ခွန်းပြောဆိုချိန်အတွင်း ပိုလန် နဲ့ ဘော်လ်တစ်ဒေသနိုင်ငံတွေရဲ့တောင်းဆိုမှုတွေကို တုံ့ပြန်ပြောဆိုလိုက်ခြင်းဖြစ်ပါတယ်။ 

ပိုလန် နဲ့ ဘော်လ်တစ်ဒေသနိုင်ငံတွေဟာ ရုရှားကြေးစားတပ်ဖွဲ့ဝင်တွေကို ဘီလာရုစ့်နိုင်ငံအတွင်းကနေ အမြန်ဆုံး ထွက်ခွာသွားဖို့ ဒီသီတင်းပတ်အစောပိုင်းက တောင်းဆိုခဲ့ကြောင်း သိရပါတယ်။ နေတိုးအဖွဲ့ဝင်နိုင်ငံတွေဟာ ဘီလာရုစ့်နယ်စပ်ဒေသတွေမှာ စစ်ရေးလှုပ်ရှားမှုတွေ တိုးမြှင့်လုပ်ဆောင်လာကြောင်း၊ ဘီလာရုစ်နိုင်ငံဟာ ဘယ်တော့မှမရှိခဲ့ဖူးတဲ့ ရန်လိုတဲ့ရည်ရွယ်ချက်တွေကို လုပ်ဆောင်နေကြောင်း သတင်းတွေက ဆိုပါတယ်။

ရုရှားကြေးစားတပ်ဖွဲ့ဟာ ပြီးခဲ့တဲ့လပိုင်းက ရုရှားအစိုးရကို လက်နက်ကိုင်ပုန်ကန်မှုများဖြစ်ပွားခဲ့ပြီး ဘီလာရုစ့် သမ္မတရဲ့ကြားဝင်စေ့စပ်ပေးမှုကြောင့် ပုန်ကန်မှုများ အဆုံးသတ်ခဲ့ကာ ကြေးစားတပ်ဖွဲ့ဝင်တွေကို ဘီလာရုစ့်နိုင်ငံ ကို ရွှေ့ပြောင်းအခြေချခွင့်ပေးခဲ့ကြောင်း သိရပါတယ်။

ဘီလာရုစ့်သမ္မတက ပိုလန်နိုင်ငံဟာ စစ်အေးခေတ်တိုက်ပွဲကာလတုန်းက ရရှိထားတဲ့ ဥရောပမှာ လက်နက်ကိုင်တပ်ဖွဲ့တွေ ချထားရေး သဘောတူညီချက်တွေကို လိုက်နာမှုမရှိကြောင်း ဝေဖန်ထားပါတယ်။ ဘီလာရုစ့်သမ္မတက ပိုလန်၊ လစ်သူယေးနီးယား နဲ့ ယူကရိန်းတို့ဟာ ဘီလာရုစ့်နိုင်ငံကို တိုက်ခိုက်မယ့် အစွန်းရောက်အကြမ်းဖက်အဖွဲ့ တွေကို လက်နက်တပ်ဆင်ပေးနေကြောင်း ဆိုပါတယ်။

ပိုလန်နိုင်ငံကလည်း ရုရှားကြေးစားတပ်ဖွဲ့ဝင်တွေဟာ ပိုလန်နိုင်ငံကို တိုက်ခိုက်ဖို့ ကြိုးပမ်းနေကြောင်း မကြာသေးမီက စွပ်စွဲပြောဆိုခဲ့ဖူးပါတယ်။ ရုရှားကြေးစားတပ်ဖွဲ့ခေါင်းဆောင်ပရီဂိုဇင်ဟာ ပြီးခဲ့တဲ့သီတင်းပတ်မှာ ရုရှားနိုင်ငံမော်စကိုမြို့ကနေ စိန့်ပီတာဘရက်စ်ကို ပြန်လာချိန်အတွင်း လမ်းမှာလေယာဉ်ပျက်ကျကာ အခြား ကြေးစားတပ်ဖွဲ့ခေါင်းဆောင်များနဲ့အတူ သေဆုံးခဲ့ကြောင်း သိရပါတယ်။

အဆိုပါ ရုရှားကြေးစားတပ်ဖွဲ့ဟာ ဆီးရီးယားနဲ့ အီရတ်နိုင်ငံတိုက်ပွဲတွေမှာ လက်စွမ်းပြနိုင်ခဲ့သလို ယူကရိန်းနဲ့ ရုရှား စစ်ပွဲတွေမှာလည်း မြို့များသိမ်းယူနိုင်တဲ့အထိ အစွမ်းပြခဲ့ပါတယ်။ ကြေးစားတပ်ဖွဲ့တွေဟာ အာဖရိကနိုင်ငံတွေမှာ လည်း အခြေကျတပ်စွဲမှုများ ရှိနေခဲ့ကြောင်း သိရပါတယ်။