ဂျန်ဇက် (NSS) - ဩဂုတ် ၃ဝ

အင်ဒိုနီးရှားနိုင်ငံက အိမ်ရှင်အဖြစ်လက်ခံကျင်းပမယ့် (၄၃)ကြိမ်မြောက် အာဆီယံထိပ်သီးအစည်းအဝေးကို နိုင်ငံပေါင်း ၂၂ နိုင်ငံရဲ့ခေါင်းဆောင်တွေတက်ရောက်ဖွယ်ရှိနေပြီး မြန်မာခေါင်းဆောင်တက်ရောက်ခွင့်ရဖို့အလားအလာနည်းကြောင်းသိရပါတယ်။

အင်ဒိုနီးရှားနိုင်ငံခြားရေးဝန်ကြီးက လာမယ့်သီတင်းပတ်အတွင်းကျင်းပမယ့် အာဆီယံထိပ်သီးအစည်း အဝေးကို အရှေ့တီမော အပါအဝင် အာဆီယံအဖွဲ့ဝင် နိုင်ငံပေါင်း (၁၀)နိုင်ငံတက်ရောက်ဖွယ်ရှိနေကြောင်း ပြောပါတယ်။ 

အင်ဒိုနီးရှားနိုင်ငံခြားရေးဝန်ကြီး ရက်နိုမာဆူဒီက "ဂျာကာတာမြို့မှာကျင်းပမယ့် အာဆီယံထိပ်သီးအစည်းအဝေးကို နိုင်ငံပေါင်း ၂၂ နိုင်ငံ နဲ့ အဖွဲ့စည်းပေါင်း ၉ ဖွဲ့တက်ရောက်ဖွယ်ရှိနေပါတယ်"လို့ပြောပါတယ်။

အင်ဒိုနီးရှားနိုင်ငံခြားရေးဝန်ကြီးဟာ အစည်းအဝေးကိုတက်ရောက်မယ့် နိုင်ငံ၊ အဖွဲ့အစည်းတွေရဲ့အမည်ကိုအတိအကျထုတ်ဖော်ပြောဆိုခြင်းမရှိပေမယ့် အင်ဒိုနီးရှား သမ္မတ ဝီဒိုဒိုဟာ အပြန်အလှန်အစည်း အဝေးအများအပြားကို တက်ရောက်ရဖွယ်ရှိနေတယ်လို့ ဆိုပါတယ်။ တရုတ်နိုင်ငံဟာ အာဆီယံထိပ်သီးအစည်းအဝေးကို တက်ရောက်မယ်လို့ကြေညာထားပေမယ့် သမ္မတရှီကျင့်ဖျင် ကိုယ်တိုင်တက်ရောက်ဖို့ မသေချာကြောင်းသိရပါတယ်။ တရုတ်နိုင်ငံဟာ အာဆီယံထိပ်သီးအစည်းအဝေးကို ပုံမှန်အားဖြင့် ဝန်ကြီးချုပ်ကိုသာ စေလွှတ်လေ့ရှိကြောင်းသိရပါတယ်။ အမေရိကန်နိုင်ငံကလည်း အာဆီယံထိပ်သီးအစည်းအဝေးကို သမ္မတ ဂျိုးဘိုင်ဒန်တက်ရောက်မှာမဟုတ်ဘဲ ဒုတိယသမ္မတ ကာမာလာ ဟာရစ်တက်ရောက်ဖွယ်ရှိနေပြီး သမ္မတ ဂျိုးဘိုင်ဒန်ကတော့ အိန္ဒိယနိုင်ငံက အိမ်ရှင်အဖြစ်လက်ခံကျင်းပမယ့် ဂျီ ၂၀ ထိပ်သီးအစည်းအဝေးကို တက်ရောက်ဖွယ်ရှိနေပါတယ်။

မြန်မာနိုင်ငံဟာ အာဆီယံအဖွဲ့နဲ့ရရှိထားတဲ့ တူညီဆန္ဒငါးရပ်ကို သိသာတိုးတက်အောင် အကောင်အ ထည် မဖော်နိုင်ဘူးဆိုရင် အာဆီယံထိပ်သီးအစည်းအဝေးနဲ့ အာဆီယံနိုင်ငံခြားရေးဝန်ကြီးများအစည်းအဝေးကို မြန်မာကိုယ်စားပြုအဖြစ် နိုင်ငံရေးအရ ကိုယ်စားပြုခွင့်မရှိသူများသာ တက်ရောက်ခွင့်ပေးဖို့ ဆုံးဖြတ်ထားကြောင်းသိရပါတယ်။ နစကအကြီးအကဲ နဲ့ နိုင်ငံခြားရေးဝန်ကြီးတို့ဟာ ၂၀၂၁ ခုနှစ်နောက်ပိုင်းကတည်းက အာဆီယံအစည်းအဝေးတွေကို ကိုယ်တိုင်တက်ရောက်ခွင့်မရတော့ကြောင်းသိရပါတယ်။ ၄၃ ကြိမ်မြောကျင်းပမယ့် အာဆီယံထိပ်သီးအစည်းအဝေးကို စက်တင်ဘာလ ၅ ရက်ကနေ ၇ ရက်အထိ ကျင်းပသွားမှာဖြစ်ကြောင်း သိရပါတယ်။