မျိုးကြီး (NSS) - သြဂုတ် ၂၉

KNU ဥက္ကဋ္ဌဟောင်း စောမူတူးစေးဖိုးအနေဖြင့် ငြိမ်းချမ်းရေးအကြောင်းကို ဒေသခံများနှင့်ထိတွေ့ကာ ပြောဆိုရှင်းပြမှုများ လာကြောင်း သတင်းရရှိသည်။

ဥက္ကဋ္ဌဟောင်းစောမူတူးစေးဖိုးသည် ၎င်းလက်ထက်အတွင်း ပြည်တွင်းငြိမ်းချမ်းရေး ကြိုးစားခဲ့မှုများအပေါ် ဂုဏ်ပြုပွဲအား ယနေ့(သြဂုတ်လ ၂၉ ရက်)တွင် KNU တပ်မဟာ(၆)နယ်မြေ၊ ဖါးပြရွာ၌ ကျင်းပခဲ့ကြောင်း သိရသည်။

“KNU ဥက္ကဋ္ဌဟောင်းက လိုက်လံဆွေးနွေးတာမဟုတ်ပါဘူး။ ကျွန်တော်တို့ ဖါးပြရွာသားအနေနဲ့ ကျေးရွာနေပြည်သူတွေအနေနဲ့ ဒီပြည်တွင်းငြိမ်းချမ်းရေးကို အပတ်တကုပ်ကြိုးစားခဲ့တဲ့ အဖိုးမူတူးကို ဂုဏ်ပြုချင်တဲ့အပေါ်မှာ ဒီဖါးပြရွာကနေပြီးတော့မှ သူ့ကိုဂုဏ်ပြုပွဲလေးလုပ်ပေးတာပါ။ အဲဒါပါပဲ”ဟု ဒူးပလာယာခရိုင်ဥက္ကဋ္ဌ ပဒိုစောရွှေမောင်းက NSS ကို ပြောသည်။

ငြိမ်းချမ်းရေးအတွက် ကြိုးပမ်းခဲ့သော KNU ဥက္ကဋ္ဌဟောင်း စောမူတူးစေးဖိုးအား ဂုဏ်ပြုပွဲကို ပဒိုစောရွှေမောင်းနှင့် ဖါးပြရွာသားများက ပြုလုပ်ပေးခဲ့ခြင်းဖြစ်ကြောင်း သိရသည်။

“ဒီမနက် လုပ်တယ်။ ၉ နာရီမှာလုပ်တယ်။ ၁၂ နာရီမှာ ပြီးမြောက်တယ်။ အဖိုးမူတူးက သူ့မှာက တာဝန်မရှိတော့ဘူးပေါ့နော်။ KNU အစည်းအရုံးအနေနဲ့ တာဝန်မရှိတဲ့အပေါ်မှာ ကရင်ပြည်သူတစ်ယောက်အနေနဲ့တော့ အမျိုးသားတွေရဲ့ လိုလားတောင်းတမှုကို ပြည့်ဝဖို့အတွက် သူကလည်းပဲ အမျိုးသားရေးတာဝန်ကို ကျရာနေရာကနေပြီးတော့ ဆောင်ရွက်ပေးဖို့ သူ့မှာဆန္ဒရှိတဲ့အကြောင်းတော့ ပြောသွားပါတယ်” ဟု ပဒိုစောရွှေမောင်းက ဆက်လက်ပြောသည်။

ထို့ပြင် KNU ဥက္ကဋ္ဌဟောင်းစောမူတူးစေးဖိုးက နိုင်ငံအတွင်း၌ မငြိမ်းမချမ်းဖြစ်ပေါ်နေမှု ငြိမ်းချမ်းအောင်ဆောင်ရွက်ရန်မှာ နိုင်ငံသားတိုင်းတွင် တာဝန်ရှိသကဲ့သို့ ကရင်အမျိုးသားထုနေထိုင်ရာဒေသများတွင်လည်း ငြိမ်းချမ်းရေးရရှိရန် မိမိအပေါ်တွင်လည်း တာဝန်ရှိကြောင်း ထည့်သွင်းပြောဆိုခဲ့သည်ဟု သိရသည်။

အလားတူ KNU ဒူးပလာယာခရိုင်ဥက္ကဋ္ဌပဒိုစောရွှေမောင်းကလည်း အားလုံးသည် ငြိမ်းချမ်းလိုကြောင်းနှင့် ငြိမ်းချမ်းရေးအတွက် ကြံဆောင်ရာတွင် နည်းလမ်းကွဲလွဲမှုများရှိနေ၍သာ ယခုကဲ့သို့ အကွဲကွဲအပြားပြားဖြစ်နေခြင်းဖြစ်ကြောင်းလည်း သုံးသပ်ထားသည်။

ဆက်လက်ပြီး KNU ဥက္ကဋ္ဌစောမူတူးစေးဖိုး၏ ငြိမ်းချမ်းရေးလုပ်ကိုင်လိုမှုဆန္ဒနှင့်ပတ်သက်၍လည်း ပဒိုစောရွှေမောင်းက “သူ့ရဲ့စဉ်းစားမှု၊ သူ့ရဲ့ဆန္ဒရှိပါတယ်။ အဲဒါတွေက ရှိပါတယ်။ သူ့ဆန္ဒရှိတယ် အခြေအနေပေးရင် ပေးသလိုပေါ့နော် ဆောင်ရွက်လို့ရတဲ့အနေအထားရှိခဲ့မယ်ဆိုလို့ရှိရင် ရှေ့ဆက်ဆောင်ရွက်ဖို့ ရှိတာပေါ့” ဟု ပြောသည်။

ပြီးခဲ့သည့် သြဂုတ်လ ၂၆ ရက်တွင်လည်း KNU တပ်မဟာ(၆)နယ်မြေ၊ မဲကသာရွာ၌ ဥက္ကဋ္ဌဟောင်းစောမူတူးစေးဖိုးသည် ခရိုင်ဥက္ကဋ္ဌ၊ ခရိုင်အမှုဆောင်များ၊ တပ်ရင်းများမှ တာဝန်ရှိသူများနှင့်တွေ့ဆုံခဲ့ပြီး ငြိမ်းချမ်းရေးကိစ္စရပ်များကိုလည်း ထည့်သွင်းပြောဆိုမှုများရှိခဲ့ကြောင်း သိရသည်။

“ဒီမနက်လည်း လုပ်တယ်။ အခုအပြင်းအထန်းဆုံးဖြစ်နေတာက တပ်မဟာ(၆)နယ်မြေပေါ့။ ဒါပေမယ့် အခုသွားပြောနေတဲ့ဟာက ဒေါနတောင်အနောက်ခြမ်း ကော့ကရိတ်နဲ့ ဘုရားသုံးဆူကြားမှာရှိတဲ့ ဧရိယာက ကျေးရွာတွေမှာ သွားပြောနေတာပေါ့။ အခုဟာကတော့ သူက လွတ်လွတ်လပ်လပ်ပြောလို့ရပြီပေါ့။ KNU အကြောင်း ပြောစရာမလိုတော့ဘူးလေ။ အတွေ့အကြုံရှိတဲ့ လူတစ်ယောက်အနေနဲ့ပဲ ငြိမ်းချမ်းရေးအကြောင်းပြောတော့ သူပြောရတာ ပိုကောင်းတာပေါ့။ အဖွဲ့အစည်းကို ကိုယ်စားပြုနေရာစရာ မလိုတော့ဘူးလေ”ဟု KNU နှင့်နီးစပ်သော သတင်းအရင်းအမြစ်တစ်ဦးက NSS ကိုပြောသည်။

ဥက္ကဋ္ဌဟောင်းစောမူတူးစေးဖိုးအနေဖြင့် ငြိမ်းချမ်းရေးအတွက် ရှေ့ထွက်ကာ ယခုကဲ့သို့ ထိတွေ့ပြောဆိုမှုများပြုလုပ်ခြင်း ဖြစ်နိုင်ကြောင်းနှင့် အခြားသော ကျေးရွာဒေသခံများနှင့်လည်း ဆက်လက်တွေ့ဆုံသွားဖွယ်ရှိကြောင်း အထက်ပါသတင်းအရင်းအမြစ်က သုံးသပ်ထားသည်။

ထို့ပြင် တပ်မဟာ(၆)နယ်မြေရှိ ဒေသခံတစ်ဦးကလည်း “အဓိကတော့ ဒေသတွင်းမှာ ငြိမ်းချမ်းချင်တဲ့ဟာပေါ့။ အဲဒီတော့ အခုက လူထုနဲ့စပြီးတွေ့ဆုံတာပေါ့။ အားလုံးကလည်း စိတ်ဝင်စားနေကြတယ်။ ဒေသတွင်းငြိမ်းချမ်းမှ ဖြစ်မှာပေါ့လေ။ မငြိမ်းချမ်းရင် အကုန်လုံး အိုးမဲ့အိမ်မဲ့ကြတယ်။ အစ်ကို ကိုယ်တိုင်လည်း အိမ်မှာမနေနိုင်တဲ့ဘဝ ဖြစ်နေတာကို။ အဓိကတော့ ဒေသတွင်းမှာ အရမ်းငြိမ်းချမ်းချင်တယ်” ဟု NSS ကို ဖွင့်ဟပြောကြားထားသည်။

ကရင်အမျိုးသားအစည်းအရုံး(KNU)ဥက္ကဋ္ဌဟောင်း စောမူတူးစေးဖိုးသည် ယခုနှစ် ဧပြီလအတွင်း ကျင်းပခဲ့သော (၁၇)ကြိမ်မြောက်ညီလာခံ၌ ပါဝင်အရွေးချယ်ခံခြင်းမရှိတော့ဘဲ ဥက္ကဋ္ဌအဖြစ်မှ အနားယူခဲ့ခြင်းဖြစ်သည်။ 

KNU ဥက္ကဋ္ဌသစ်အဖြစ် ပဒိုစောကွယ်ထူးဝင်းဖြစ်လာခဲ့ပြီး တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA)အပေါ်တွင် လိုက်နာစရာအကြောင်းမရှိတော့ကြောင်း ထုတ်ဖော်ပြောဆိုထားသည်။