NSS - ဩဂုတ် ၂၈

ရန်ကုန်မြို့မှလျှပ်စစ်သုံး EV ကား အသုံးပြုသူနှစ်ဦးမှ ဇီးရိုးမိုင်နှင့် (115) မိုင်ရှိ Charging Station များတွင် EV ကားအားသွင်းသည့် Charger(CCS2 Chargers) အသုံးပြုမရသဖြင့် စားသုံးသူရေးရာဦးစီးဌာန (DOCA)ကို တိုင်ကြားလာခြင်းကြောင့် ဖြေရှင်းဆောင်ရွက်ပေးခဲ့ကြောင်း သိရသည်။

တိုင်ကြားသူ (၂) ဦးသည်ဇွန်လ(၃)ရက်တွင် ရန်ကုန်မှနေပြည်တော်သို့ MG ZS EV ကားဖြင့်လည်း ကောင်း၊ ဇွန်လ(၄)ရက်တွင် ရန်ကုန်မှ မန္တလေးသို့ MG4 EV ကားဖြင့်လည်းကောင်း အသီးသီးခရီးထွက်လာခဲ့ရာ လျှပ်စစ်ကားများဖြင့်ခရီးသွားရာတွင် အားသွင်းရန်အတွက် အဓိကမိုင်တိုင်များဖြစ်သည့် (0) မိုင်နှင့် (115) မိုင်တိုင်ရှိ Charging Station များတွင် EV ကားများဝင်ရောက်အားသွင်းရာ CCS2 Charger များသည် အသုံးပြု၍မရဘဲ ချို့ယွင်းနေသည့်အတွက် အမြန်ဆုံးစစ်ဆေးပြင်ဆင်ပေးပါရန် Email မှတဆင့်ဇွန်လ(၂၇)ရက်တွင် တိုင်ကြားခဲ့ခြင်းဖြစ်ကြောင်း သိရသည်။

ယင်းတိုင်ကြားမှုနှင့်ပတ်သက်၍ စားသုံးသူရေးရာဦးစီးဌာန(ရုံးချုပ်)က လျှပ်စစ်သုံးယာဉ်နှင့်ဆက် စပ်လုပ်ငန်းများ ရင်းနှီးမြှုပ်နှံမှုနှင့် တင်သွင်း၊ တင်ပို့၊ တပ်ဆင်၊ ထုတ်လုပ်မှုမြှင့်တင်ရေးလုပ်ငန်း ကော်မတီဥက္ကဋ္ဌထံသို့ သက်ဆိုင်ရာကုမ္ပဏီများသို့ အမြန်ပြင်ဆင်ပေးနိုင်ရေး ညွှန်ကြားပေးနိုင်ပါရန် တင်ပြဆောင်ရွက်ခဲ့ကြောင်း သိရသည်။ 

အဆိုပါတိုင်းကြားမှုအပေါ် စိစစ်ဆောင်ရွက်ရာ 0 မိုင်၊ ၁၁၅ မိုင်တိုင်ရှိ  Charger များတွင် MG ZS Model တံဆိပ်ကားများမှာ အားသွင်းမှုမရသည့် Software စနစ်ချိုယွင်းနေခြင်းဖြစ်ပြီး သက်ဆိုင်ရာကုမ္ပဏီမှ နိုင်ငံခြားသားပညာရှင်များနှင့်ဆက်သွယ်၍ EV Chargers များ၏ Software များအား Upgrade ပြုလုပ်ပြီးဖြစ်သောကြောင့် MG ZS Model တံဆိပ်ကားများ အားသွင်းနိုင်ပြီဖြစ်ကြောင်း သိရသည်။

ထို့ပြင် ယခုတပ်ဆင်ထားသော Charger များထက် အဆင့်မြင့်အမျိုးအစား ဖြစ်သည့် Autel Digital Power Co., Ltd မှ ထုတ်လုပ်သည့် Autel Brand 60 KW CCS2 Dual Gun Chargers (2 Units) နှင့် Autel Brand 120 KW CCS2 Dual Gun Charger (1 Units)များကို အစားထိုး လဲလှယ်နိုင်ရေး ဆောင်ရွက်နေကြောင်း၊ အစားထိုးလဲလှယ်မည့် CCS2 Autel Chargers များအား တပ်ဆင်နိုင်ရန်မှာယူ တင်သွင်းမှုဆောင်ရွက်နေစဉ် ကာလအတွင်း ယခုအသုံးပြုနေသော CCS2  Chargers များနှင့် အားသွင်းမရသော ကားများရှိလာပါက အရေးပေါ် အားသွင်းပေးနိုင်ရန် CCS2 11 KW AC Level 2 Chargers များကို 0 မိုင်၊ ၁၁၅ မိုင်နှင့် ၂၀၁ မိုင်တိုရှိ Charging Station များတွင် တပ်ဆင်ဆောင်ရွက်ပြီး ဖြစ်ကြောင်း အကြောင်းပြန်ကြားလာသည်ဟု အသိပေးထားသည်။

စားသုံးသူရေးရာဦးစီးဌာနမှ တာဝန်ရှိသူများက တိုင်ကြားသူများသို့ ဆောင်ရွက်ထားရှိမှု အခြေအနေများအား အသိပေးရှင်းလင်းပြန်ကြားခဲ့ပြီး တိုင်ကြားမှုကို ပိတ်သိမ်းဆောင်ရွက်ခဲ့ကြောင်းထုတ်ပြန်ချက်တွင် ဖော်ပြထားသည်။