Pika (NSS) - သြဂုတ် ၂၇ 

မန်ယူအသင်းသည် ဩဂုတ်လ(၂၆)ရက် ညက နော်တင်ဟမ်ဖောရက်စ်အသင်းနှင့်ကစားခဲ့သည့် ပရီးမီးယားလိဂ်ပွဲ တွင် (၃)ဂိုး (၂)ဂိုးဖြင့် အနိုင်ရရှိခဲ့သော်လည်း မန်ယူအသင်းနည်းပြတန်ဟက်က ၎င်း၏ အသင်းကစားသမားများ၏ ဆိုးရွားသော စတင်မှုများကို ပြစ်တင်ဝေဖန်ခဲ့ကြောင်း သိရသည်။

နော်တင်ဟမ်ဖောရက်စ်အသင်းနှင့်ကစားခဲ့သည့်ပွဲတွင် မန်ယူအသင်းသည် ပွဲစစပြီးချင်းလေးမိနစ်အတွင်း (၂)ဂိုး သွင်းခံခဲ့ရသည့်အတွက် စိတ်ပျက်သွားခဲ့ကြောင်း မန်ယူနည်းပြတန်ဟက် က ပြောခဲ့သည်။ 

နော်တင်ဟမ်ဖောရက်စ်အသင်းတိုက်စစ်မှူး Taiwo Awoniyi သည် ပွဲချိန်(၂)မိနစ်တွင် အဖွင့်ဂိုးကို သွင်းယူခဲ့ပြီး နောက်တန်းကစားသမား Willy Boly က ပွဲချိန်(၄)မိနစ်တွင် တစ်ဂိုးထပ်မံသွင်းယူခဲ့ခြင်းဖြစ်ကြောင်း သိရသည်။ ထို့နောက် မန်ယူအသင်းကွင်းလယ်ကစားသမား အဲရစ်ဆန်သည် ပွဲချိန်(၁၇)မိနစ်တွင် ချေပဂိုးပြန်လည်သွင်းယူခဲ့ ပြီး ကွင်းလယ်ကစားသမားကတ်စမဲရိုးသည် ပွဲချိန်(၅၂)မိနစ်တွင် နောက်ထပ်တစ်ဂိုး ထပ်မံသွင်းယူ ပေးနိုင်ခဲ့ခြင်း ဖြစ်သည်။

ထို့နောက် မန်ယူကွင်းလယ်ကစားသမား ဖာနန်ဒက်ဇ်သည် ပွဲချိန်(၇၆)မိနစ်တွင် ပင်နယ်တီကန်သွင်းခွင့် ရခဲ့ပြီး နောက် တစ်ဂိုးထပ်မံသွင်းယူနိုင်ခဲ့ကာ (၃)ဂိုး (၂)ဂိုးဖြင့် အနိုင်ရရှိခဲ့ခြင်းဖြစ်သည်။ မန်ယူနည်းပြတန်ဟက် က "တကယ်ကို ဆိုးရွားတဲ့ စတင်မှုတစ်ခုပါပဲ။ ပထမလေးမိနစ်အတွင်းမှာ ကျွန်တော်တို့ နှစ်ဂိုးပေးခဲ့ရပြီး အမှားတွေ လုပ်ခဲ့မိပါတယ်။ ဒါပေမယ့်လည်း ပွဲချိန်(၁၅)မိနစ်လောက်မှာ ကျွန်တော်တို့ ပြန်လည်ဦးဆောင်ကစားလာနိုင်ပြီး ဂိုးတွေ ပြန်လည်သွင်းယူနိုင်ခဲ့ပါတယ်။ နော်တင်ဟမ်ဖောရက်စ်အသင်းနဲ့ကစားခဲ့တဲ့ပွဲမှာ ကျွန်တော်တို့ အကောင်းဆုံးခြေစွမ်းပြကစားနိုင်ခဲ့ပြီး အကောင်းဆုံးဂိုးတွေသွင်းယူနိုင်ခဲ့တယ်လို့ ထင်ပါတယ်" ဟု ပြောခဲ့သည်၊၊