Pika (NSS) - ဩဂုတ် ၂၆

အနောက်အုပ်စုနိုင်ငံများသည် BRICS အဖွဲ့ဝင်နိုင်ငံများအပေါ် ရန်လိုသည့်မူဝါဒများကို ဆက်လက်ထားရှိနေသရွေ့ ၎င်းတို့အားလုံးသည် BRICS အဖွဲ့တွင် ပါဝင်ခွင့်ရနိုင်မည်မဟုတ်ကြောင်း  ရုရှားလက်ထောက်နိုင်ငံခြားရေးဝန်ကြီး Sergey Ryabkov က ထုတ်ဖော်ပြောဆိုခဲ့သည်။

BRICS အဖွဲ့သို့ဝင်ခွင့်ရရန်အတွက် အဓိကအချက်များထဲမှတစ်ခုသည် အဖွဲ့ဝင်နိုင်ငံများအပေါ် တရားမဝင်ပိတ်ဆို့အရေးယူမှုများ မလုပ်ဆောင်ရန် ဖြစ်ကြောင်း Sergey Ryabkov ကပြောဆိုခဲ့သည်။ တောင်အာဖရိကနိုင်ငံ ဂျိုဟန်နက်စ်ဘာ့ချ်မြို့တွင်ကျင်းပသော BRICS ထိပ်သီးအစည်းအဝေးအပြီး သတင်းစာရှင်းလင်းပွဲတွင် Sergey Ryabkov က အထက်ပါကဲ့သို့ပြောဆိုခဲ့ခြင်း ဖြစ်ကြောင်းသိရသည်။

ထို့ပြင် BRICS အဖွဲ့တွင်ပါဝင်ရန်အတွက် ဖိတ်ကြားခံခဲ့ရသော အာဂျင်တီးနား၊ အီဂျစ်၊ အီသီယိုးပီးယား၊ အီရန်၊ ဆော်ဒီအာရေဗျ နှင့် ယူအေအီးတို့သည် အဆိုပါအချက်အလက်များကို အပြည့်အဝလိုက်နာကြောင်း ၎င်းကမှတ်ချက်ပြုပြောဆိုခဲ့သည်။ အနောက်အုပ်စုနိုင်ငံများသည် အဆိုပါအချက်အလက်များကို လိုက်နာခြင်းမျိုးမရှိသည့်အပြင် ဆန့်ကျင်ဘက်လမ်းစဉ်ကို လိုက်နာနေကြခြင်းကြောင့် BRICS အဖွဲ့တွင် ပါဝင်ခွင့်မရရုံသာမက BRICS အဖွဲ့၏ အစည်းအဝေးပွဲများကိုလည်း တက်ရောက်ရန် ဖိတ်ကြားခံရမည်မဟုတ်ကြောင်း Sergey Ryabkov ကပြောဆိုခဲ့သည်။

သို့သော်လည်း ပိတ်ဆို့အရေးယူမှုများချမှတ်သည့် မူဝါဒများကို စွန့်လွှတ်မည့် အနောက်အုပ် စုနိုင်ငံများသည်  BRICS အဖွဲ့ဝင်အဖြစ် ဝင်ရောက်ခွင့်ရရန်အတွက် လျှောက်လွှာတင်ခြင်းများကို လုပ်ဆောင်နိုင်ကြောင်း Sergey Ryabkov ကပြောကြားခဲ့သည်။ ယူကရိန်းစစ်ပွဲနှင့်ပတ်သက်ပြီး အနောက်အုပ်စုနိုင်ငံများသည် BRICS အဖွဲ့ဝင် ရုရှားကို ပိတ်ဆို့အရေးယူမှုများ အကြိမ်ကြိမ် ချမှတ်ခဲ့ကြောင်းသိရသည်။ 

ရုရှားက အနောက်အုပ်စုနိုင်ငံများ၏ပိတ်ဆို့အရေးယူမှုများသည် တရားမဝင်ကြောင်းပြောဆိုကာ ပြစ်တင်ရှုတ်ချခဲ့ကြောင်းသိရသည်။ ၂၀၂၁ ခုနှစ်တွင် ဥရောပသမဂ္ဂက BRICS အဖွဲ့ဝင်တရုတ်နိုင်ငံသည် လူ့အခွင့်အရေးချိုးဖောက်မှုမျာားရှိသည်ဟု စွပ်စွဲကာ ပိတ်ဆို့အရေးယူမှုများချမှတ်ခဲ့ကြောင်းသိရသည်။