ဂျန်ဇက် (NSS) - ဩဂုတ် ၂၅

အမေရိကန်စစ်ဌာနချုပ်ပင်တဂွန်က ယူကရိန်းတိုက်လေယာဉ်မှူးများကို လာမယ့်လမှ အက်ဖ် ၁၆ တိုက်လေယာဉ်များ အသုံးပြုပုံနဲ့ပတ်သက်ပြီး လေ့ကျင့်ပျံသန်းမှုတွေကို သင်ကြားပေးသွားမှာဖြစ်ကြောင်း ထုတ်ဖော်ပြောကြား လိုက်ပါတယ်။

ယူကရိန်းဟာ ရုရှားတပ်ဖွဲ့ရဲ့ထိုးစစ်ဆင်မှုတွေကို ရင်ဆိုင်နိုင်အောင် အက်ဖ် ၁၆ တိုက်လေယာဉ်များ ရယူလိုနေပြီး ရုရှားတပ်ဖွဲ့တွေ သိမ်းပိုက်ထားတဲ့ဒေသတွေကို ပြန်လည်သိမ်းယူနိုင်ဖို့ ပြည့်ဝတဲ့တန်ပြန်ထိုးစစ်ဆင်မှုတွေ လုပ်ဆောင်ဖို့ စေ့စပ်ဆွေးနွေးနေကြောင်း သိရပါတယ်။ 

အမေရိကန်စစ်ဌာနချုပ်ရဲ့ပြောရေးဆိုခွင့်ရှိသူပတ်ရိုင်ဒါက အမေရိကန်နိုင်ငံမှာ လေ့ကျင့်သင်ကြားပေးမယ့် အက်ဖ် ၁၆ တိုက်လေယာဉ်များ အသုံးပြုပုံနဲ့ပတ်သက်ပြီး သင်တန်းကို ယူကရိန်းတိုက်လေယာဉ်မှူး ဒါဇင်ချီ ပါဝင် လေ့ကျင့်သင်ကြားဖွယ်ရှိနေကြောင်း ပြောပါတယ်။

၎င်းက "လေယာဉ်မှူးတွေကို တက်ဆက်ပြည်နယ် Lackland လေတပ်အခြေစိုက်စခန်းမှာ အင်္ဂလိပ်စာ ဘာသာစကားသင်ကြားပေးမှာဖြစ်ပါတယ်။ အင်္ဂလိပ်စာ သင်ကြားပြီးချိန်မှာ လေယာဉ်မှူးတွေကို အရီဇိုးနားပြည်နယ်မှာ အက်ဖ် ၁၆ တိုက်လေယာဉ်များ ပြုပြင်ထိန်းသိမ်းပုံနဲ့ လေ့ကျင့်သင်ကြားမှုတွေ လုပ်ဆောင်ပေးသွားမှာပါ" လို့ ပြောပါတယ်။

အက်ဖ် ၁၆ တိုက်လေယာဉ်များနဲ့ လေ့ကျင့်သင်ကြားမှုတွေကို အရီဇိုးနားပြည်နယ် Morris  လေတပ်အခြေစိုက် စခန်းမှာ လုပ်ဆောင်သွားမှာဖြစ်ကြောင်း ၎င်းက ပြောပါတယ်။ ယူကရိန်းသမ္မတ ဇီလန်စကီးနဲ့ အမေရိကန်သမ္မတ ဂျိုးဘိုင်ဒန်တို့ဟာ ပြီးခဲ့တဲ့ရက်ပိုင်းမှာ အက်ဖ် ၁၆ တိုက်လေယာဉ်များ နဲ့ ပတ်သက်ပြီး ယူကရိန်း လေယာဉ်မှူးများ ကို လေ့ကျင့်သင်ကြားပေးမယ့်အစီအစဉ်ကို ဆွေးနွေးခဲ့ကြောင်း သိရပါတယ်။

အမေရိကန်အစိုးရက "သမ္မတဂျိုးဘိုင်ဒန်ဟာ ရုရှားရဲ့တိုက်ခိုက်မှုတွေကို ကာကွယ်နိုင်အောင် ယူကရိန်းကို ကူညီထောက်ပံ့ပေးမယ်လို့ ထပ်မံကတိပြုခဲ့ပါတယ်" လို့ပြောပါတယ်။

ယူကရိန်းကို အက်ဖ် ၁၆ တိုက်လေယာဉ်များ ကူညီပေးမယ့်အစီအစဉ်နဲ့ပတ်သက်ပြီး အမေရိကန်အစိုးရအပေါ် မြောက်ကိုရီးယားစစ်ဘက်က ဝေဖန်ပြစ်တင်ထားကြောင်း သိရပါတယ်။ အမေရိကန်အစိုးရဟာ ယူကရိန်းကို အက်ဖ် ၁၆ တိုက်လေယာဉ်များ ကူညီထောက်ပံ့ပေးပြီး ကမ္ဘာကြီးကို ပိုမိုအန္တရာယ်ဖြစ်အောင်လုပ်ဆောင်ကာ နျူကလီးယားစစ်ပွဲဖြစ်လာစေဖို့ ဖန်တီးနေကြောင်း မြောက်ကိုရီးယားကာကွယ်ရေးဝန်ကြီးကင်ဆူနမ်က ဝေဖန် ပြစ်တင်ထားပါတယ်။