Pika (NSS) - ဩဂုတ် ၁၆

အီကွေဒေါနိုင်ငံရှိ နိုင်ငံရေး ပါတီခေါင်းဆောင်တစ်ဦးဖြစ်သော Pedro Briones သည် ဩဂုတ်လ(၁၄)ရက်က  Esmeraldas ပြည်နယ်ရှိ ၎င်း၏နေအိမ်တွင် သေနတ်သမားများ၏ ပစ်ခတ်လုပ်ကြံခြင်းကို ခံခဲ့ရကြောင်း သိရ သည်။

အဆိုပါလုပ်ကြံမှုသည် အီကွေဒေါနိုင်ငံတွင် နိုင်ငံရေးအရ လှုံ့ဆော်သည့် လုပ်ကြံသတ်ဖြတ်မှုများတွင် နောက်ဆုံး ဖြစ်ပွားသည့် အကြိမ်ဖြစ်ကြောင်းလည်း သိရသည်။ ဩဂုတ်လ(၉)ရက်က  Quito မြို့တွင် သမ္မတလောင်း Fernando Villavicencio လုပ်ကြံသတ်ဖြတ်ခံရပြီးနောက် ငါးရက်အကြာတွင် ယခုကဲ့သို့ လုပ်ကြံမှုထပ်မံဖြစ်ပွားခဲ့ခြင်းဖြစ်သည်။

Citizen Revolution ပါတီအဖွဲ့ဝင်လူးဝစ်ဂွန်ဆာလက်က "အီကွေဒေါနိုင်ငံဟာ သွေးထွက်သံယိုဖြစ်မှုတွေ အများဆုံးခေတ်ကို ရောက်ရှိနေပါပြီ။ Pedro Briones ဟာ အကြမ်းဖက်အဖွဲ့တွေရဲ့လုပ်ကြံမှုကို ခံခဲ့ရပါတယ်" ဟု ပြောခဲ့သည်။ Pedro Briones လုပ်ကြံခံရပြီးနောက် သမ္မတလောင်းဖြစ်သူ လူးဝစ်ဂွန်ဆာလက် သည် လုံခြုံရေးများ ကို တိုးမြှင့်ခဲ့သော်လည်း ကျည်ကာအင်္ကျီကိုဝတ်ဆင်ရန် ငြင်းဆန်ခဲ့ကြောင်းသိရသည်။

၎င်းက "ကျွန်မ ဘုရားသခင်ကို ယုံကြည်ပါတယ်။ ဘုရားသခင်က ကျွန်မတို့ကို အမြဲကြည့်ရှုစောင့်ရှောက်ပါတယ်" ဟု ပြောခဲ့သည်။ Citizen Revolution ပါတီကို တည်ထောင်သူ အီကွေဒေါသမ္မတဟောင်း Rafael Correa က "လုပ်ကြံသတ်ဖြတ်သူတွေဟာ ကျွန်တော်တို့ရဲ့လုပ်ဖော်ကိုင်ဖက်တွေကို Esmeraldas ပြည်နယ်မှာ သတ်ပစ်ခဲ့ပါ တယ်။ ဒါက ရပ်တန့်သင့်ပါပြီ" ဟု ပြောခဲ့သည်။ 

အာဏာပိုင်များသည် Pedro Briones အသတ်ခံရမှုနှင့်ပတ်သက်သည့် အသေးစိတ်အချက်အလက်များကို ထုတ်ပြန်ပြောကြားခြင်းမျိုးမရှိသော်လည်း သေနတ်သမားများသည် လုပ်ကြံသတ်ဖြတ်ပြီးနောက် မော်တော် ဆိုင်ကယ်ဖြင့် ထွက်ပြေးသွားသည်ဆိုသည့်အချက်ကိုသာ ပြောကြားခဲ့ကြောင်း သိရသည်။ ကိုလံဘီယာနိုင်ငံနှင့် အီကွေဒေါနယ်စပ်တွင် တည်ရှိသော  Esmeralas ပြည်နယ်သည် အမေရိကန် နှင့် ဥရောပသို့ မူးယစ်ဆေးဝါးများ အထူးသဖြင့် ကိုကင်း အများအပြားတင်ပို့နေသည့် နေရာတစ်ခုဖြစ်ပြီး အကြမ်းဖက်မှုများကြောင့် အဆိုးရွားဆုံး ထိခိုက်မှုများရှိသည့်ဒေသတစ်ခုဖြစ်ကြောင်းလည်း သိရသည်။