Pika (NSS) - ဩဂုတ် ၁၆

လက်နှစ်ဖက်လုံးကို လက်ကောက်ဝတ်ထိဖြတ်တောက်ခံထားရသော အသက်(၄၇)နှစ်အရွယ် စပိန်မသန်စွမ်း စက်ဘီးစီးသမား Ricardo Ten Argiles သည် ပြီးခဲ့သည့်သီတင်းပတ်က ကျင်းပခဲ့သော 2023 UCI World Championships တွင် အနိုင်ရရှိပြီးနောက် ဈေးကြီးသော အဆင့်မြင့်နာရီ(၂)လုံးကို လက်ခံရရှိခဲ့ကြောင်း သိရသည်။

စကော့တလန်နိုင်ငံ၊ ဂလက်စကိုမြို့တွင် ကျင်းပသောပွဲစဉ်တွင် Ricardo Ten Argiles သည် မတူညီသော ကဏ္ဍသုံးခုတွင် ချန်ပီယံဆုကို ဆွတ်ခူးရရှိခဲ့ခြင်းဖြစ်ကြောင်း သိရသည်။ ချန်ပီယံဆုပေးအပ်သည့် အခမ်းအနားတွင် ၎င်းကို ပွဲစပွန်ဆာ Tissot က ဈေးကြီးသော အဆင့်မြင့်နာရီ(၂)လုံးကို ပေးအပ်ခဲ့ခြင်းဖြစ်ကြောင်း သိရသည်။ 

သို့သော်လည်း အဆိုပါပေးအပ်မှုမှာ လူများ၏ အာရုံစိုက်မှုကို ရရှိစေရန်အတွက် လုပ်ဆောင်ခြင်းမျိုးလည်း မဟုတ် ကြောင်း ပွဲစပွန်ဆာ Tissot က ပြောကြားခဲ့သည်။ Ricardo Ten Argiles ကို အဆင့်မြင့်လက်ပတ်နာရီ(၂)လုံး ပေးအပ်သည့်ဗီဒီယိုဖိုင်အတိုသည် အွန်လိုင်းပေါ်တွင် ပျံ့နှံ့သွားခဲ့ပြီး ကြည့်ရှုသူ လေးသန်းနီးပါး ရှိခဲ့ကြောင်း သိရသည်။

Ricardo Ten Argiles က "Tissot အမျိုးအစား အဆင့်မြင့်လက်ပတ်နာရီနှစ်လုံးကို ရရှိခဲ့တဲ့အတွက် ပျော်ရွှင်ပါ တယ်။ ပြီးတော့ မသန်စွမ်း စက်ဘီးစီးပြိုင်ပွဲမှာ အနိုင်ရရှိခဲ့တဲ့အတွက်လည်း ပျော်မိပါတယ်" ဟု ပြောခဲ့သည်။ Ricardo Ten Argiles သည် အသက်(၈)နှစ်အရွယ်တွင် ဗို့အားမြင့်ဝိုင်ယာကြိုးများကို မတော်တဆကိုင်မိကာ ဓါတ်လိုက်ခဲ့ပြီးနောက် ဆရာဝန်များသည် ၎င်း၏ လက်နှစ်ဖက် နှင့် ဘယ်ခြေထောက်ကို ဖြတ်တောက်ခဲ့ရကြောင်း သိရသည်။

အဆိုပါဓါတ်လိုက်မှုကြောင့် Ricardo Ten Argiles ၏ ခန္ဓာကိုယ်အစိတ်အပိုင်း(၇၅)ရာခိုင်နှုန်းသည် မီးလောင် ဒဏ်ရာများကို ခံစားခဲ့ရကြောင်း သိရသည်။ စကော့တလန်နိုင်ငံတွင် ဩဂုတ်လ (၃)ရက်မှ (၁၃)ရက်အထိ ကျင်းပခဲ့ သည့် ပွဲတွင် Ricardo Ten Argiles သည် ဆုတံဆိပ် စုစုပေါင်း(၁ဝ) ဆုကို ဆွတ်ခူးရရှိခဲ့ကြောင်း သိရသည်။ Ricardo Ten Argiles သည် ရုပ်ပိုင်းဆိုင်ရာ ချို့ယွင်းမှုများရှိနေသော စက်ဘီးစီးသမားများအတွက် ပြုလုပ်သော  C1 အမျိုးအစားပွဲတွင် ဝင်ရောက်ယှဉ်ပြိုင်ခဲ့ခြင်းဖြစ်ကြောင်း သိရသည်။ 

၎င်းသည် လာမည့် ဥရောပချန်ပီယံရှစ်ပြိုင်ပွဲတွင် ပါဝင်ယှဉ်ပြိုင်မည်ဖြစ်ပြီး ၂ဝ၂၄ ခုနှစ်တွင် ပဲရစ်မြို့မှာ ကျင်းမည့် မသန်စွမ်းပြိုင်ပွဲတွင်လည်း ဝင်ရောက်ယှဉ်ပြိုင်နိုင်ရန် မျှော်လင့်ထားကြောင်း သိရသည်။