စော(NSS) - ဩဂုတ် ၁၄

ကချင်ပြည်နယ်၊ မိုးကောင်းမြို့တွင် 66KV မဟာဓာတ်အားလိုင်းအောက်၌ ငါးမျှားနေသည့် အသက် (၂၃)နှစ်အရွယ် အမျိုးသားတစ်ဦး ဓာတ်လိုက်မှုဖြစ်ပွားခဲ့ကြောင်း သိရသည်။

ဖြစ်စဉ်မှာ ယမန်နေ့(ဩဂုတ်လ ၁၃ ရက်)၊ မွန်းလွဲ(၂)နာရီခွဲဝန်းကျင်အချိန်တွင် မိုးကောင်းမြို့နယ်၊ ပင်းဘောကျေးရွာအုပ်စု၊ ဗမောက်ကုန်း နတ်ကြီးစင်ရှေ့၌ အထက်ပါကဲ့သို့ဖြစ်ပွားခဲ့ခြင်းဖြစ်ကြောင်း လက်ကမ်းပရဟိတအသင်းထံမှသိရသည်။

“66KV မဟာဓာတ်အားလိုင်းအောက်မှာဖြစ်သွားတာပါ။ အဲဒီအောက်က အိုင်မှာငါးမျှားရင်းနဲ့ အပေါ်ကို ဆွဲတင်တဲ့အခါ ငါးမျှားကြိုးနဲ့ လိုင်းကြိုးနဲ့လိပ်သွားတာပါ။ တကယ်တမ်း အဲဒီနေရာကငါးမျှားခွင့် မရှိဘူး”ဟု လက်ကမ်းပရဟိတအသင်းမှ တာဝန်ရှိသူတစ်ဦးက NSS ကိုပြောသည်။

အဆိုပါအမျိုးသားသည် အောင်လင်းဦး (၂၃)နှစ်ဖြစ်ပြီး ပင်းဘောကျေးရွာတွင် နေထိုင်သူတစ်ဦးဖြစ် ကြောင်းသိရသည်။

ဓာတ်လိုက်ခံရမှုကြောင့် ၎င်းအမျိုးသား၏ ခန္ဓာကိုယ်တွင် မီးလောင်ဒဏ်ရာ ၇၀ ရာခိုင်နှုန်းနီးပါး ရရှိခဲ့ပြီး မိုးကောင်းတိုက်နယ်ဆေးရုံတွင် ဆေးကုသမှုခံယူနေကြောင်း သိရသည်။