သေဒဏ်အပြစ်ပေးမှုကို ဖျက်သိမ်းလိုက်ကြောင်း ဂါနာအစိုးရ ကြေညာ
Pika (NSS) - သြဂုတ် ၁၃
အတည်ပြုခဲ့သော သေဒဏ်အားလုံးကို တစ်သက်တစ်ကျွန်းအဖြစ် ပြောင်းလဲစေမည့် ဥပဒေမူကြမ်းနှစ်ရပ်ကို ဂါနာသမ္မတ Nana Addo Dankwa Akufo-Addo က ထုတ်ပြန်ကြေညာခဲ့ပြီးနောက် ဂါနာနိုင်ငံသည် သေဒဏ်များ အားလုံးကို ဖျက်သိမ်းလိုက်သည့် နောက်ဆုံးအာဖရိကနိုင်ငံတစ်နိုင်ငံဖြစ်လာခဲ့ကြောင်း သိရသည်။
အဆိုပါဥပဒေကြောင့် ဂါနာနိုင်ငံတွင် လွတ်လပ်ပွင့်လင်းပြီး သာယာဝပြောသောလူ့အဖွဲ့အစည်းတစ်ခုကို တည်ထောင်နိုင်မည်ဖြစ်ကြောင်း ဂါနာအမျိုးသားဒီမိုကရက်တစ်ကွန်ဂရက်ပါတီ (NDC) ပါတီအဖွဲ့ဝင် Francis-Xavier Sosu က ပြောကြားခဲ့သည်။
၎င်းက "ဒီသေဒဏ်ရှိနေသရွေ့ အကျဉ်းသားတွေဟာ ဒီနေ့က ကမ္ဘာကြီးပေါ်မှာ နေထိုင်တဲ့ သူတို့ရဲ့ နောက်ဆုံးနေ့ဖြစ်နိုင်တယ်လို့ တွေးပြီး လန့်နိုးလာကြတာပါ။ သူတို့ဟာ အသက်ရှင်လျက် သေဆုံးနေသူတွေနဲ့ တူပါတယ်။ စိတ်ပိုင်းဆိုင်ရာတွေမှာလည်း ထိခိုက်မှုတွေရှိခဲ့ပါတယ်" ဟု ပြောခဲ့သည်။
ယခင်က ဂါနာနိုင်ငံတွင် လူသတ်မှုကျူးလွန်သူများကို ကွပ်မျက်ခြင်းများ လုပ်ဆောင်လေ့ရှိကြောင်း သိရသည်။ လက်ရှိအချိန်တွင် ဂါနာနိုင်ငံမှာ သေဒဏ်ကျခံနေရသည့် အမျိုးသား(၁၇ဝ)ဦး နှင့် အမျိုးသမီး(၆) ဦး ရှိကြောင်း သိရသည်။ သို့သော်လည်း လက်ရှိထုတ်ပြန်ထားသော ဥပဒေမူကြမ်းအရ ၎င်းတို့၏ သေဒဏ်များကို ထောင်ဒဏ် တစ်သက်တစ်ကျွန်းအဖြစ် ပြောင်းလဲသွားမည်ဖြစ်ကြောင်း သိရသည်။
အဆိုပါဥပဒေမူကြမ်းကို ဂါနာပါလီမန်က ဇူလိုင်လ(၂၅)ရက်တွင် အတည်ပြုခဲ့ခြင်းဖြစ်ပြီး ဩဂုတ်လ(၂) ရက်တွင် ဂါနာသမ္မတရုံးက အတည်ပြုခဲ့ခြင်းဖြစ်ကြောင်း ဒေသတွင်းမီဒီယာများ က ဖော်ပြခဲ့သည်။ ထို့အပြင် သေဒဏ်ပေးမှုကို ဖျက်သိမ်းလိုက်သော နောက်ဆုံးအာဖရိကနိုင်ငံတစ်နိုင်ငံဖြစ်လာစေရန်အတွက် အဆိုပါဥပဒေမူကြမ်းကို ဂါနာပြည်သူအများအပြားက ထောက်ခံခဲ့ကြကြောင်း စစ်တမ်းများအရ သိရသည်။
Francis-Xavier Sosu က "သေဒဏ်ကို ဖျက်သိမ်းလိုက်တာက ကျွန်တော်တို့ဟာ ယုတ်ညံ့ပြီး လူမဆန်တဲ့လုပ်ရပ်တွေ၊ ခေတ်နောက်ပြန်ဆွဲနေတဲ့ လူ့အဖွဲ့အစည်းတစ်ခုမဟုတ်ဖူးဆိုတာကို ပြသနေပါတယ်" ဟု ပြောခဲ့သည်။ လက်ရှိအချိန်တွင် ဂါနာနိုင်ငံသည် သေဒဏ်ပေးမှုကို ဖျက်သိမ်းလိုက်သော အာဖရိကနိုင်ငံများထဲတွင် (၂၉) နိုင်ငံ မြောက်ဖြစ်လာခဲ့ပြီး ကမ္ဘာပေါ်တွင် (၁၂၄)နိုင်ငံမြောက် ဖြစ်လာခဲ့ကြောင်း သိရသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
လပိုင်းအတွင်း အမေရိကန်ဒေါ်လာ(၈)သိန်းနီးပါးကို ပြည်တွင်းဘဏ်များက အသေးသုံးအဖြစ် ငွေသားနှင့်ရောင်းချပေးခဲ့
RELATED POSTS
19 Oct 2024 | နိုင်ငံရေး,နိုင်ငံတကာ
19 Oct 2024 | နိုင်ငံရေး,နိုင်ငံတကာ
19 Oct 2024 | နိုင်ငံရေး,နိုင်ငံတကာ