မြူနစ် (NSS) - သြဂုတ် ၁၂

မြန်မာနိုင်ငံရှိ စာသင်ကျောင်းများကို Safe Zone အဖြစ် သတ်မှတ်ကြေညာပေးရန် အာဆီယံနိုင်ငံ ဘာရေးရေးခေါင်းဆောင်များအစည်းအဝေး၌ IBEC ဆရာတော်က တောင်းဆိုလိုက်သည်။

အာဆီယံနိုင်ငံ ဘာသာရေးခေါင်းဆောင်များအစည်းအဝေးကို ပြီးခဲ့သော ၇ ရက်နှင့် ၈ ရက်တို့တွင် အင်ဒိုနီးရှားနိုင်ငံ၊ ဂျကာတာမြို့၌ ကျင်းပခဲ့သည်။

၎င်းအစည်းအဝေး၌ အထူးဧည့်သည်တော်အဖြစ် တက်ရောက်မိန့်ခွန်းပြောကြားရန်အတွက် ကမ္ဘာ့ငြိမ်း ချမ်းရေးသံတမန်၊ IBEC ဆရာတော် ဦးသောဘိတအား အင်ဒိုနီးရှားသမ္မတ ဂျိုကိုဝီဒိုဒိုက ဖိတ်ကြားခဲ့ကြောင်း သိရသည်။

“အဲဒီတော့ ဘယ်နိုင်ငံမှာပဲဖြစ်ဖြစ် ပဋိပက္ခဖြစ်နေတဲ့ နေရာတောင်မှ ပညာရေး၊ ကျန်းမာရေးတွေနဲ့ပတ် သက်ရင် ဘယ်အဖွဲ့အစည်းကမှ ချုပ်ကိုင်ဖို့ မလုပ်အပ်ဘူး။ ဒါတွေကို တကယ့် Free Zone အဖြစ်နဲ့ Safe Zone အဖြစ်နဲ့ ဆောင်ရွက်ဖို့ သင့်တယ်လို့ အဲဒါကို ဘုန်းဘုန်းက အဓိကထားပြီးတော့ ဆွေးနွေးခဲ့တယ်။ အာဆီယံအနေနဲ့လည်း ဒါကို statement ထုတ်ပြန်ပြီးတော့မှ မေတ္တာရပ်ခံဖို့ အကြံပြုပေးခဲ့တယ်” ဟု ဆရာတော်ဦးသောဘိတက NSS ကို မိန့်ကြားသည်။

ပညာရေး၊ ကျန်းမာရေးကိစ္စများသည် တပ်မတော်နှင့် မဆိုင်သကဲ့သို့ NUG နှင့်လည်း မသက်ဆိုင်ကြောင်း၊ ပညာရေးသည် လူထုနှင့်သာ သက်ဆိုင်ပြီး မည်သည့်အဖွဲ့အစည်းကမျှ အနှောက်အယှက်ပေး၍ မရကြောင်း ဆရာတော်က မိန့်သည်။

“အဲဒါကို အာဆီယံတင် မဟုတ်ဘဲ ကမ္ဘာ့ကုလသမဂ္ဂတို့၊ နိုင်ငံတကာတို့ကပါပေါ့။ ဥပမာ ဒီကျောင်းဟာ ပညာရေးဆိုတာ စစ်တပ်နဲ့လည်း မဆိုင်ဘူး။ NUG နဲ့လည်း မဆိုင်ဘူး။ ပညာရေးသည် လူထုရဲ့ ပညာရေး ဖြစ်တဲ့အတွက် ဒါတွေနဲ့ပတ်သက်တဲ့ဟာကို အနှောက်အယှက်ပေးစရာမလိုဘူး။ အဲဒါမျိုးကို ကျောင်းမှာ လွတ်လပ်စွာ ပညာသင်ကြားတဲ့ဟာ ဆရာ၊ ဆရာမတွေလည်း ပညာသင်ကြားခွင့်ရှိရမယ်။ လုံခြုံမှုရှိရမယ်။ ကျောင်းသူ၊ ကျောင်းသားတွေလည်း အနှောင့်အယှက်မပေးရဘူး။ အဲဒီတော့ ဘယ်ကျောင်းတော့ မတက်ရဘူးဆိုတဲ့ ခြိမ်းခြောက်တာမျိုးတွေ မရှိရေအောင် အဲဒါမျိုးတွေကို အာဆီယံရပ်ဝန်းဒေသကနေပြီး ကမ္ဘာ့ကုလသမဂ္ဂကပါ နိုင်ငံတကာခေါင်းဆောင်တွေကနေ ဘုန်းဘုန်းတို့ရဲ့ တိုင်းပြည်ရဲ့ကိုယ်စားပြောကြားပေးဖို့ အထူးမေတ္တာရပ်ခံခဲ့တယ်” ဟု ဆရာတော် ဦးသောဘိတက မိန့်ကြားသည်။

၂၀၂၁ ခုနှစ် ဖေဖော်ဝါရီလတွင် တပ်မတော်က နိုင်ငံတော်အာဏာရယူခဲ့ပြီးနောက် နိုင်ငံအတွင်း၌ ဆရာ၊ ဆရာမများ အကြမ်းဖက်သတ်ဖြတ်ခံရခြင်း၊ စာသင်ကျောင်းများ မီးရှို့ခြိမ်းခြောက်ခံရခြင်းနှင့် စာသင် ကျောင်းများ မဖွင့်ရန် တားဆီးပိတ်ပင်ခြင်းများ ရှိနေသည်။

စစ်ကိုင်းတိုင်းသည် ပဋိပက္ခများစွာ ဖြစ်ပွားနေသော ဒေသတစ်ခုဖြစ်ပြီး တိုင်းအတွင်းရှိ (၈၀)ရာခိုင်နှုန်းသော အခြေခံပညာကျောင်းများမှာ ကောင်းမွန်ပိုင်နိုင်စွာ ပညာသင်ကြားပေးနိုင်ခြင်းမရှိကြောင်း  IBEC ဆရာတော်က ထပ်မံမိန့်ကြားထားသည်။

“စစ်ကိုင်းတိုင်းမှာက ၈၀ ရာခိုင်နှုန်းလောက်ရှိတယ်။ ဘယ်ဖက်ကမှ သေချာပညာမသင်ကြားနိုင်ဘူး။ နိုင်ငံ့ဝန်ထမ်း ဆရာ၊ ဆရာမတွေဆိုရင်လည်း သူတို့ ကျရာတာဝန်တွေမှာ မသွားနိုင်ဘူး။ သွားလို့လည်း မရဘူး။ အဲဒီတော့ ဒီပညာရေးဇုန်တွေ အားလုံးက ရပ်တန့်နေတယ်။ မြို့တွေလောက်ပဲ နည်းနည်းပါးပါးဖွင့်နိုင်တယ်။ ကျေးလက်တွေဆိုရင်လည်း မဖွင့်နိုင်တော့ဘူး။ ဖွင့်ပါတယ်ဆိုတဲ့ဟာတွေကလည်း သူတို့စနစ် တကျ ဘာမှ မသင်နိုင်ဘူး” ဟု ဆရာတော်ဦးသောဘိတက မိန့်ကြားသည်။

မြန်မာနိုင်ငံတွင် ဖြစ်ပွားနေဆဲပဋိပက္ခများအတွင်း ဗုံးထောင်ဖောက်ခွဲ၊ မီးရှို့ခံခဲ့ရသည့် စာသင်ကျောင်းများစွာရှိထားပြီး ပညာရေးဝန်ထမ်း၊ ဆရာ၊ ဆရာမဦးရေ (၁၀၀)နီးပါးသည်လည်း အကြမ်းဖက်သတ်ဖြတ်ခြင်းကို ခံထားရသည်။