Htay Oung (NSS) - ဩဂုတ် ၉

လက်ရှိ ထိုင်းဘုရင်ရဲ့ ကွဲကွာနေတဲ့ ဒုတိယသားတော်က ဆယ်စုနှစ် သုံးခုနီးပါးအတွင်း ပထမဆုံးအကြိမ် အဖြစ် ဘန်ကောက်သို့ ပြန်လည်ရောက်ရှိလာခြင်းဟာ လူအများအတွက် အံ့အားသင့်စရာဖြစ်ခဲ့ရပြီး ထီးနန်း ဆက်ခံမယ့် အစီအစဉ်နဲ့ပတ်သက်ပြီး မေးခွန်းထုတ်စရာ ဖြစ်လာခဲ့ရတယ်လို့ Guardian က ယမန်နေ့ ရေးသားခဲ့ပါတယ်။

ဩဂုတ် ၆ ရက်၊ တနင်္ဂနွေနေ့ သုဝဏ္ဏဘူမိလေဆိပ်ကို နိမ့်ကျတဲ့သွင်ပြင်နဲ့ ဗာချာရတ်ဆွန်_ဝီရချာရာဝမ်ရဲ့ ရောက်ရှိ လာပုံဗီဒီယိုဖိုင်ဟာ လူမှုကွန်ရက်အသုံးပြုသူများအကြား အားပါးတရ ရှယ်ကြစရာဖြစ်ခဲ့ရပါတယ်။

လက်ရှိ ထိုင်းဘုရင် မဟာဝိဇယလောင်ကွန်းရဲ့အကြီးဆုံးသမီးတော်ဖြစ်သူ လဲပြိုကျပြီး ဆေးရုံတက်နေရတဲ့ ဒီဇင်ဘာလကတည်းက ဗာချာရတ်ဆွန် ရောက်ရှိလာခြင်းဟာ ထိုင်းတော်ဝင်မိသားစုအတွက် အခက်ကြုံနေချိန်နဲ့ တိုက်ဆိုင်နေပါတယ်။ မင်းသမီး ဘက်ချရီခစ်တီယာဟာ_နာရင်ဒြာ_ဒီပါဗက်ဟာ ရောဂါပိုးကူးစက်ခံရပြီးနောက် ရောင်ရမ်းခြင်းကြောင့် ပြင်းထန် နှလုံးခုန် မမှန်ဝေဒနာကို ခံစားရတယ်လို့ ဇန်နဝါရီလမှာ ဘန်ကောက်နန်းတော်က ပြောပါတယ်။ 

ဒုတိယမြောက် ကြင်ယာတော်မှာ ဖွားမြင်သူ ထိုင်းဘုရင်ရဲ့ ဒုတိယမြောက် အကြီးဆုံး သားဖြစ်သူ အသက် ၄၂ နှစ် အရွယ် ဗာချာရတ်ဆွန်နဲ့ အသက် ၆၁ နှစ်အရွယ် မိခင် ဆူဂျာရင်နီတို့ဟာ ဘန်ကောက်မြို့တွင်း လှည့်လည်ခဲ့ကြပါ တယ်။ နန်းတော်၀င်းအတွင်းရှိ ၀တ်ကျောင်းတော်အပြင် မြို့လယ်ပိုင်း နတ်ဗိမာန်နဲ့ ဆင်းရဲနွမ်းပါးသူ မိသားစုများ အတွက် ကလေးထိန်းစင်တာကိုလည်း အလည်သွားရောက်ခဲ့ပါတယ်။

သူရောက်ရှိရာ နေရာတိုင်းမှာ နွေးထွေးစွာ ကြိုဆိုခြင်းခံခဲ့ရတယ်လို့ ဗာချာရတ်ဆွန်က ပြောပေမယ့် ဘန်ကောက် နန်းတော်ကတော့ ဘာမှတ်ချက်မှ မပေးပါဘူး။

သရုပ်ဆောင်ဟောင်း ဆူဂျာရင်နီဟာ အိမ်ထောင်ရေးဖောက်ပြန်တယ်လို့ လူသိရှင်ကြား စွပ်စွဲပြီး ကွာရှင်းလိုက် ကြောင်း လက်ရှိထိုင်းဘုရင် ထိုစဉ် အိမ်ရှေ့မင်းသားဖြစ်သူက ကြေညာပြီးနောက်ပိုင်း  ဗာချာရတ်ဆွန်နဲ့ အဖေ အမေတူ ညီအစ်ကိုမောင်နှမ ၃ ဦးတို့ဟာ ၁၉၉ဝ ခုနှစ်များ အလယ်ပိုင်းကတည်းက နိုင်ငံရပ်ခြားမှာ နေထိုင်ခဲ့ကြပါ တယ်။ နောက်ပိုင်း သူ့ရဲ့ညီမတစ်ဦးကတော့ ဘန်ကောက်ကို ပြန်လာပြီး တော်ဝင်မိသားစုအသိုင်းအဝိုင်းမှာ ကြီးပြင်းလာခဲ့ပါတယ်။

အမေရိကန်နိုင်ငံမှာ ရှေ့နေတစ်ဦးဖြစ်လာသူ ဗာချာရတ်ဆွန်ဟာ တော်ဝင်ဘွဲ့ တရားဝင်အပ်နှင်းခံရခြင်း မရှိပါဘူး။

လက်ရှိ ဒဿမြောက် ရာမာဘုရင်ရဲ့ဘွဲ့အမည်ကို ရည်ညွှန်းပြီး (ရိုမန် ဂဏန်း X) ဟာ  ဗာချာရတ်ဆွန် ပြန်လည် ရှိလာချိန်ကစပြီး Twitter လူမှုကွန်ရက်မှာ ခေတ်စားနေပါတယ်။ သူပြန်ရောက်ရှိလာတာကို အတော်များများက ကြိုဆိုခဲ့ကြပြီး အများပြည်သူနဲ့ တွေ့ထိဆက်ဆံတဲ့အခါ ဗာချာရတ်ဆွန်ရဲ့နှိမ့်ချတဲ့ အမူအရာအကြောင်းကို ပြောဆို နေကြပါတယ်။

ဒါပေမယ့် (တော်ဝင်ဝါဒဆန့်ကျင်ရေး) ဆန္ဒပြအဖွဲ့တစ်ဖွဲ့ဖြစ်တဲ့ “သာလူ၀မ်” ကတော့ ဗာချာရတ်ဆွန် ပြန်လာခြင်း ကို ဂရုစိုက်နေမယ့်အစား ဘုရင်စနစ်ဖျက်သိမ်းရေးကို စိတ်၀င်စားတယ်လို့ လူမှုကွန်ရက်မှာ ရေးသားပါတယ်။ ၂ဝ၂ဝ ပြည့်ခုနှစ် ထိုင်းကျောင်းသားလူငယ်များဟာ သြဇာကြီး တော်ဝင်မိသားစုအပေါ် (အခွင့်အရေးနဲ့ အကာ အကွယ်ပေးရေးပြဋ္ဌာန်းချက်များကို) ပြန်လည်ပြင်ဆင်ဖို့အတွက် လူထု ဆန္ဒပြပွဲများမှာ ဦးဆောင်ခဲ့ကြပါတယ်။

တချို့တွေကလည်း ဗာချာရတ်ဆွန် စီးနင်းတဲ့ မော်တော်ကားနံပတ်ကို အသည်းအသန် သိချင်နေကြပြီနောက် တစ်ပတ် ချဲထိုးလိုက်ရင် ကံကောင်းပြီလို့ ကောက်ချက်ချနေကြပါတယ်။

မေလ ရွေးကောက်ပွဲမှာ အမတ်နေရာအများဆုံးအနိုင်ရခဲ့တဲ့ MFP ပါတီခေါင်းဆောင်ဖြစ်သူကို ဝန်ကြီးချုပ် တင်မြောက်ရေးကို စစ်တပ်ခန့် အမတ်များချည့်ပါ၀င်တဲ့ အထက်လွှတ်တော်က တားဆီးတဲ့အတွက် ထိုင်းနိုင်ငံမှာ နိုင်ငံရေးအကျပ်အတည်းဆိုက်နေချိန်မှာ ဗာချာရတ်ဆွန်က ပြန်လည်ရောက်ရှိလာခြင်းဖြစ်ပါတယ်။

ဘုရင်စနစ်ကို ဝေဖန်ပါက ထောင်ဒဏ် ၁၅ နှစ်အထိ ချမှတ်နိုင်အောင် ထိုင်းနိုင်ငံရဲ့တင်းကျပ်တဲ့ “ဘုန်းတော် ကြီးမြတ်လှသော” ဥပဒေကိုပြောင်းလဲမယ့်အကြောင်း ကတိပြုထားတာကြောင့် MFP ပါတီကို အစိုးရအဖွဲ့ဝင် အဖြစ် ခွင့်မပြုနိုင်ဘူးလို့ အထက်လွှတ်တော်အမတ်များက ပြောနေပါတယ်။

ဘုရင်စနစ်ကို အကာအကွယ်ပေးထားတဲ့ “သံကွန်ခြာ” ဟာ ထိုင်းနိုင်ငံရေးမှာ အမှားအယွင်းအသစ်သဖွယ်ဖြစ် လာနေတဲ့ တော်ဝင်မိသားစုရဲ့ဂုဏ်ဒြပ်တွေအပေါ် ဂယက်ရိုက်လာရပါတယ်။ ဗာချာရတ်ဆွန် ရောက်လာချိန်  ဘုရင်စနစ်အတွက် အကဲဆတ်ချိန်ဖြစ်နေပြီး ဆက်ခံသူဖြစ်လိမ့်မယ်လို့ အများထင်ကြေးပေးခံရသူ အသက် ၄၄ နှစ် အရွယ် မင်းသမီး ဘက်ချရီခစ်တီယာဟာကလည်း ဆေးရုံကုတင်ပေါ်မှာ ပက်လက်ဖြစ်နေပါတယ်။ ဇန်နဝါရီ ဘန်ကောက်နန်းတော် နောက်ဆုံးသတင်းထုတ်ပြန်ချက်အရ မင်းသမီးဟာ သတိလစ်နေဆဲဖြစ်ပြီး ဆေးဝါးနဲ့ စက်ပစ္စည်းများရဲ့ အကူအညီနဲ့ နှလုံး-အဆုတ်-ကျောက်ကပ်အလုပ်လုပ်ဖို့ ကြိုးစားနေရတယ်လို့ ဆိုပါတယ်။

ဒါက (ထိုင်းဘုရင်စနစ်မှာ) တော်ဝင်ဆက်ခံသူ(အထိတောင်) အလားအလာရှိကြောင်း ဖွင့်ချပြလိုက်ခြင်းဖြစ် တယ်လို့  ကျိုတိုတက္ကသိုလ် အရှေ့တောင် အာရှလေ့လာရေးစင်တာမှ တွဲဖက်ပါမောက္ခတစ်ဦးက သုံးသပ်ပါတယ်။ ဗာချာရတ်ဆွန်ရဲ့ဘန်ကောက်ခရီးစဉ်တွေဟာ တော်ဝင်လှုပ်ရှားမှုများနဲ အလားသဏ္ဍာန်တူညီကြောင်း မှတ်ချက်ပြုပါတယ်။

လူအများအမြင်မှာတော့ ဗာချာရတ်ဆွန်ကိုယ်တိုင်ရဲ့ ဖော်ရွေမှု၊ လွတ်လပ်စွာ ဓာတ်ပုံရိုက်ခွင့်ပြုထားပြီး  လူအများ နဲ့ စကားပြောဆိုရာမှာ ပွင့်လင်းပုံတို့ကို မြင်နေရပါတယ်။ ဒါပေမယ့် ဗာချာရတ်ဆွန်ရဲ့  အနာဂတ်လမ်းကြောင်းကို ခန့်မှန်းဖို့ စောလွန်းနေသေးပြီး စစ်တပ်တို့လို ဘုရင်စနစ်နဲ့ လိုက်လျောညီထွေရှိသူများက (သူ့နေ ပုံထိုင်ပုံအပေါ်) ဘယ်လိုအကဲဖြတ်တယ်ဆိုတာ  ရှင်းရှင်းလင်းလင်း မရှိကြောင်း ပါမောက္ခက ဆိုပါတယ်။

ထပ်တူထပ်မျှ အရေးကြီးတဲ့မေးခွန်းကတော့ ဗာချာရတ်ဆွန်ဟာ ပြုပြင်ပြောင်းလဲရေးကို လိုလားသူ ဖြစ်-မဖြစ် ဒါမှမဟုတ် သဘောထားတင်းမာသူ ဟုတ်-မဟုတ်၊ ဘယ်လို ဦးတည်သွားမလဲ ဆိုတဲ့ကိစ္စဖြစ်ပြီး ဘယ်သူမှ မသိကြောင်း၊ ပြောဖို့ စောလွန်းနေတယ်လို့ မှတ်ချက်ပေးပါတယ်။

လက်ရှိ ထိုင်းဘုရင် မဟာဝိဇယလောင်ကွန်းဟာ ငါးကြိမ် လက်ထပ်ခဲ့ဖူးပြီး သုံးကြိမ် ကွာရှင်းထားပါတယ်။ သားသမီး စုစုပေါင်း ၇ ဦးရှိပြီး၊ ချက္ကရီမင်းဆက် ဒဿမမြောက် ရာမာဘုရင်အဖြစ် ထီးနန်းသိမ်းပိုက်ခြင်း မတိုင်မီ သူ့ရဲ့သက်တော်စောင့်တစ်ဦးဖြစ်သူ စုသီတာကို မိဖုရားအဖြစ် တင်မြောက်ခဲ့ပါတယ်။

#ဗာချာရတ်ဆွန်_ဝီရချာရာ၀မ် #ထိုင်းဘုရင်_မဟာဝိဇယလောင်ကွန်း #MFP #ထိုင်းဘုရင်စနစ်

#မင်းသမီး_ဘက်ချရီခစ်တီယာဟာ_နာရင်ဒြာ_ဒီပါဗက် 

(Guardian., 8 august 2023,” Thailand king’s estranged son makes surprise return after 27 years” ကို #HtayOung, #OungMarine ဆီလျော်အောင် ကောက်နှုတ်ဘာသာပြန်ဆိုသည်။)