ယွန်း (NSS) -  သြဂုတ် ၆

လက်နက်ခဲယမ်းများ အပ်နှံကာ ဥပဒေဘောင်အတွင်း ပြန်လည်ဝင်ရောက်လာသူ PDF (၁၄)ဦးအား ဆုငွေ သိန်း (၁ဝဝ) ကျော် ချီးမြှင့်ခဲ့ကြောင်း သိရသည်။

နစကမှ ယမန်နေ့ ( သြဂုတ် ၅ ရက်)နေ့ ညပိုင်းတွင် အထက်ပါကဲ့သို့ ထုတ်ပြန်ထားခြင်းဖြစ်သည်။

နစကအနေဖြင့် PDF အပါအဝင် အဖွဲ့အစည်းအမျိုးမျိုးအမည်ခံ၍ လက်နက်ကိုင်ဆန့်ကျင်လျက်ရှိသည့်အဖွဲ့များ တွင် ‌ရောက်ရှိနေသူများကို ဥပဒေဘောင်အတွင်းသို့ ပြန်လည်ဝင်ရောက်ရန် ဖိတ်ခေါ်လျက်ရှိကြောင်း သိရသည်။

ထိုသို့ဆောင်ရွက်လျက်ရှိရာ ပြီးခဲ့သည့် သြဂုတ်လ(၄)ရက်တွင် လက်နက်ခဲယမ်းများအပ်နှံကာ ဥပဒေဘောင် အတွင်း ပြန်လည်ဝင်ရောက်လာသည့် PDF အဖွဲ့ဝင် အမျိုးသား (၁၄)ဦးကို အရှေ့တောင်တိုင်းစစ်ဌာနချုပ် အောင်ဆန်းခန်းမတွင် လက်ခံခဲ့ကြောင်း သိရသည်။

ပြစ်မှုကျူးလွန်ခဲ့ခြင်းမရှိသော ရန်ကုန်တိုင်းအတွင်းရှိ ရွှေပြည်သာ၊ လှိုင်သာယာ၊ စမ်းချောင်း၊ မရမ်းကုန်း၊ လှည်းကူး မြို့နယ် အပါအဝင် ဧရာဝတီတိုင်းအတွင်းရှိ ဝါးခယ်မ၊ ညောင်တုန်း၊ ဓနုဖြူမြို့နယ်နှင့် စစ်ကိုင်းတိုင်း မုံရွာမြို့နယ် တို့မှ PDF အဖွဲ့ဝင်(၁၄)ဦး ဥပဒေဘောင်အတွင်း ပြန်လည်ဝင်ရောက်ခဲ့ခြင်းဖြစ်ကြောင်း နစကမှ ဆိုထားသည်။

ထို့ပြင် ၎င်းတို့နှင့်အတူ ပါလာသည့် ၉ မမ ပစ္စတိုတစ်လက်၊ ၎င်းကျည်အိမ် နှစ်ခု၊ ၉ မမ ကျည်အတောင့် ၂ဝ ၊ RPG တစ်လက်၊ ဒုံးသီးတစ်လုံး နှင့် ပို့ကျည်တစ်တောင့်တို့ကိုလည်း အပ်နှံခဲ့ကြောင်း သိရသည်။

ထို့နောက် ၉ မမ ပစ္စတိုဖြင့် အလင်းဝင်ရောက်လာသူတစ်ဦးအား ဆုကြေးငွေကျပ်သိန်း(၂ဝ)၊ RPG ဖြင့် အလင်း ဝင်ရောက်လာသူတစ်ဦးအား ဆုငွေ(၇၅)သိန်းနှင့် အလင်းဝင်လာသူ (၁၄)ဦးတို့အတွက် ‌ထောက်ပံ့ငွေကျပ် (၁၅) သိန်း ပေးအပ်ခဲ့ရာ စုစုပေါင်း ငွေကျပ် သိန်း(၁၁ဝ) ပေးအပ်ခဲ့ကြောင်း သိရသည်။

ထိုသို့ ပေးအပ်ပြီးနောက် ၎င်းတို့အား ဝန်ခံကတိလက်မှတ်ရေးထိုးခိုင်းပြီး မိဘအုပ်ထိန်းသူများထံသို့ လွှဲပြောင်း အပ်နှံခဲ့ကြောင်း နစကမှ ထုတ်ပြန်ထားသည်။

အလားတူ ပြီးခဲ့သည့် သြဂုတ်လ(၂)ရက်ကလည်း စစ်ကိုင်းတိုင်းနှင့် မကွေးတိုင်းတို့မှ PDF အဖွဲ့ဝင် (၁၇)ဦး ဥပဒေဘောင်အတွင်း ပြန်လည်ဝင်ရောက်ခဲ့ကြောင်း သိရသည်။