မျိုးကြီး (NSS) - သြဂုတ် ၅

မာရဝိဇယဗုဒ္ဓရုပ်ပွားတော် တည်ထားကိုးကွယ်နိုင်ခဲ့ခြင်းအပေါ် ဗန်းမော်ဆရာတော်ကြီးအပါအဝင် ရဟန်းနှင့် လူပုဂ္ဂိုလ်များကို ကမ္ပမည်းမော်ကွန်းတင်ဂုဏ်ပြုကြောင်း ကြေညာလိုက်သည်။

မာရဝိဇယဗုဒ္ဓရုပ်ပွားတော်မြတ်ကြီး၊ မာရဝိဇယဗုဒ္ဓဥယျာဉ်တော်၊ မုစလိန္ဒနဂါးရုံဘုရား၊ အဂ္ဂါဓိပတိ သာသနာ့ဗိမာန်တော်ကြီး နှင့် ကျောက်စာရုံစေတီတော်များတည်ထားကိုးကွယ်ရေးနာယကအဖွဲ့က ကျေးဇူး တင်ဂုဏ်ပြုခဲ့ခြင်းဖြစ်သည်။

၎င်းရုပ်ပွားတော်အား အနေကဇာတင်ခြင်း၊ ကျောက်စာရုံစေတီတော်များအား ရွှေထီးတော်တင်လှူခြင်းနှင့် ရေစက်ချမင်္ဂလာကုသိုလ်တော်အခမ်းအနားများကို ပြီးခဲ့သော သြဂုတ်လ ၁ ရက်တွင် ကျင်းပပြုလုပ်ခဲ့သည်။

ထိုသို့ တည်ထားကိုးကွယ်နိုင်ရန်အတွက် မန္တလေးမြို့၊ ဗန်းမော်ကျောင်းတိုက်ဆရာတော် ဒေါက်တာဘဒ္ဒန္တကုမာရာဘိဝံသအမှူးပြုသည့် သြဝါဒါစရိယဆရာတော်ကြီးများအဖွဲ့တို့အား ကျေးဇူတင်စွာ ကမ္ပည်းမော်ကွန်းတင်ဂုဏ်ပြုအပ်ပါကြောင်း နာယကအဖွဲ့က အသိပေးကြေညာလိုက်သည်။

ထို့ပြင် စကျင်ကျောက်တော်ကြီးထုတ်လုပ်ရေးနှင့် သယ်ယူပင့်ဆောင်ရေးလုပ်ငန်းကော်မတီနှင့် လုပ်ငန်းဆက်စပ်ဆောင်ရွက်ခဲ့သည့် Anglo Mining ကုမ္ပဏီ၊ Two Elephant Trading ကုမ္ပဏီတို့ကိုလည်း ကမ္ပည်းမော်ကွန်းတင်ဂုဏ်ပြုထားသည်။

ဆက်လက်ပြီး တည်ဆောက်ရေး၊ ဘဏ္ဍာငွေရှာဖွေရေး၊ ပြန်ကြားရေး၊ သတင်းထုတ်ပြန်ရေးနှင့် မှတ်တမ်းပြုစုရေး၊ လုပ်ငန်းစစ်ဆေးရေး၊ ဘာသာရေးအခမ်းအနားများကျင်းပရေးလုပ်ငန်းကော်မတီများနှင့် နည်းပညာအထောက်အကူပြုကော်မတီများကို ကျေးဇူးတင်ရှိကြောင်း ကမ္ပမည်းမော်ကွန်းတင် ဂုဏ်ပြုထားသည်။

အလားတူ မာရဝိဇယဗုဒ္ဓရုပ်ပွားတော် တည်ထားကိုးကွယ်နိုင်ရေးအတွက် ကျရာကဏ္ဍများမှ ဆောင်ရွက်ခဲ့သော တပ်မတော်သား အင်ဂျင်နီယာပညာရှင်များ၊ အသိပညာရှင် အတတ်ပညာရှင်များ၊ မြန်မာနိုင်ငံရဲတပ်ဖွဲ့ဝင်များ၊ ဝန်ကြီးဌာနအသီးသီးမှ တာဝန်ရှိသူများကို ကျေးဇူးအထူးတင်ရှိကြောင်း နာယကအဖွဲ့က ကြေညာထားသည်။

၎င်းဗုဒ္ဓရုပ်ပွားတော်မြတ်ကြီး တည်ထားကိုးကွယ်နိုင်ရန်အတွက် အလှူငွေများ ထည့်ဝင်လှူဒါန်းခဲ့ကြသော လုပ်ငန်းရှင်ကြီးများ၊ (၇)ရက်သားသမီးစေတနာရှင် အလှူရှင်များ၊ အနေကဇာတင်လှူခြင်း၊ ကျောက်စာရုံစေတီတော်များ ထီးတော်တင်လှူ ခြင်းနှင့် ရေစက်ချအခမ်းအနားများသို့ ကြွရောက်လာခဲ့ကြသော ပြည်တွင်း၊ ပြည်ပမှ ဆရာတော်များ၊ လူပုဂ္ဂိုလ်များအပါ အဝင် ကျေးဇူးတင်ထိုက်သူအားလုံးကိုလည်း ကျေးဇူးအထူးတင်ရှိကြောင်းနှင့် ကမ္ပမည်းမော်ကွန်းတင် ဂုဏ်ပြုကြောင်း ကြေညာထားသည်။

ထို့ပြင် သြဂုတ်လ ၁ ရက်တွင် အနေကဇာတင်အခမ်းအနားနှင့် အခြားသောအခမ်းအနားများကို အောင်မြင်စွာကျင်းပနိုင်ရေး ဦးစီးဦးဆောင် ဆောင်ရွက်ပေးခဲ့သည့် သီတဂူဆရာတော် ဒေါက်တာဘဒ္ဒန္တဉာဏိဿရအမှူးပြုသည့် သြဝါဒါစရိယဆရာတော်ကြီးများကို ကမ္ပမည်းမော်ကွန်းတင် ဂုဏ်ပါကြောင်း နာယကအဖွဲ့က ကြေညာထားသည်။

မာရဝိဇယဗုဒ္ဓရုပ်ပွားတော်အား သြဂုတ်လ ၈ ရက်မှစ၍ သြဂုတ်လ ၁၆ ရက်အထိ ပြည်သူများအနေဖြင့် အခမဲ့လာရောက်ဖူးမြော်နိုင်ကြောင်းသိရပြီး သြဂုတ်လ ၁၆ ရက်နောက်ပိုင်းတွင် အခကြေးငွေကောက်ခံသွားမည်ဖြစ်ကြောင်း သိရသည်။