မျိုးကြီး (NSS) - သြဂုတ် ၂

နစကအစိုးရသက်တမ်း (၆)လ ထပ်မံတိုးမြှင့်အပြီး (၄၈)နာရီအတွင်း နစကကို ပြန်လည်ပြင်ဆင်ဖွဲ့စည်းခဲ့ပြီး ပြည်ထောင်စု တရားသူကြီးချုပ်နှင့် ဝန်ကြီးများ အနားယူခဲ့ကြသည်။

ဗိုလ်ချုပ်မှူးကြီးမင်းအောင်လှိုင် ဦးဆောင်သော နစကအစိုးရသည် ယနေ့(သြဂုတ် ၂ ရက်) ညပိုင်းတွင် အထက်ပါကဲ့သို့ အမိန့်စာများကို ထုတ်ပြန်ကြေညာလိုက်ခြင်းဖြစ်သည်။

နိုင်ငံတော်စီမံအုပ်ချုပ်ရေးကောင်စီအဖွဲ့ဝင်များဖြစ်သော ဦးမောင်ကိုနှင့် ဒေါက်တာအောင်ကျော်မင်းတို့အား တာဝန်မှ အနားပေးကာ နိုင်ငံတော်စီမံအုပ်ချုပ်ရေးကောင်စီကို ပြင်ဆင်ဖွဲ့စည်းလိုက်သည်။

ထို့ပြင် နစကအဖွဲ့ဝင် ဒေါက်တာကျော်ထွန်းကိုလည်း နစကဗဟိုအကြံပေးအဖွဲ့ဝင်အဖြစ် ပြောင်းရွေ့တာဝန်ပေးအပ်ခဲ့သည်။

နိုင်ငံတော်စီမံအုပ်ချုပ်ရေးကောင်စီသည် ယခင်က ဗိုလ်ချုပ်မှူးကြီးမင်းအောင်လှိုင်အပါအဝင် အဖွဲ့ဝင် (၂၀)ရှိရာမှ လက်ရှိတွင် အဖွဲ့ဝင်အချို့ကို လျှော့ချကာ ပြင်ဆင်ဖွဲ့စည်းလိုက်ခြင်းလည်း ဖြစ်သည်။

အလားတူ ယနေ့တွင်လည်း ပြည်ထောင်စုတရားသူကြီးချုပ်အဖြစ် တာဝန်ထမ်းဆောင်နေသည့် ဦးထွန်းထွန်းဦးကိုလည်း ကျန်းမာရေးအရ တာဝန်မှ အနားယူခွင့်ပြုလိုက်ကြောင်း နစကမှ ကြေညာခဲ့သည်။

ပြည်ထောင်စုတရားသူကြီးချုပ်အဖြစ် တာဝန်ထမ်းဆောင်မည့်သူအား နစကအနေဖြင့် လက်ရှိတွင် ထုတ်ပြန်ကြေညာခြင်း မရှိသေးပေ။

ထို့ပြင် သာသနာရေးနှင့်ယဉ်ကျေးမှုဝန်ကြီးဦးကိုကို၊ လျှပ်စစ်စွမ်းအားဝန်ကြီး ဦးသောင်းဟန်၊ ပြည်ထောင်စုစာရင်းစစ်ချုပ် ဦးတင်ဦး၊ အဂတိလိုက်စားမှုတိုက်ဖျက်ရေးကော်မရှင်ဥက္ကဋ္ဌ ဒေါက်တာဌေးအောင်နှင့် မြန်မာနိုင်ငံအမျိုးသားလူ့အခွင့်အရေး ကော်မရှင်ဥက္ကဋ္ဌဦးလှမြင့်တို့ကို ကျန်းမာရေးအရ တာဝန်မှ အနားယူခွင့်ပြုလိုက်ကြောင်း နစကမှ ကြေညာခဲ့သည်။

နစက၏ စွမ်းအင်ဝန်ကြီး ဦးမျိုးမြင့်ဦးနှင့် အလုပ်သမားဝန်ကြီးဒေါက်တာပွင့်ဆန်းတို့ကို တာဝန်မှ အနားပေးလိုက်ကြောင်း နစကမှ ထပ်မံကြေညာခဲ့သည်။