ယွန်း (NSS) - ဇူလိုင် ၂၈

လုံခြုံရေးဂိတ်များ၌ လာဘ်ပေးလာဘ်ယူမှုများကို စစ်ဆေးဖော်ထုတ်တွေ့ရှိခဲ့ပါက သက်ဆိုင်ရာ တာဝန်ကျဝန်ထမ်းအပြင် တာဝန်ရှိအဆင့်ဆင့်ကိုပါ ထိရောက်စွာ အရေးယူသွားမည်ဖြစ်ကြောင်း သိရသည်။

နစကဒုဥက္ကဋ္ဌ၊ ဒုတိယဗိုလ်ချုပ်မှူးကြီးစိုးဝင်းက ဇူလိုင်လ(၂၇)ရက်တွင် နေပြည်တော်ရှိ စီးပွားရေးနှင့်ကူးသန်း ရောင်းဝယ်ရေးဝန်ကြီးဌာန ညီလာခံခန်းမတွင် ကျင်းပခဲ့သော တရားမဝင်ကုန်သွယ်မှုတိုက်ဖျက်ရေးလုပ်ငန်း ညှိနှိုင်းအစည်းအဝေးတွင် အထက်ပါကဲ့သို့ ပြောခဲ့ခြင်းဖြစ်သည်။

တရားမဝင်ကုန်သွယ်မှုများ၌ ရှောင်ကွင်းလမ်းများကိုသုံး၍ သယ်ဆောင်မှုများရှိနေပြီး တရားဝင်ကုန်လမ်းကြောင်း အတိုင်း စစ်ဆေးရေးဂိတ်များ၊ လုံခြုံရေးဂိတ်များကို ငွေပေးပြီးဖြတ်သန်းမှုများလည်း ရှိနေကြောင်း သိရသည်။

သို့ဖြစ်၍ အထူးအဖွဲ့ဥက္ကဋ္ဌများ နှင့် OSS ဌာနဆိုင်ရာ တာဝန်ခံညွှန်ကြားရေးမှူးချုပ်အနေဖြင့် မိမိတို့တာဝန်ယူရ သည့် စစ်ဆေးရေးဂိတ်၊ လုံခြုံရေးဂိတ်များတွင် လာဘ်ပေးလာဘ်ယူမှုမရှိစေရေးကို ကြပ်မတ်ဆောင်ရွက်ရန် နစက ဒုဥက္ကဋ္ဌက အသိပေးပြောကြားထားသည်။

ပြည်ထောင်စုအဆင့်အနေဖြင့် ဝင်ရောက်စစ်ဆေးဖော်ထုတ်တွေ့ရှိခဲ့ပါက သက်ဆိုင်ရာတာဝန်ကျဝန်ထမ်းများ အပြင် တာဝန်ရှိသူအဆင့်ဆင့်ကိုပါ ထိရောက်စွာအရေးယူသွားမည်ဖြစ်ကြောင်း နစကဒုဥက္ကဋ္ဌက ပြောကြားခဲ့သည်။

ပြီးခဲ့သည့် ၂ဝ၂၂ ခုနှစ်၊ ဇန်နဝါရီလမှ ၂ဝ၂၃ ခုနှစ်၊ ဇွန်လအထိ အမှုတွဲ (၇ဝ၁၁) မှု နှင့် ခန့်မှန်းတန်ဖိုးငွေကျပ် (၁၂၇ ဒသမ ဝ၅၄) ဘီလျံဖြစ်ပြီး ယခင်နှစ်ကာလတူနှင့် နှိုင်းယှဥ်ပါက တိုးတက်ခဲ့ကြောင်း သိရသည်။

သို့သော် တရားမဝင်ကုန်သွယ်မှုများမှာ လျှော့နည်းကျဆင်းသွားခြင်းမရှိဘဲ ဆက်လက်လုပ်ကိုင်ဆောင်ရွက်လျက်ရှိကြောင်း နစကဒုဥက္ကဋ္ဌ မှ ပြောသည်။

တရားမဝင်ကုန်သွယ်မှုဖြစ်ပေါ်ရခြင်း အဓိကအကြောင်းရင်းများမှာ “အစိုးရ၏ မူဝါဒ၊ ရောင်းလိုအားနှင့် ဝယ်လိုအား၊ ပွင့်လင်းမြင်သာမှုနှင့် ကုန်သွယ်မှု၊ အကောက်ခွန်လုပ်ငန်းဝန်းကျင်” စသည့် အခြေခံကျသည့် အချက် များအပြင် နိုင်ငံအတွင်း၌ လုံခြုံရေးအရ လိုအပ်ချက်ရှိနေဆဲဖြစ်သည့် နယ်စပ်ဒေသများရှိနေခြင်းကြောင့်ဖြစ်သည်ဟု နစကဒုဥက္ကဋ္ဌက အသိပေးပြောကြားထားသည်။