ဂျန်ဇက် (NSS) - ဇူလိုင် ၂၆ 

ထိုင်းလိဂ် ၂ ကလပ်ဖြစ်တဲ့ Kasetsart FC အသင်းဟာ ရာသီအသစ်မစခင် အသင်းအင်အားဖြည့်တင်းနိုင်ဖို့ မြန်မာ တိုက်စစ်မှူးအီစိုး ကို ခေါ်ယူလိုက်ကြောင်း သိရပါတယ်။

အသက် ၂၆ နှစ်အရွယ်ရှိ တိုက်စစ် ဘယ်တောင်ပံကစားသမား အီစိုးဟာ လာအိုကလပ်ဖြစ်တဲ့ Young Elephants အသင်းကနေ ထိုင်းကလပ်ကိုပြောင်းရွှေ့ကစားမှာဖြစ်ကြောင်း သိရပါတယ်။ Kasetsart FC အသင်းဥက္ကဋ္ဌ Khun Suthep Wongruenက "အီစိုးဟာ ခြေစွမ်းပြကစားနိုင်တဲ့ ကစားသမားတစ်ဦးဖြစ်တဲ့အတွက် မြန်မာနိုင်ငံမှာ လူသိ များပါတယ်။ အီစိုးဟာ ခြေစွမ်းပြကစားနိုင်တာကြောင့် မြန်မာနိုင်ငံရဲ့နေမာအဖြစ် ချစ်စနိုး အခေါ်ခံနေရသူ ဖြစ်ပါတယ်။ သူဟာ မြန်မာလူငယ်လက်ရွေးစင်အသင်းနဲ့အတူ ပါဝင်ကစားခဲ့ဖူးပြီး ၂ဝ၁၇ ခုနှစ်တုန်းက ယူ ၂၁ ပြိုင်ပွဲတွေမှာ ယှဉ်ပြိုင်ခဲ့ဖူးသူဖြစ်ပါတယ်" လို့ ပြောပါတယ်။ 

အီစိုးဟာ မနောမြေလူငယ်အသင်း၊ မြန်မာ ယူ၂၁လက်ရွေးစင်အသင်း၊ ရန်ကုန်ယူနိုက်တက်အသင်းအပြင် လာအို အခြေစိုက် Young Elephants အသင်းမှာ ပါဝင်ကစားခဲ့ဖူးသူဖြစ်ကြောင်း သိရပါတယ်။ အီစိုးဟာ ပြီးခဲ့တဲ့ ၂ဝ၂၂ ခုနှစ် ဘောလုံးရာသီမှာ လာအိုကလပ်အသင်းဖြစ်တဲ့ Young Elephants အသင်းမှာ အမှတ်ပေးပွဲပေါင်း ၁၇ ပွဲ ပါဝင်ကစားခဲ့ပြီး ဂိုးပေါင်း ၄ ဂိုးသွင်းယူနိုင်ခဲ့သူဖြစ်ပါတယ်။ အီစိုးဟာ ၂ဝ၂၂ ခုနှစ် မေလမှာ ရန်ကုန်ယူနိုက်တက် အသင်းနဲ့ စာချုပ်ဖျက်သိမ်းပြီး လာအိုကလပ်ထံ ပြောင်းရွှေ့ခဲ့သူဖြစ်ပါတယ်။