Htay Oung (NSS) - ဇူလိုင် ၂၅ 

တရားဝင် ခရီးသွားစာရွက်စာတမ်းများ မပါဘဲ ကလေး ၃ဝ၁ ဦး အပါအဝင် မြန်မာနိုင်ငံသား ၇၁၈ ဦးတို့ဟာ အိန္ဒိယ နယ်စပ်ကိုဖြတ်ကျော်ပြီး မဏိပူရပြည်နယ်အတွင်း ဝင်ရောက်လာခဲ့ကြောင်း၊ အဲဒီဖြစ်စဉ် ဇူလိုင် ၂၂ ရက်မှ ၂၃ ရက် အထိ နှစ်ရက်အတွင်းဖြစ်ပွားခဲ့တာကြောင့် နယ်စပ်လုံခြုံရေးအတွက် စိုးရိမ်မှုများမြင့်တက်လာခဲ့ရတယ်လို့ နယူးဒေလီအခြေစိုက် NDTV က ယနေ့ ဇူလိုင် ၂၅ ရက်မှာ ရေးသားခဲ့ပါတယ်။

သတင်းများ ထွက်ပေါ်လာအပြီး မြန်မာနိုင်ငံသားများကို ချက်ချင်းပြန်ပို့ဖို့အတွက် မဏိပူရအစိုးရက အရေးယူ ဆောင်ရွက်နေပါတယ်။ မှန်ကန်တဲ့ ခရီးသွားစာရွက်စာတမ်းမပါပဲ မြန်မာနိုင်ငံသား ၇၁၈ ဦးတို့ အိန္ဒိယနိုင်ငံ ချန်ဒဲလ် ခရိုင်အတွင်း ဘာ့ကြောင့် ဘယ်လိုဝင်ရောက်လာနိုင်တယ်ဆိုတဲ့အကြောင်းနဲ့ပတ်သက်ပြီး အဖြစ်မှန်နဲ့ ခိုင်လုံတဲ့ အခြေအနေတွေကို ရှင်းလင်းတင်ပြရန် ပြည်နယ်အစိုးရက အာသံရိုင်ဖယ်တပ်ရင်း တာ၀န်ရှိသူများထံ အကြောင်း ကြားထားတယ်လို့ မဏိပူရ ပြည်နယ်အုပ်ချုပ်ရေးအဖွဲ့ အထွေထွေအတွင်းရေးမှူးက ပြောပါတယ်။

တရားမဝင် မြန်မာနိုင်ငံသား ၇၁၈ ဦးကို ချက်ချင်းပြန်ပို့ဖို့ တင်းကျပ်တဲ့ ညွှန်ကြားချက်တွေကို ပေးပို့ထားကြောင်း၊ တရားဝင်ဗီဇာနဲ့ ခရီးသွားစာရွက်စာတမ်းမပါဘဲ မဏိပူရအတွင်း မြန်မာနိုင်ငံသားများ ဝင်ရောက်မှုကို တားဆီးဖို့၊ နယ်ခြားစောင့်တပ်များအနေနဲ့ တင်းတင်းကျပ်ကျပ် အရေးယူဖို့ ယခင်ကတည်းက ညွှန်ကြားထားကြောင်း၊ အဲဒီ ညွှန်ကြားချက်ဟာ အိန္ဒိယပြည်ထဲရေးဝန်ကြီးဌာနရဲ့ လမ်းညွှန်ချက်များနဲ့ ကိုက်ညီပါတယ်လို့ ပြောပါတယ်။

တနင်္ဂနွေနေ့မှာ ဒုက္ခသည် ၇၁၈ ဦးတို့ဟာ အိန္ဒိယ-မြန်မာနယ်စပ်ကိုဖြတ်ပြီး ချန်ဒဲလ်ခရိုင်မှတဆင့် မဏိပူရပြည် နယ်အတွင်း ဝင်ရောက်လာခဲ့တယ်လို့ အာသံရိုင်ဖယ်တပ်ရင်းက  ခရိုင်လက်ထောက်ကော်မရှင်နာထံ အကြောင်း ကြားခဲ့ပါတယ်။ အဲဒီလို ဝင်ရောက်လာမှုဟာ မြန်မာနိုင်ငံမှာဖြစ်ပွားနေတဲ့ တိုက်ပွဲများရဲ့အကျိုးဆက်ဖြစ်တယ်လို့ သိရှိရပါတယ်။

အခြေအနေအပေါ် ကိုင်တွယ်နိုင်ဖို့အတွက် ဝင်ရောက်လာသူအားလုံးတို့ရဲ့ ဘိုင်အိုမက်ထရစ်ဆိုင်ရာ အချက် အလက်များနဲ့ ဓါတ်ပုံမှတ်တမ်းများကို ကောက်ယူထားဖို့အတွက် ချန်ဒဲလ်ခရိုင်ရဲတပ်ဖွဲ့ လက်ထောက်ကော်မရှင်နာ မင်းကြီးနဲ့ ကြီးကြပ်ရေးမှူးတို့က ညွှန်ကြားထားတယ်လို့ ဆိုပါတယ်။ 

တစ်ချိန်တည်းမှာပဲ မြန်မာနိုင်ငံမှာ လက်နက်ကိုင်တို့က အမျိုးသမီးတစ်ဦးကို သတ်ဖြတ်နေပုံ ဗီဒီယိုဖိုင်အပေါ် လိမ်လည်ဖော်ပြထားတဲ့ သတင်းအတုဖြန့်ဝြေခင်းအတွက် မဏိပူရရဲတပ်ဖွဲ့က ပထမသတင်းပေးတိုင်ကြားချက် FIR ဖွင့်လှစ်ထားကြောင်း သိရှိရပါတယ်။

သတင်းအတုဖြန့်သူများနဲ့ ပျံ့နှံ့နေတဲ့ဗွီဒီယိုအကြောင်းပြုပြီး ဆူပူအောင်လှုံ့ဆော်သူများကို ဖမ်းဆီးရန် ကြိုးပမ်းနေ တယ်လို့ ရဲတပ်ဖွဲ့က တွစ်တာမှာ  ရေးသားထားပါတယ်။

သတင်းအတုတွေ ဖြန့်ဝေတဲ့ကိစ္စနဲ့ပတ်သက်ပြီး ရဲတပ်ဖွဲ့က FIR ဖွင့်လှစ်ထားပါတယ်။ မြန်မာနိုင်ငံမှာ အမျိုးသမီး တစ်ဦးကို လူအုပ်က ဝိုင်းဝန်း ရိုက်နှက်သတ်ဖြတ်ပုံဗီဒီယိုကို မဏိပူရမှာ ဖြစ်လေဟန် လွဲမှားစွာ ပုံဖော်ထားပါ တယ်။ အဆိုပါဖြစ်စဉ်နဲ့ပတ်သက်ပြီး လူခုနှစ်ဦးကို ဖမ်းဆီးထားပါတယ်။

မဏိပူရပြည်နယ်မှာ အကြမ်းဖက်မှုတွေဖြစ်ပွားခဲ့ပြီး၊ မေလ ၃ ရက်နေ့ကတည်းက လူ ၁၂၅ ဦးထက်မနည်း သေဆုံးပြီး လူပေါင်း ၄,ဝဝဝဝ ကျော် အိုးအိမ်စွန့်ခွာ ထွက်ပြေးခဲ့ကြရပါတယ်။

မြန်မာနိုင်ငံနဲ့ နယ်နိမိတ်ချင်းထိစပ်နေတဲ့ပြည်နယ်မှာ ကူကီးလူမျိုးစုဟာ မျိုးနွယ်စုတူမဟုတ်တဲ့ လူများစု မေထေး တို့နဲ့ စီးပွားရေးအကျိုးခံစားခွင့် ခွဲတမ်းများကိစ္စနဲ့ပတ်သက်ပြီး ပဋိပက္ခ စတင်ဖြစ်ပွားခဲ့ပါတယ်။ လူဦးရေ ၃.၂ သန်း နေထိုင်ရာပြည်နယ်ကို ထောင်နဲ့ချီတဲ့ အိန္ဒိယအရံတပ်တွေနဲ့ စစ်တပ်တွေ အပြေးအလွှား ရောက်ရှိသွားပြီးနောက် ပြဿနာက ပြေလည်သွားခဲ့တယ်။ ဒါပေမယ့် ကြိုကြားကြိုကြား အကြမ်းဖက်မှုနဲ့ သတ်ဖြတ်မှုတွေက မကြာခင်မှာ ပြန်လည်စတင်ခဲ့ပြီး ယခုနောက်ပိုင်း ပြည်နယ်အတွင်း တင်းမာမှုများ ဆက်လက်ဖြစ်ပွားနေပါတယ်။

ပြီးခဲ့တဲ့ မေလတုန်းက အမျိုးသမီးများ ကိုယ်ထိလက်ရောက်စော်ကားခံရပုံကို ပြသထားတဲ့ဗီဒီယိုတွေဟာ ယခု သီတင်းပတ်အတွင်း ပေါ်ထွက်ခဲ့လာပြီးနောက် အမျိုးသားရေးဒေါသကို နှိုးဆွပေးသလို ဖြစ်ခဲ့ရပါတယ်။

#အိန္ဒိယမဏိပူရပြည်နယ် #မြန်မာနိုင်ငံသားများ၀င်ရောက်လာမှု #ကူကီးချင်းနှင့်နာဂ #မေထေးလူမျိုးစု #အမျိုးသမီးများလိင်ပိုင်းဆိုင်ရာစော်ကားမှု

(NDTV., 25 July 2023,” Over 700 Myanmar nationals trespassed to India’s Manipur in 2 days” ကို #HtayOung, #OungMarine ဆီလျော်အောင် ကောက်နှုတ်ဘာသာပြန်ဆိုသည်။)