Pika (NSS) - ဇူလိုင် ၂၅

မြောက်ကိုရီးယားသည် ဇူလိုင်လ(၂၄)ရက် နှောင်းပိုင်းတွင် နိုင်ငံ၏ အရှေ့ဖက်ကမ်းရိုးတန်းမှ ပင်လယ်ထဲသို့ ပဲ့ထိန်း ဒုံးကျည်နှစ်စင်းကို စမ်းသပ်ပစ်လွှတ်ခဲ့ကြောင်း တောင်ကိုရီးယားစစ်တပ် က ပြောကြားခဲ့သည်။

တောင်ကိုရီးယားနိုင်ငံတောင်ပိုင်း ဂျယ်ဂျူကျွန်းရှိ ရေတပ်စခန်းသို့ အမေရိကန်၏ နျူကလီးယားစွမ်းအင်သုံး ရေငုပ် သင်္ဘောရောက်ရှိလာပြီးနောက် နာရီပိုင်းအကြာတွင် မြောက်ကိုရီးယားဖက်က ပဲ့ထိန်းဒုံးကျည်များ စမ်းသပ် ပစ်လွှတ်ခဲ့ခြင်းဖြစ်ကြောင်း တောင်ကိုရီးယားစစ်တပ် က ပြောကြားခဲ့သည်။ 

မြောက်ကိုရီးယားသည် ပဲ့ထိန်းဒုံးကျည်နှစ်စင်းကို စမ်းသပ်ပစ်လွှတ်ခဲ့ပြီး အဆိုပါပဲ့ထိန်းဒုံးကျည်နှစ်စင်းမှာ စီးပွားရေးဇုန် အပြင်ဖက်သို့ ကျရောက်သွားခဲ့ကြောင်း ဂျပန်ကာကွယ်ရေးဝန်ကြီးဌာနက သတင်းထုတ်ပြန်ခဲ့သည်။ 

တောင်ကိုရီးယားတွင် အမေရိကန်၏ စစ်လက်နက်ပစ္စည်းများ ဖြန့်ကျက်ချထားမှုနှင့်အတူ စစ်ရေးလေ့ကျင့်မှုများ တိုးမြှင့်လုပ်ဆောင်လာခြင်းကြောင့် တင်းမာမှုများရှိနေချိန်တွင် မြောက်ကိုရီးယားဖက်က ယခုကဲ့သို့ ထပ်မံစမ်းသပ် ပစ်လွှတ်ခဲ့ခြင်းဖြစ်ကြောင်း သိရသည်။ 

တောင်ကိုရီးယားတွင် အမေရိကန်၏ စစ်လက်နက်ပစ္စည်းဖြန့်ကျက်ချထားမှုများ ဆက်လက်လုပ်ဆောင်နေမည် ဆိုပါက  နျူကလီးယားလက်နက်များဖြင့် လက်တုံ့ပြန်မှုများလုပ်ဆောင်သွားမည်ဖြစ်ကြောင်း မြောက်ကိုရီးယား ဖက်က ယခင်က သတိပေးပြောခဲ့သည်။ ဒေသတွင်း မတည်မငြိမ်မှုများကိုဖြစ်စေသည့် မြောက်ကိုရီးယား၏ ဒုံးကျည်စမ်းသပ်ပစ်လွှတ်မှုများနှင့်ပတ်သက်ပြီး မဟာမိတ်နိုင်ငံများနှင့် အနီးကပ်ဆွေးနွေးမှုများ လုပ်ဆောင်နေ ကြောင်း အမေရိကန်အစိုးရက ပြောကြားခဲ့သည်။

ဇူလိုင်လ(၂၄)ရက် အစောပိုင်းတွင် အမေရိကန်၏ နျူကလီးယားစွမ်းအင်သုံး ရေငုပ်သင်္ဘောတစ်စင်းသည် အတိအကျဖော်ပြထားခြင်းမျိုးမရှိသော စစ်ဆင်ရေးမစ်ရှင်ကို တစ်ခုကိုလုပ်ဆောင်နေစဉ် စစ်ဘက်ဆိုင်ရာ ထောက်ပံ့ရေးပစ္စည်းများ ပြန်လည်ဖြည့်တင်းရန်အတွက် တောင်ကိုရီးယားနိုင်ငံတောင်ပိုင်း ဂျယ်ဂျူကျွန်းရှိ ရေတပ် အခြေစိုက်စခန်းသို့ ဝင်ရောက်လာခဲ့ခြင်းဖြစ်ကြောင်း တောင်ကိုရီးယားရေတပ်က ပြောကြားခဲ့သည်။

ဇူလိုင်လ(၂၂)ရက်တွင် မြောက်ကိုရီးယားသည် နိုင်ငံ၏အနောက်ဖက်ကမ်းရိုးတန်းမှ ပင်လယ်ထဲသို့ ခရုဇ်ဒုံးကျည် များကို စမ်းသပ်ပစ်လွှတ်ခဲ့ကြောင်း သိရသည်။ ထို့အပြင် ဇူလိုင်လ(၁၉)ရက်တွင် တောင်ကိုရီးယားဆိပ်ကမ်းသို့ နှစ်ပေါင်းလေးဆယ်အတွင်း ပထမဆုံးအကြိမ်အဖြစ်  အမေရိကန်၏ ပဲ့ထိန်းဒုံးကျည် တပ်ဆင်ထားသော ရေငုပ် သင်္ဘောတစ်စင်းရောက်ရှိလာခဲ့ပြီးနောက် နာရီပိုင်းအကြာတွင် မြောက်ကိုရီးယားသည် နိုင်ငံအရှေ့ဖက်သို့ ပဲ့ထိန်း ဒုံးကျည်နှစ်စင်းကို စမ်းသပ်ပစ်လွှတ်ခဲ့ကြောင်း သိရသည်။