ဂျန်ဇက် (NSS) - ဇူလိုင် ၂

ယူကရိန်းနဲ့ စစ်ရေးပဋိပက္ခဖြစ်ပွားနေချိန်မှာပဲ ရုရှားစစ်လက်နက်ပစ္စည်းထုတ်လုပ်ရေးလုပ်ငန်းရဲ့ စစ်လက်နက် ပစ္စည်းထုတ်လုပ်မှုတွေက ပိုမိုမြင့်တက်လာခဲ့ကြောင်း သိရပါတယ်။ ရုရှားကုန်သွယ်ရေးနဲ့ စက်မှုဝန်ကြီး Denis Manturov က ရုရှားစစ်ဘက် စစ်လက်နက်ပစ္စည်းထုတ်လုပ်ရေးလုပ်ငန်းဟာ စစ်လက်ပစ္စည်းထုတ်လုပ်ရေးမှာ ကျွမ်းကျင်ဝန်ထမ်း ၁၆ဝဝဝ ကျော် ထပ်မံခေါ်ယူ အသုံးပြုသွားမှာဖြစ်ကြောင်း ပြောပါတယ်။

၎င်းက "ဒီနှစ် စတင်ခဲ့ပြီးနောက်ပိုင်းတည်းက ရုရှားစစ်လက်နက်ပစ္စည်းထုတ်လုပ်ရေးလုပ်ငန်းဟာ အထူးပြုလုပ် ထားတဲ့လက်နက်တွေ အပါအဝင် စစ်လက်နက်ပစ္စည်းအမျိုးအစား အမျိုးမျိုးကို ထုတ်လုပ်ခဲ့တယ်။ ထုတ်လုပ်မှုဟာ ပြီးခဲ့တဲ့နှစ် တစ်နှစ်လုံးထက်တောင် ပိုများနေတယ်။ လက်ရှိအချိန်မှာ ထုတ်လုပ်ထားတဲ့စစ်လက်နက်ပစ္စည်းတွေ ကို လွှဲပြောင်းပေးအပ်ဖို့ အဆင့်သင့်ရှိနေတယ်။ စစ်လက်နက်ပစ္စည်းများ တိုးမြင့်ထုတ်လုပ်တဲ့အတွက် အလုပ်သမား လိုအပ်ချက်တွေ ရှိနေခဲ့တယ်။ ဒါပေမယ့် ကျွန်တော်တို့ဟာ လုပ်ငန်းတွေအတွက် ကျွမ်းကျင်ဝန်ထမ်း ၁၆ဝဝဝ ကျော်ကို ထပ်မံခေါ်ယူရမှာဖြစ်တယ်။ အထူးသဖြင့် စစ်လက်နက်ပစ္စည်းထုတ်လုပ်ရေးနဲ့ပတ်သက်ပြီး အင်ဂျင်နီယာပိုင်း၊ နည်းပညာပိုင်းတွေအတွက် ကျွမ်းကျင်လုပ်သားတွေ ခေါ်ယူသွားမှာပါ။ ပြည်နယ်အုပ်ချုပ်ရေး မှူးတွေအနေနဲ့လည်း လုပ်သားတွေ ထပ်မံခေါ်ယူနိုင်အောင်ကူညီပေးရမှာပါ" လို့ ပြောပါတယ်။ 

Volga Federal ဒေသတစ်ခုတည်းမှာ စစ်လက်နက်ပစ္စည်းထုတ်လုပ်တဲ့လုပ်ငန်း ၁ဝ၆ ခုရှိနေပြီး စစ်လက်နက် ပစ္စည်းများ၊ ကျည်ဆံများ အရှိန်မြင့်ထုတ်လုပ်နေကြောင်း၊ အဆိုပါ စစ်လက်နက်ပစ္စည်းထုတ်လုပ်ရေးလုပ်ငန်းတွေ ဟာ စစ်လက်နက်ပစ္စည်းရောင်းချဖို့ အမှာစာများ လက်ခံရရှိထားကြောင်း ရုရှားကုန်သွယ်ရေးနဲ့ စက်မှုဝန်ကြီး က ပြောပါတယ်။

ရုရှားနိုင်ငံဟာ လက်ရှိအချိန်မှာ ယူကရိန်းနဲ့ စစ်ဖြစ်နေတဲ့အတွက် စစ်လက်နက်ပစ္စည်းများ လိုအပ်နေကြောင်း သိရပါတယ်။ ရုရှားနိုင်ငံအပြင် ယူကရိန်းကို စစ်လက်နက်ပစ္စည်းများ ကူညီပံ့ပိုးပေးလျက်ရှိနေတဲ့  အမေရိကန် အပါအဝင် အနောက်အုပ်စုနိုင်ငံတွေလည်း စစ်လက်နက်ပစ္စည်းများ လိုအပ်နေကြောင်း သိရပါတယ်။