Htay Oung (NSS) - ဇူလိုင် ၂၁

ထိုင်းနိုင်ငံ MFP ပါတီ ခေါင်းဆောင် ပီတ_လင်ဂျာရွန်ရတ်ကို ထောက်ခံတဲ့ ဆန္ဒပြသူ အုပ်စုတွေဟာ ယခုသီတင်းပတ်အတွင်း ဘန်ကောက်မြို့ နေရာအနှံ့အပြားမှာ ပေါ်ပေါက်လာခဲ့တယ်လို့ Bangkok Post က ယနေ့ (ဇူလိုင်လ ၂၁ ရက်)မှာ ရေးသားပါတယ်။

ပီတရဲ့ ဝန်ကြီးချုပ်ရာထူးအတွက် ဒုတိယအကြိမ် ကမ်းလှမ်းမှုကို ပါလီမန်က ပယ်ချခဲ့ပြီး သူ့ရဲ့ iTV မီဒီယာကုမ္ပဏီမှာ ရှယ်ယာပိုင်ဆိုင်မှုကိစ္စ ချိန်ဆနေခိုက် အမတ်အဖြစ်မှ ဆိုင်းငံ့ထားရန် ဖွဲ့စည်းပုံအခြေခံဥပဒေဆိုင်ရာခုံရုံးက ဆုံးဖြတ်ပြီးနောက် ယခုလို စုဝေးမှုများ ပေါ်ပေါက်လာခြင်းဖြစ်ပါတယ်။

သောကြာနှင့် တနင်္ဂနွေနေ့များမှာ လူထုအစည်းအဝေးပွဲများကျင်းပရန် သမ်မာဆက်ညီညွတ်ရေးတပ်ဦးနဲ့ ဆန္ဒဖော်ထုတ်ရေးသမဂ္ဂ၊ တာလူးဂတ်စ်အဖွဲ့နဲ့ ထိုင်းကျောင်းသားအစည်းအရုံးတို့က သူတို့ရဲ့ လူမှုကွန်ရက်စာမျက်နှာမှာ အစီအစဉ်ကို ကြေညာထားပါတယ်။

သောကြာနေ့ (ဇူလိုင်လ ၂၁ ရက်)မှာ ကျင်းပရန် စီစဉ်ထားတဲ့ လူထုအစည်းအဝေးပွဲကို ကက်ဆီဆတ်တက္ကသိုလ်ခန်းမ အပြင်ဘက် ညနေ ၅ နာရီမှာ စတင်မည်ဖြစ်ပြီး အဲဒီနောက် ညနေ ၇ နာရီဘန်ကောက်အနုပညာနဲ့ ယဉ်ကျေးမှုစင်တာ (BACC) အပြင်ဘက်မှာ ထပ်မံကျင်းပမယ်လို့ သိရှိရပါတယ်။

ဒီမိုကရက်တစ်အစိုးရအပေါ် ထောက်ခံကြောင်း ၁၁ ရက်ကြာမြင့်မယ့် ထိုင်းနိုင်ငံ မဟာမိတ်များ ပြုပြင်ပြောင်းလဲရေး ပြည်သူ့ညီလာခံကို ကြာသပတေးနေ့ “ပက်သူ၀မ်” လမ်းဆုံမှာ စတင်ခဲ့ပါတယ်။

ပီတနဲ့ MFP ပါတီတို့အပေါ် စိတ်ဓါတ်ရေးရာ ထောက်ခံကြောင်း ပြသရန်အတွက် တနင်္ဂနွေနေ့ ညနေ ၅ နာရီမှ စပြီး “အဆော့”လမ်းဆုံမှာ နောက်ထပ်စုဝေးပွဲတစ်ခုပြုလုပ်ရန် နိုင်ငံရေး တက်ကြွလှုပ်ရှားသူတစ်ဦးက သူ့ရဲ့ လူမှုကွန်ရက်စာမျက်နှာမှာ ရေးသားထားပြီး ပီတကိုလည်း တက်ရောက်ဖို့ ဖိတ်ကြား ခဲ့ပါတယ်။

 ဒီမိုကရေစီကို ဖျက်စီးရန် ကြိုးပမ်းမှုနဲ့ MFP ပါတီက အစိုးရသစ်ကို ဦးဆောင်ရန်အတွက် မေလ ၁၄ ရက် အထွေရွေးကောက်ပွဲမှာ မဲဆန္ဒရှင် ၁၄ သန်းတို့ရဲ့ သဘောတူညီမှုအပေါ် ဟန့်တားမှုမှန်သမျှ ရှုတ်ချကြောင်း တရားမျှ တသောလူ့အဖွဲ့အစည်းအတွက် ပြည်သူ့လှုပ်ရှားမှုအဖွဲ့ (P-move) ပါတီလည်း သတင်းထုတ်ပြန်ပါတယ်။

ပုံပျက်နေတဲ့ ဒီမိုကရေစီကို ဆန့်ကျင်ကြောင်း ပြသတဲ့အနေနဲ့ အစုလိုက်အပြုံလိုက် နှုတ်ထွက်ကြပြီး ဒီမိုကရေစီလိုလားတဲ့ လှုပ်ရှားမှုများမှာ ပူးပေါင်းပါ၀င်ဖို့ အထက်လွှတ်တော်အမတ်များကို တောင်းဆိုထားပါတယ်။

တစ်ချိန်တည်းမှာပဲ MFP အနေနဲ့ ဖြူထိုင်းပါတီက ၀န်ကြီးချုပ်အဖြစ် မဲအနိုင်ရရှိရေး လမ်းဖွင့်ပေးတဲ့အနေနဲ့ ၈-ပါတီ မဟာမိတ်အဖွဲ့မှ ခွဲထွက်ရန် “ဆရီ_ရူအမ်_ထိုင်း“ ပါတီခေါင်းဆောင် ရဲမင်းကြီးဟောင်း ပါလီမန်အမတ် ဆရီပီဆု_တီမီရာဗီက တိုက်တွန်းလိုက်ပါတယ်။ သူ့ရဲ့ ဆရီရူအမ်ထိုင်းပါတီဟာ ၈-ပါတီ မဟာမိတ်အုပ်စုမှဖြစ်ပြီး အမတ်တစ်နေရာ အနိုင်ရရှိထားပါတယ်။

MFP အနေနဲ့ မဟာမိတ်ဖွဲ့စည်းရေး ရည်မှန်းချက်ကို ပံ့ပိုးကူညီရန် အနစ်နာခံမှုအဖြစ် ဖြူထိုင်းပါတီကို လမ်းဖွင့်ပေးပြီး နောက်ပိုင်း ညွန့်ပေါင်းအစိုးရမှာ မိတ်ဖက်အပြန် ပြန်လည် ပါ၀င်နိုင်ကြောင်း၊ ဖြူထိုင်း MFP တို့ဟာ ဝန်ကြီးချုပ်ရာထူးအတွက် ဆက်လက်ယှဉ်ပြိုင်နိုင်မလား ဆိုတာကို နှစ်ခါပြန်စဉ်းစားစေလိုကြောင်း၊ ကိုယ်စားလှယ်လောင်းအသစ်က နောက်တစ်ကြိမ်မဲခွဲရာမှာ မအောင်မြင်ခဲ့ရင် သူ့အတွက် ဒုတိယအကြိမ်အခွင့် အရေးရရှိမှာ မဟုတ်ပါတဲ့အတွက်ကြောင့်ဖြစ်ကြောင်း လူကြီးသူမတစ်ဦးအနေနဲ့ အကြံပြုလိုပါတယ်လို့ အသက် ၇၄ နှစ်အရွယ် ရဲမင်းကြီးဟောင်း ပါလီမန်အမတ်က ပြောပြပါတယ်။

(Bangkok Post, 21 July 2023,” Three killed, Chinese consulate damaged in Russian attack on Ukraine's port cities” ကို ဆီလျော်အောင် ကောက်နှုတ်ဘာသာပြန်ဆိုသည်)