ဂျန်ဇက် (NSS) - ဇူလိုင် ၂ဝ

အီရတ်နိုင်ငံရှိ လူအုပ်ကြီးဟာ မြို့တော် ဘဂ္ဂဒက်ရှိ ဆွီဒင်သံရုံးကို မီးရှို့ဖျက်ဆီးဖို့ ကြိုးပမ်းခဲ့ကြောင်း သိရပါတယ်။ ဆွီဒင်နိုင်ငံ ကိုရမ်ကျမ်းစာကို မီးရှို့ဖျက်ဆီးမှုတွေဖြစ်လာခဲ့ခြင်းကိုမကျေနပ်တဲ့ အီရတ်ပြည်သူများက အီရတ်နိုင်ငံ အတွင်းရှိ ဆွီဒင်သံရုံးကို မီးရှို့ဖျက်ဆီးဖို့ ကြိုးပမ်းလာခဲ့တာဖြစ်ပါတယ်။

ဆွီဒင်အာဏာပိုင်တွေဟာ ပြီးခဲ့တဲ့ရက်ပိုင်းက စတော့ဟုမ်းမြို့ရှိအီရတ် သံရုံးအပြင်ဘက်မှာ ဆွီဒင်နိုင်ငံသားတွေရဲ့ အီရတ်အလံနဲ့ ကိုရမ်ကျမ်းစာ မီးရှို့ဖျက်ဆီးမှုကို ခွင့်ပြုခဲ့ပြီးနောက် အီရတ်ပြည်သူတွေက လက်တုံ့ပြန်ဖို့ ကြိုးပမ်း လာခဲ့တာဖြစ်ပါတယ်။ 

ဆွီဒင်နိုင်ငံရှိ အီရတ်သံရုံးရှေ့မှာဖြစ်ပွားခဲ့တဲ့အဖြစ်အပျက်နဲ့ပတ်သက်ပြီး အီရတ်ပြည်သူတွေ စိတ်ဆိုးဒေါသ ဖြစ်ပွားခဲ့ပြီး အီရတ်ဘာသာရေးဆရာ Moqtada Sadr ကို ထောက်ခံသူတွေဟာ ဇူလိုင် ၂ဝ ရက်နေ့မှာ ဆန္ဒပြဖို့ စီစဉ်ခဲ့ကြောင်း သိရပါတယ်။ 

အီရတ်ဆန္ဒပြသူတွေဟာ လေထဲမှာ ကိုရမ်ကျမ်းစာကို ကိုင်မြှောက်ထားသလို ဘာသာရေးခေါင်းဆောင် Moqtada Sadr ရဲ့ရုပ်ပုံတွေကို ကိုင်ဆွဲဆန္ဒပြခဲ့ကြောင်း သိရပါတယ်။ အဆိုပါအီရတ်ဘာသာရေးခေါင်းဆောင်ဟာ အီရတ်နိုင်ငံအတွင်းမှာ ထင်ရှားနာမည်ကြီးတဲ့ ဘာသာရေးခေါင်းဆောင်တစ်ဦးဖြစ်ပါတယ်။ 

ဆန္ဒပြပွဲမှာ ပါဝင်သူတစ်ဦးက "ကျွန်တော်တို့ အားလုံးချစ်ခင်ယုံကြည်တဲ့ ကိုရမ်ကျမ်းစာကို မီးရှို့ဖျက်ဆီးတာကို ပြစ်တင်ရှုတ်ချဖို့ ဆန္ဒပြတာပါ။ ကျွန်တော်တို့အနေနဲ့ ဆွီဒင်အစိုးရနဲ့ အီရတ်အစိုးရတို့ကို ဒီလိုမျိုး ကိုရမ်ကျမ်းစာ တွေကို မီးရှို့ဖျက်ဆီးခြင်းလုပ်ရပ်တွေကို ရပ်တန့်ပေးဖို့ တိုက်တွန်းပါတယ်" လို့ ပြောပါတယ်။ ဒါ့အပြင် ဆန္ဒပြပွဲမှာ ပါဝင်တဲ့လူငယ်တစ်ဦးကလည်း " ကျွန်တော်တို့ဟာ ဆွီဒင်သံရုံးကို မီးရှို့ဖို့ စီစဉ်ထားတယ်" လို့ ပြောပါတယ်။

ဆွီဒင်နိုင်ငံခြားရေးဝန်ကြီးဌာနကတော့ အီရတ်နိုင်ငံရှိ ဆွီဒင်သံရုံးဝန်ထမ်းများ ဘေးကင်းလုံခြုံစွာ ရှိနေကြောင်း ပြောပါတယ်။ ဆွီဒင်နိုင်ငံခြားရေးဝန်ကြီးဌာနက "အီရတ်အာဏာပိုင်တွေဟာ ဆွီဒင်သံရုံးဝန်ထမ်း၊ နဲ့ သံအရာရှိ တွေကို ကာကွယ်ပေးရမယ့် တာဝန်ရှိပါတယ်။ သံရုံးနဲ့ သံရုံးဝန်ထမ်းတွေကို တိုက်ခိုက်တာက ဗီယင်နာကွန်ဗင်းရှင်း ကို ချိုးဖောက်တာပါ" လို့ ပြောပါတယ်။

ဆွီဒင်သံရုံးကို မီးရှို့ဖို့အတွက် အီရတ်ပြည်သူတွေဟာ ကုန်ကားတွေနဲ့ သံရုံးအရှေ့ကိုရောက်ရှိလာပြီး အီရတ် လုံခြုံရေးတပ်ဖွဲ့တွေ နဲ့ အီရတ်ဆန္ဒပြအုပ်စုတွေကြား ထိပ်တိုက်တွေ့ဆုံမှုတွေဖြစ်ပွားနေကြောင်းသိရပါတယ်။