ဂျန်ဇက် (NSS) - ဇူလိုင် ၁၉ 

ထိုင်းဝန်ကြီးချုပ်အဖြစ် ရေပန်းအစားဆုံးဖြစ်နေတဲ့ ပီတ လင်ဂျာရိုအမ်ရက်ဟာ ဇူလိုင် ၁၉ ရက်နေ့မှာ လွှတ်တော် ကို နှုတ်ဆက်ထွက်ခွာသွားခဲ့ကြောင်း ထိုင်းသတင်းတွေက ဖော်ပြပါတယ်။

ဖွဲ့စည်းပုံအခြေခံဥပဒေခုံရုံးဟာ ဇူလိုင် ၁၉ ရက်မှာ ပီတရဲ့အမှုကို ကြားနာစစ်ဆေးခဲ့ပြီးနောက် အောက်လွှတ်တော် ကိုယ်စားလှယ်အဖြစ်ကနေ ဆိုင်းငံ့လိုက်ကြောင်း ဆုံးဖြတ်ခဲ့ပြီးနောက်မကြာမီ ပီတဟာ လွှတ်တော်ထဲက နှုတ်ဆက်ထွက်ခွာသွားခဲ့တာဖြစ်ကြောင်း သိရပါတယ်။

ပီတဟာ တားမြစ်ထားတဲ့ရွေးကောက်ပွဲကော်မရှင်ရဲ့စည်းကမ်းတွေကို ချိုးဖောက်ပြီး မီဒီယာလုပ်ငန်းတွေမှာ ရှယ်ယာတွေ ပိုင်ဆိုင်ထားတယ်လို့ စွပ်စွဲခံရပြီး အဆိုပါစွပ်စွဲခံရမှုကို ဖွဲ့စည်းပုံအခြေခံဥပဒေတရားရုံးက ဇူလိုင် ၁၉ ရက်မှာ အပြီးသတ်ဆုံးဖြတ်ခဲ့ပါတယ်။ 

ပီတဟာ iTV မီဒီယာလုပ်ငန်းမှာ ရှယ်ယာတွေ ပိုင်ဆိုင်ထားတဲ့အတွက် ကိုယ်စားလှယ်အရည်အချင်းပျက်ယွင်း ကြောင်း ရွေးကောက်ပွဲကော်မရှင်က ကနဦးဆုံးဖြတ်ခဲ့ပြီးနောက် အဲဒီအမှုကို ဖွဲ့စည်းပုံအခြေခံဥပဒေ တရားရုံးက ဇူလိုင် ၁၉ ရက်မှာ ထပ်မံဆုံးဖြတ်ခဲ့တာဖြစ်ပါတယ်။ ဖွဲ့စည်းပုံအခြေခံဥပဒေခုံရုံး ရှိ တရားသူကြီး ၉ ဦးအနက် ၇ ဦးက ပီတကို လွှတ်တော်ကိုယ်စားလှယ်အဖြစ်ကနေ ဆိုင်းငံ့ဖို့ ဆန္ဒမဲပေးခဲ့ကြောင်း သိရပါတယ်။ 

ပီတက "ကျွန်တော်အနေနဲ့ လွှတ်တော်ကို နှုတ်ဆက်ရတဲ့ ဒီအခွင့်အရေးကို  ပြန်လည်အသုံးချသွားမှာပါ။ ကျွန်တော်တို့တွေ ပြန်လည်တွေ့ဆုံဦးမှာပါ" လို့ လွှတ်တော်ကိုယ်စားလှယ်များကို ပြောဆိုခဲ့ပါတယ်။ ပီတဟာ လွှတ်တော်အတွင်းက မထွက်ခွာခင် "လွှတ်တော်ကိုယ်စားလှယ်အားလုံးဟာ ပြည်သူကို စောင့်ရှောက်နိုင်ဖို့ လွှတ်တော်စနစ်ကို အကောင်းဆုံးအသုံးချစေလိုတယ်။ ထိုင်းနိုင်ငံဟာ ရွေးကောက်ပွဲကျင်းပခဲ့တဲ့ မေလ  ၁၄ ရက် နေ့ နောက်ပိုင်းကတည်းက အပြောင်းလဲတွေဖြစ်လာခဲ့တယ်" လို့ ပြောပါတယ်။ 

ပီတဟာ လွှတ်တော်ကို နှုတ်ဆက်ထွက်ခွာချိန်မှာ သူရဲ့လွှတ်တော်ကိုယ်စားလှယ်အဖြစ် အသိအမှတ်ပြုခံရတဲ့ MP ID ကဒ်ကို စားပွဲပေါ်မှာထားခဲ့ပြီး ထွက်သွားခဲ့ခြင်းဖြစ်ကြောင်း ထိုင်းသတင်းတွေက ဖော်ပြပါတယ်။ 

ပီတက "လက်ရှိစနစ်ဟာ နိုင်ငံကို ဦးဆောင်နိုင်ဖို့ ပြည်သူတွေရဲ့နှလုံးသားကို ရယူနိုင်ဖို့ခက်ခဲပါတယ်" လို့ ပြောပါတယ်။

ထိုင်းဖွဲ့စည်းပုံအခြေခံဥပဒေခုံရုံးရဲ့ဆုံးဖြတ်ချက်နဲ့ပတ်သက်ပြီး ရှေ့သို့ချီပါတီကို အားပေးသူတွေဟာ ဆန္ဒပြပွဲများ လုပ်ဆောင်လျက်ရှိနေကြောင်း သိရပါတယ်။