ယခုနှစ်တွင် ကျောင်းပေါင်း လေးသောင်း‌ကျော်ဖွင့်လှစ်ထားပြီး ကျောင်းသား/ကျောင်းသူ (၈)သန်းကျော် ကျောင်း အပ်နှံခဲ့

ယွန်း (NSS) - ဇူလိုင် ၁၄

(၂ဝ၂၃- ၂ဝ၂၄) ပညာသင်နှစ်တွင် အခြေခံပညာကျောင်းပေါင်း (၄၃ဝဝဝ)ကျော် ဖွင့်လှစ်ထားပြီး ကျောင်းသား/ ကျောင်းသူပေါင်း (၈)သန်း ‌ကျော် ကျောင်းအပ်နှံခဲ့ကြောင်း နစကဥက္ကဋ္ဌက ဆိုသည်။

နစကဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်က ဇူလိုင်(၁၃)ရက်တွင် နေပြည်တော်ရှိ နစကဥက္ကဋ္ဌရုံး အစည်းအဝေး ခန်းမတွင် ကျင်းပခဲ့သော ပြည်ထောင်စုအစိုးရအဖွဲ့အစည်းအဝေး(၃/၂ဝ၂၃)တွင် အထက်ပါကဲ့သို့ အသိပေးပြော ကြားခဲ့ခြင်းဖြစ်သည်။ 

(၂ဝ၂၃ - ၂ဝ၂၄) ပညာသင်နှစ်တွင် အခြေခံပညာကျောင်းပေါင်း (၄၃ဝဝဝ)ကျော် ဖွင့်လှစ်ထား၍ ကျောင်းသား/ ကျောင်းသူပေါင်း (၈)သန်း ‌ကျော် ကျောင်းအပ်နှံထားကာ ယခင်ပညာသင်နှစ်ထက် ကျောင်းသားပေါင်း တစ်သန်း‌ကျော် ပို၍ကျောင်းအပ်ခဲ့ကြောင်း သိရသည်။

အဆိုပါ ကျောင်းသားများအားလုံးကို ပညာသင်နှစ်ပြီးဆုံးသည်အထိ အပြည့်အဝကျောင်းတက်နိုင်‌ရေးနှင့် အဆင့်လိုက်အတန်းကူးပြောင်းမှု ရာခိုင်နှုန်းမြင့်မားစေရန်အတွက် ကြိုးပမ်းဆောင်ရွက်သွားရန် နစကဥက္ကဋ္ဌ က တိုက်တွန်းပြောဆိုထားသည်။

ထိုသို့ ဆောင်ရွက်ရာတွင်လည်း တစ်မျိုးသားလုံးနှင့် ဆိုင်သည့်ကိစ္စဖြစ်ခြင်းကြောင့် ပညာရေးဝန်ကြီးဌာန သာမက အခြားဝန်ကြီးဌာနများကလည်း ကူညီဆောင်ရွက်ရန် ၎င်းက ဆက်လက်ပြောသည်။

ထို့ပြင် ကျောင်းများနှင့် ဆရာ၊ ဆရာမများ လုံခြုံမှုရှိစေရေးအတွက်လည်း လိုအပ်မှုများကို သက်ဆိုင်ရာဝန်ကြီး ဌာနက ဆောင်ရွက်ရန် နစကဥက္ကဋ္ဌ က အသိပေးပြောဆိုထားသည်။

ယခုပညာသင်နှစ်၌ ပြည်တွင်းရှိ တိုင်းနှင့် ပြည်နယ်အချို့တွင် ကျောင်းပေါင်း (၄၃ဝဝဝ)ကျော် ဖွင့်လှစ်ထားနိုင် သော်လည်း အချို့ဒေသများတွင် နိုင်ငံရေးပဋိပက္ခများ အပါအဝင် တိုက်ပွဲများကြောင့် ကျောင်းဖွင့်နိုင်ရန် အခက်အခဲများရှိနေသည့် ဒေသများလည်း ရှိနေသေးသည်။

အဆိုပါ နိုင်ငံရေးပဋိပက္ခများကြောင့် နေရပ်စွန့်ခွာထွက်ပြေးနေရသည့် ကျောင်းသား၊ ကျောင်းသူများလည်း ရှိနေ ပြီး ၎င်းတို့အနေဖြင့် လက်ရှိအချိန်အထိ ကျောင်းဆက်တက်ရန် အခက်အခဲများရှိနေကြောင်း သိရသည်။

ထို့ပြင် ဖွင့်လှစ်လျှက်ရှိသည့် အချို့စာသင်ကျောင်းများတွင်လည်း ဖျက်ဆီးခံရမှုများရှိနေပြီး ပညာသင်ကြားပေးနေ သည့် ဆရာ၊ ဆရာမများသည်လည်း  ခြိမ်းခြောက်သတ်ဖြတ်ခံနေရမှုများ ဖြစ်ပွားလျက်ရှိနေသည်။