ယွန်း (NSS) - ဇူလိုင် ၇

အစိုးရအနေဖြင့် ပြည်သူများအား ကာကွယ်ရန်အတွက် PDF အကြမ်းဖက်များကို တုံ့ပြန်ဆောင်ရွက်ရခြင်းဖြစ်ကြောင်း နိုင်ငံခြားရေးဝန်ကြီးမှ အသိပေးပြောဆိုထားသည်။

နိုင်ငံခြားရေးဝန်ကြီးဌာန၊ ပြည်ထောင်စုဝန်ကြီး ဦးသန်းဆွေက ရန်ကုန်မြို့ရှိ နိုင်ငံခြားရေးဝန်ကြီးဌာန၊ ဝန်ဇင်းမင်း ရာဇာခန်းမ၌  ဇူလိုင်လ(၆)ရက်တွင် မြန်မာနိုင်ငံ၏ လက်ရှိပြည်တွင်းနိုင်ငံရေးဖြစ်ပေါ်တိုးတက်မှုအခြေအနေများကို ပြောဆိုရာ၌ အထက်ပါကဲ့သို့ ပြောကြားခဲ့ခြင်းဖြစ်သည်။

ဝန်ကြီးဌာနအနေဖြင့် အာဆီယံတူညီဆန္ဒ(၅)ချက်ဖော်ဆောင်ရာတွင် အရေးကြီးဆုံးအချက်များဖြစ်သည့် အကြမ်းဖက်မှုများရပ်တန့်ရေး အပါအဝင် အားလုံးပါဝင်သည့် ဆွေးနွေးပွဲများ ကျင်းပရေးနှင့် လူသားချင်း စာနာထောက်ထားမှုဆိုင်ရာ ကူညီထောက်ပံ့မှုများ ပေးအပ်ရေးတို့ကိုလည်း ဆောင်ရွက်လျက်ရှိကြောင်း သိရသည်။

လက်ရှိတွင် PDF  အကြမ်းဖက်များ၏ တိုက်ခိုက်မှုကြောင့် အပြစ်မဲ့ပြည်သူ အရပ်သား (၄၈၇၈) ဦးနှင့် အစိုးရဝန်ထမ်း (၁ဝ၆ဝ) ဦး စုစုပေါင်း (၅၉၃၈)ဦးကျော် ထိခိုက်သေဆုံးခဲ့ရကြောင်း ပြည်ထောင်စုဝန်ကြီးက ဆိုထားသည်။

၎င်းတို့အနေဖြင့် အဖျက်အမှောင့်လုပ်ငန်းများ ကျူးလွန်ခြင်းအပြင် ဒီမိုကရေစီဖော်ဆောင်ရေးလုပ်ငန်းစဥ်များအား အဟန့်အတားဖြစ်အောင် လုပ်ဆောင်နေမှုများလည်း ရှိနေကြောင်း ပြည်ထောင်စုဝန်ကြီး ဦးသန်းဆွေက ဆက်လက်ပြောကြားခဲ့သည်။

ထို့ကြောင့် PDF အကြမ်းဖက်များ၏ ဥပဒေပြင်ပလုပ်ရပ်များမှ ပြည်သူများအား ကာကွယ်ရန် အစိုးရအနေဖြင့် ၎င်းတို့ကို တုံ့ပြန်ဆောင်ရွက်ရခြင်းဖြစ်ကြောင်း ပြည်ထောင်စုဝန်ကြီးက အသိပေးပြောကြားခဲ့သည်။

မြန်မာနိုင်ငံတွင် ငြိမ်းချမ်းရေးဆွေးနွေးပွဲများကို အကြိမ်(၅ဝဝဝ)ကျော် ကျင်းပခဲ့ပြီးဖြစ်ကာတိုင်းရင်းသားလက်နက်ကိုင် အဖွဲ့အစည်းများနှင့် အပစ်အခတ်ရပ်စဲမှု စတင်ခဲ့သည်မှာလည်း (၃၃)နှစ်ရှိပြီဖြစ်ကြောင်း သိရသည်။

ထို့ပြင် ရခိုင်ပြည်နယ်ရှိ လူမှုအသိုက်အဝန်းများအကြား ငြိမ်းချမ်းရေးနှင့် သဟဇာတရှိစေရေးအတွက်လည်း ဆောင်ရွက်နေပြီး နိုင်ငံသားစိစစ်ပြီးသည့် နေရပ်စွန့်ခွာသူများအား ပြန်လည်လက်ခံရေးလုပ်ငန်းစဉ်ကို ဆောလျင်စွာ စတင်နိုင်ရေးအတွက်‌လည်း ဆောင်ရွက်လျက်ရှိကြောင်း ပြည်ထောင်စုဝန်ကြီးက ပြောကြားခဲ့သည်။