NSS - ဇူလိုင် ၆

တီမောလက်စ်တေသမ္မတနှင့် NUG ကိုယ်စားလှယ်များ တွေ့ဆုံမှုအပေါ် ကန့်ကွက်ကြောင်း မြန်မာနိုင်ငံဆိုင်ရာ တီမောလက်စ်တေသံရုံးမှ သံရုံးယာယီတာဝန်ခံကို ခေါ်ယူသတိပေးခဲ့ကြောင်း သတင်းရရှိသည်။

နစက၏ နိုင်ငံခြားရေးဝန်ကြီးဌာနသည် ယမန်နေ့(ဇူလိုင်လ ၅ ရက်)တွင် အထက်ပါကဲ့သို့ သတင်းထုတ်ပြန်ထားသည်။

နိုင်ငံခြားရေးဝန်ကြီးဌာနမှ အမြဲတမ်းအတွင်းဝန် ဦးချမ်းအေးသည် ယမန်နေ့ နံနက်ပိုင်းတွင် ရန်ကုန်မြို့ရှိ တီမောလက်စ်တေသံရုံးမှ သံရုံးယာယီတာဝန်ခံ Mr. Avelino Fernandes Ximenes Pereira ကို နေပြည်တော်သို့ ဖိတ်ခေါ်ကာ သတိပေးခဲ့ခြင်းဖြစ်ကြောင်း သိရသည်။

ပြီးခဲ့သော ဇူလိုင်လ ၁ ရက်တွင် တီမောလက်စ်တေနိုင်ငံ၌ ကျင်းပခဲ့သည့် (၉)ကြိမ်မြောက် အစိုးရ၏ ဝန်ကြီးချုပ်အသစ်နှင့် အစိုးရ အဖွဲ့ဝင်များ ကျမ်းသစ္စာကျိန်ဆိုပွဲအခမ်းအနားသို့ NUG ၏ ကိုယ်စားလှယ်များအား ဖိတ်ကြားတက်ရောက်စေခဲ့သည်ဟု နိုင်ငံခြားရေးဝန်ကြီးဌာန၏ ထုတ်ပြန်ချက်တွင် ဖော်ပြထားသည်။

မြန်မာနိုင်ငံမှ အကြမ်းဖက်အဖွဲ့အဖြစ် ကြေညာထားသော NUG ၏ ကိုယ်စားလှယ်များအား ဖိတ်ကြားတက်ရောက်စေခဲ့သည့်ကိစ္စအပါအဝင် သမ္မတမှ NUG ကိုယ်စားလှယ်များကို လက်ခံတွေ့ဆုံခဲ့သည့်ကိစ္စများနှင့်ပတ်သက်၍ တီမောလက်စ်တေအစိုးရ၏ လုပ် ဆောင်ချက်အပေါ် ကန့်ကွက်ကြောင်း သံရုံးတာဝန်ခံအား သတိပေးပြောဆိုခဲ့သည်ဟု ဝန်ကြီးဌာနက ဆိုသည်။

ထို့ပြင် ၎င်းကဲ့သို့တွေ့ဆုံမှုမျိုး နောင်တွင်မပြုလုပ်ရေး တိုက်တွန်းပြောကြားခဲ့ကာ ကန့်ကွက်သည့်သတိထောက်လွှာကိုလည်း မြန်မာနိုင်ငံဆိုင်ရာ တီမောလက်စ်တေသံရုံးယာယီတာဝန်ခံထံ ပေးအပ်ခဲ့ကြောင်း ထုတ်ပြန်ထားသည်။

၎င်းသတိထောက်လွှာ၌ အကြမ်းဖက်အဖွဲ့အစည်းဖြစ်သော NUG အား တီမောလက်စ်တေအစိုးရမှ ဖိတ်ကြားခဲ့မှုသည် မြန်မာနိုင်ငံအတွင်း၌ ယင်းအဖွဲ့အစည်းမှ ကျူးလွန်ဆောင်ရွက်နေသည့် အကြမ်းဖက်လုပ်ရပ်များကို အားပေးအားမြှောက်ပြုရာ ရောက်ကြောင်း ထည့်သွင်းရေးသားကာ ဖော်ပြထားသည်ဟုလည်း ဝန်ကြီးဌာနက ဆိုထားသည်။

အထက်ပါ သတိထောက်လွှာနှင့်ပတ်သက်၍ နိုင်ငံခြားရေးဝန်ကြီးဌာနမှ ညွှန်ကြားရေးမှူးဟောင်းဖြစ်သူ ဦးကြည်မောင်ဦး က “အဲဒီဟာက သံတမန်ရေးရာ ပြောတဲ့ဆိုတဲ့နေရာမှာ (၅)ဆင့်ရှိတဲ့နေရာမှာ သူက ဒုတိယအဆင့်လောက်ပဲရှိတယ်။ တတိယအဆင့်၊ စတုတ္ထအဆင့်၊ ပဉ္စမအဆင့်ဆိုတာရှိသေးတယ်။ ဟန်ပြလုပ်ပြရုံမျှပဲ ရှိသေးတယ်။ သိပ်ပြီးတော့ ထိထိရောက်ရောက် မရှိသေးဘူး။ သူ့ထက် ထိရောက်တဲ့ဟာလေးတွေ ရှိသေးတယ်” ဟု NP News ကို မှတ်ချက်ပြု ပြောဆိုထားသည်။

ထို့ပြင် အဆိုပါကိစ္စနှင့်ပတ်သက်၍ သတိထောက်လွှာအပြင် သတိပေးချက်ထုတ်ပြန်နိုင်ကြောင်းနှင့် သံရုံးအဆင့်လျှော့ချမှုများလည်း ပြုလုပ်နိုင်ကြောင်း ၎င်းက ဆက်လက်ပြောဆိုထားသည်။

“အခုလောလောဆယ်ကတော့ ဟန်ပြမဟုတ်ဘဲနဲ့ ပိုပြီးတော့ ထိထိရောက်ရောက် ကျယ်ကျယ်ပြန့်ပြန့်ဖြစ်စေဖို့ဆိုရင် အခုန ကပြောတဲ့ ရန်ကုန်မှာရှိတဲ့ သံတမန်တွေကို နေပြည်တော်ကို ဖိတ်ခေါ်ပြီးတော့မှ သတင်းစာရှင်းလင်းပွဲ လုပ်သင့်တယ်။ အဲဒါကို နိုင်ငံတစ်ဝှမ်းသိအောင် ပြသင့်တယ်။ ပြီးလို့ရှိရင်လည်း နောင်အလားတူ ဖြစ်လာလို့ရှိရင် နိုင်ငံကြီးကြီးငယ်ငယ် ဗဟိုဆင့်ခေါ်ပြီးတော့ သတိထောက်လွှာပေးတာတို့ အဲဒါမျိုးလုပ်တာတို့ လုပ်သင့်တယ်။ အခုဟာကတော့ မထိရောက်သေးဘူး။ ဟန်ပြသက်သက်လောက်ပဲ ရှိသေးတယ်” ဟု ဦးကြည်မောင်ဦးက မှတ်ချက်ပြုထားသည်။

တီမောလက်စ်တေအစိုးရသစ်၏ ကျမ်းသစ္စာကျိန်ဆိုပွဲအခမ်းအနားသို့ NUG မှ ဒေါ်ဇင်မာအောင် တက်ရောက်ခဲ့ကြောင်း တွေ့ရှိရပြီး တီမောလက်စ်တေသမ္မတ၏ ဖိတ်ကြားချက်အရ တက်ရောက်ခဲ့ခြင်းဖြစ်ကြောင်း NUG ဘက်က ထုတ်ပြန်ထားသည်ကိုလည်း တွေ့ရှိရသည်။