NSS - ဇွန် ၃ဝ

နယ်စပ်ဒေသလုံခြုံရေး အစည်းအဝေးလာရောက်သည့် တရုတ်နိုင်ငံမှ တပ်မတော်ဆိုင်ရာ ကိုယ်စားလှယ် များလိုက်ပါလာသည့် ယာဉ်တန်းကို KIA အဖွဲ့က ပစ်ခတ်တိုက်ခိုက်ခဲ့ကြောင်း သိရသည်။

တရုတ်နိုင်ငံ ကောင်စစ်ဝင်တစ်ဦးပါဝင်သည့် အဖွဲ့သည် ဇွန်လ ၂၇ ရက်က ကချင်ပြည်နယ် မြစ်ကြီးနားမြို့အနီး၌ တည်ဆောက်မည့် နန်ကျင်းစီးပွားရေးဇုန်နှင့်ပတ်သက်ပြီး ဆွေးနွေးရန် မြစ်ကြီးနားသို့ ထွက်ခွါလာစဉ်အချိန်၌ ပစ်ခတ်ခံရခြင်းဖြစ်ပြီး ပစ်ခတ်သည့်အဖွဲ့သည် နယ်ခြားစောင့်တပ် ဖြစ်ကြောင်း သတင်းများထွက်ပေါ်ခဲ့မှုအပေါ် နစက သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက မီဒီယာများကို ပြန်လည်ဖြေကြားရာတွင် အထက်ပါကဲ့သို့ထည့်သွင်းဖြေကြားခဲ့ ခြင်းဖြစ်သည်။

“နယ်ခြား‌ဒေသမှာ တပ်မတော်အချင်းချင်း ပုံမှန်လစဉ် ဆွေးနွေးနေတဲ့ဆွေးနွေးမှုများရှိပါတယ်။ ဒီဆွေးနွေးပွဲကို တရုတ်နိုင်ငံနဲ့မြန်မာနိုင်ငံ တလှည့်စီ ကျင်းပနေတာဖြစ်ပါတယ်။ အလားတူပဲ မြန်မာနိုင်ငံနဲ့ထိစပ်နေတဲ့ တိုင်းပြည်တွေမှာလည်း နယ်စပ်ဒေသလုံခြုံရေး ပုံမှန်အစည်းအဝေးတွေ ပြုလုပ်လေ့ရှိပါတယ်။ ဒီအစည်းအဝေးကို တက်ရောက်ဖို့အတွက် တရုတ်နိုင်ငံက တပ်မတော်ဆိုင်ရာ ကိုယ်စားလှယ်တွေ မြန်မာနိုင်ငံကိုလာရောက်ခဲ့တာရှိပါတယ်။ ဒါကဇွန်လ ၂၇ ရက်မှာ လာရောက်ခဲ့ပါတယ်။ မနက်ပိုင်းမှာ လာရောက်ခဲ့တယ်”ဟု ဗိုလ်ချုပ်ဇော်မင်းထွန်းက ပြောသည်။

အဆိုပါ ယာဉ်တန်းတွင် တရုတ်နိုင်ငံမှကောင်စစ်ဝင်လည်း ပါဝင်ခြင်းမရှိသကဲ့သို့ နန်ကျင်းစီးပွားရေး ဇုန်နှင့် ပတ်သက်သည့် ကိစ္စလည်းမဟုတ်ဘဲ နယ်စပ်ဒေသလုံခြုံရေးနှင့် ပတ်သက်သည့် အစည်းအဝေးကို တက်ရောက်ရန်လာသည့် တရုတ်နိုင်ငံမှ တပ်မတော်ဆိုင်ရာ ကိုယ်စားလှယ်များသာဖြစ်ကြောင်း ၎င်းက ထည့်သွင်းဖြေကြားခဲ့သည်။

အဆိုပါ ကိုယ်စားလှယ်များကို တပ်မတော်နှင့် နယ်ခြားစောင့်တပ်ဖွဲ့မှ လုံခြုံရေးတပ်ဖွဲ့များက သွားရောက်ကြိုဆိုခဲ့ခြင်းဖြစ်ကြောင်း သိရသည်။

“သူတို့က ကန်ပိုက်တီးဘက်ကနေ လာခဲ့တာဖြစ်ပါတယ်။ အဲဒီမှာတော့ တပ်မတော်နဲ့ နယ်ခြားစောင့် တပ်ဖွဲ့က လုံခြုံရေးတပ်ဖွဲ့တွေက သွားရောက်ကြိုဆိုခဲ့တာရှိပါတယ်။ အဲဒီထဲကမှ နယ်ခြားစောင့်တပ်ဖွဲ့ရဲ့ ရှေ့ပြေး ဒုတိယယာဉ်က ၁၃ ကီလိုမီတာအကွာလောက်မှာ လက်နက်ငယ်နဲ့ ငါးချက်ပစ်ခတ်ခံရပါတယ်။ ထိခိုက်ဒဏ်ရာရရှိမှုတော့မရှိပါဘူး”ဟု ဗိုလ် ချုပ်ဇော်မင်းထွန်းကပြောသည်။

ထို့နောက် အဆိုပါယာဉ်တန်းသည် မြစ်ကြီးနားကို ပြန်လည်ထွက်ခွါခဲ့ပြီး မူလအစီအစဉ်အတိုင်း နှစ်ဖက် တွေ့ဆုံကာ အစည်းအဝေးများဆောင်ရွက်ခဲ့ကြောင်း သိရသည်။ အစည်းအဝေးသည်လည်း အောင်မြင်စွာပြီးဆုံးခဲ့ပြီး လက်ရှိအချိန်တွင် တရုတ်နိုင်ငံမှ တပ်မတော်ကိုယ်စားလှယ်အဖွဲ့များလည်း ပြည်ပသို့ ပြန်လည်ထွက်ခွါပြီးဖြစ်ကြောင်းသိရသည်။

“ပစ်ခတ်ခဲ့တဲ့အဖွဲ့တွေကတော့ KIA အဖွဲ့ဆိုတာအတည်ပြုလို့ရပါတယ်။ ပစ်ခတ်ပြီးတဲ့နောက်ပိုင်းမှာ တရုတ်-မြန်မာ နှစ်နိုင်ငံနဲ့ ပြီးရင် နှစ်နိုင်ငံ တပ်မတော်နှစ်ရပ်ကြားမှာ အထင်လွဲမှုတွေဖြစ်လာအောင် သွေးထိုးလှုံ့ဆောင်နေတာတွေ့ရပါတယ်”ဟု ၎င်းကပြောသည်။

အဆိုပါ ဖြစ်စဉ်နှင့်ပတ်သက်ပြီး လုံခြုံရေးအရ အရေးယူဆောင်ရွက်မှုများကို ဆက်လက်ပြုလုပ်သွားမည် ဖြစ်ကြောင်း သိရသည်။